YAASINƆ 8:2-26

²À kú sĩ̀sĩi musu zɛ́ kpado, à zɛna zɛ́rankpakↄ̃a.

³À kú wɛ̃tɛ bĩnilɛ sarɛ, a kòto dↄ bĩnilɛ pìi gbànↄ kĩnaa.

⁴Gbɛ̃nↄ, ákↄ̃nↄ matɛni á sisi, bisãsirinↄ, matɛn lɛ́ zuái.

⁵Nigãzĩkɛrinↄ, à laakari wɛtɛ àgↄ̃ vĩ, yↄ̃nkↄnↄ, à tó àgↄ̃ laasun vĩ.

⁶À sã kpá, zaakũ yã tìkisiin mani oárɛ, yã dↄ̀rↄde mɛ́ ani bo ma lɛ́n.

⁷Zaakũ ma lɛ́ dì yãpura o, ma zã yã vãnigu.

⁸Yã kũ ò da ma lɛ́nnↄn mana, ń ke manafiki ke sãtɛna vĩro.

⁹À súsu asãnsĩnidenↄnɛ pínki, à zɛ́ vĩ gbɛ̃ kũ ò dↄ̃na vĩnↄnɛ.

¹⁰À ma lɛ́damma sɛ́ de andurufula, à dↄ̃na sɛ́ de wura manala.

¹¹Zaakũ ↄ̃ndↄ̃ bɛ̀ɛrɛ vĩ de gbɛ̀ bɛ̀ɛrɛdenↄla, pↄ́ke ni kúmma kũ à kà a ũro.

¹²Makũ ↄ̃ndↄ̃ má laakari vĩ, má yãkɛna a zɛ́a dↄ̃na vĩ.

¹³Vĩnakɛna Dikirinɛɛmɛ zãna yã vãnigu ũ. Ma zã zĩdabinan kũ ĩadãnaao kũ kunna vãnio kũ yãlɛkpɛrɛ'onaao.

¹⁴Lɛ́damma kũ fayayãkɛnaao bi ma pↄ́mɛ, ma kĩnaan gbãna dì bon kũ asãsĩnio.

¹⁵Kínanↄ dì kpata ble ma gãimɛ, kpatablerinↄ dì yãzɛde ditɛ kũ ma gbãnao.

¹⁶Gbãnadenↄ dì iko kɛ ma gãimɛ kũ andunia kpatadenↄ ń pínki.

¹⁷Má ye gbɛ̃ kũ ò yemainↄi, gbɛ̃ kũ òdi ma wɛtɛnↄ mɛ́ òdi ma e.

¹⁸Aruzɛkɛ kũ gakurio kú ma ↄĩ kũ ↄgↄda karanaao kũ kunna nnao.

¹⁹Nɛ́ kũ madì ińnɛ sã̀na de wura manala, karana kũ madì kɛńnɛ de andurufu swáswala.

²⁰Má tɛ́ yã mana zɛ́n, madì táa o zɛ́ súsu gũn.

²¹Madì gbɛ̃ kũ ò yemainↄ gba pↄ́, madì ń aruzɛkɛkatɛkinↄ pańnɛ.

²²Dikiri ma kɛ a zĩ naanagↄrↄa, ari àgↄ̃ gɛ́ yã kũ à kɛ̀ zaa káakunↄ kɛ.

²³À ma ditɛ zaa káakumɛ, zaa a naana gↄrↄa, de adi andunia kɛ kↄ̀ro.

²⁴À ma i zaade ísira kunlo, ísɛ̃boki ke kun gↄrↄ kũ̀aro.

²⁵À ma i kpinↄ ã, ari àgↄ̃ gɛ́ sĩ̀sĩnↄ zĩni pɛ́tɛ,

²⁶ari àgↄ̃ gɛ́ andunia kátɛ, ke sɛ̃̀ntɛ ke bùsu wɛ́n do.