YAASINƆ 6:6-28

⁶Mɛade, ǹ gá zɛ̀nↄ gwa, ǹ a yãkɛna tàasi kɛ, nɛ́ ↄ̃ndↄ̃ kũ.

⁷À dↄn'aɛdee vĩro, à gbɛ̃nsi ke dii vĩro.

⁸È kũsãɛ zi di kwɛɛmɛ, è a pↄ́blee kakↄ̃a pↄ́kɛ̃gurↄ.

⁹Mɛade, nɛ́gↄ̃ daɛna ai bↄrɛmɛ? Bↄrɛn nɛ́ vu iin?

¹⁰Nɛɛ̀ kámma bo féte nɛɛ̀ ii o féte, nɛɛ̀ daɛ féte ↄkpana n kùsɛa.

¹¹Takaasi é gɛ̃nzi lán kpãi wɛ́ɛdewɛ bà, pↄ́kɛ̃sãmmana é summa lán gbɛ̃ kɛ̀ gↄ̃kɛbↄ kũna bà.

¹²Gbɛ̃ntee pãa nɛ́ gbɛ̃ zaaamɛ, ègↄ̃ lili oo kↄ̃n ɛgɛɛo da à lɛ́n.

¹³È yã o kↄ̃n wɛ́ɛo kↄ̃n ↄↄo, è sèeda kɛńnɛ kↄ̃n gbáo.

¹⁴Mↄnafiki bé à à nↄ̀sɛ pana, yã zaa wàarin ègↄ̃ paa gurↄ píngi.

¹⁵Beee yãnzin mↄ́nzi é mↄ́a lɛ́zana sai, kaatɛna é gɛ̃zi kãndo, eégↄ̃ fɛɛna vĩro.

¹⁶Yã mɛ̀n swɛɛdoo kuu kɛ̀ Dii zàn, à kà se swɛɛplaa kɛ̀ dɛnɛ tɛ̃̀ ũ.

¹⁷Wada, ɛgɛtona, taarisaide dɛna,

¹⁸yã pãsĩ wàaripana, wãna zaaazi,

¹⁹sèeda ɛgɛtona kↄ̃n danɛnↄ dↄkↄ̃anao.

²⁰Ma nɛ́, ǹgↄ̃ n de yãdiɛnanↄ kũna, ǹton pã kpá n da yãdannɛziro.

²¹Ǹgↄ̃ kũna n swɛ̃̀ guu, ǹgↄ̃ dana kã̀mbɛɛ ũ.

²²Eé dↄnnɛ aɛ n táa'ona guu, eé n dãkpa n daɛna guu. Tó n vu, eé lɛ́ damma.

²³Zaakɛ yãdiɛna pìnↄ nɛ́ fitiamɛ, yãdannɛna pì nɛ́ gupuraamɛ, lɛ́damma kↄ̃n totonao nɛ́ zɛ́ wɛ̃̀ndideemɛ.

²⁴Eé n sí nↄgbɛ̃ zaaa ↄzĩ, eé n bↄ gbɛ̃ pãnde nↄ yãnnanna'onan.

²⁵Ǹton à maakɛɛ ni dɛro, ǹton tó à wɛ́ɛkpãntɛ̃daɛnzina n kũro.

²⁶Kaarua è tó ń gↄ̃ kori, gbɛ̃ pãnde nↄↄ sↄ̃ è ń wɛ̃̀ndi bɛ̀ɛdee kaatɛ.

²⁷Tó gbɛ̃ tɛ́ sɛ̀ à dà a pↄtɛ, à pↄ́kãsãa é gí tɛ́ kũziↄ́?

²⁸Tó gbɛ̃ kɛ̀sɛ pɛ̀ɛ tɛ́yↄ̃a, eé gí à kpataziↄ́?