Än Salomon Fos 6:6-28

⁶Kopwe feila ren ekewe molus, en chon chipwang. Kopwe ekieki usun ar angang pwe kopwe tipachemela.

⁷Esap wor ar samol, esap pwal wor ar meilap ika ar sounemenem,

⁸nge ra amolätä ener lon fansoun pwichikar o ionifengeni ener mongö lon fansoun räs.

⁹Ifa langatamen fansoun om kopwe chök konola won kiom, en chon chipwang? Inet kopwe pwätä seni om möür?

¹⁰Ka apasa, “Üpwe chök ekis möür, üpwe ekis kamwöchüfengeni pei o ekis asösö.”

¹¹Ren ei wöüngau me osupwang repwe toruk usun eman chon solä a feito fän an pisekin afeiengau.

¹²Eman aramasangau mi lomotongau a fetalfeil o eäni kapas rikirik,

¹³a ächiki mesan o farikeri chienan ren pechen me pöün,

¹⁴nge lon lelukan mi rikirik a chök ekiekietä föför mi ngau, iteiten fansoun a efisätä tipefesen.

¹⁵Iei mine riaföü epwe müttir tori, lon eu chök otun epwe feiengau, nge esap chüen tongeni pöchökülsefäl.

¹⁶Mir wor fisu föför ewe Samol mi Lapalap a oput, esap fokun tipeeu ngeni:

¹⁷Wolamalamtekia, kapas chofana, pau mi niela aramas esap wor ar tipis,

¹⁸eu leluk mi ekiekietä föför mi ngau, peche mi müttir sä ngeni föför esepwüng,

¹⁹eman chon pwärätä mi chök apasätä kapas chofana me eman mwän mi afisätä fitikoko lefilen pwipwi.

²⁰Nei, kopwe aleasochisi mine semom a eäni allük ngonuk, nge kosap manlükala mine inom a aiti ngonuk.

²¹Kopwe amwöchünükü ar kewe kapas iteiten fansoun, kopwe iseniir lon lelukom.

²²Repwe emwenuk, lupwen kopwe fetal, repwe tümwünüuk, lupwen kopwe konola, nge lupwen kopwe pwätä, repwe fos ngonuk.

²³Pun mine ra öüra ngonuk a usun chök eu lamp, ar kewe kapasen kait a usun chök eu saram, nge ar kewe kapasen fön fän iten emirit, iei ewe alen manau.

²⁴Ekei kapas repwe tümwünuk seni ewe fefin mi ngau, pwal seni meseniawen eman fefin mi lüangau.

²⁵Kosap ekieki liöchün neminewe lon lelukom, kosap pwal tup ren nennen mesan.

²⁶Eman mwän a tongeni möni eman fefin mi amömö inisin ren ükükün liwinin efoch pilawa, nge mön eman fin lisowu mi fen wor pwülüan epwe püsin manauen ewe mwän.

²⁷Ifa usun, eman mwän a tongeni uwei ekkei fän mwärin, nge üfan esap kar ren?

²⁸Ika ifa usun, eman a tongeni fetal won moochen ekkei mi sarara, nge pechen esap poi?