YAASINƆ 26:1-17

¹Lán legũsisina de nà sakare kesↄ̃ lán legũmana de nà pↄ́kɛ̃gↄrↄa, lɛn gakuri dí kↄ̃ sí kũ yↄ̃nkↄoro lɛ.

²Lákũ bãntoro kũ ludakibɛbãoo dìgↄ̃ vuravura à gɛ́ la à su gwe nà, lɛn gbɛ̃kana pã dì pↄ́ke boḿmaro lɛ.

³Gése bi sↄ̃ pↄ́mɛ, bà bi zaaki pↄ́mɛ, yↄ̃nkↄ pↄ́n gò ũ a kpɛa.

⁴Ǹsun we yↄ̃nkↄa a fayasarikɛaro, de ǹsun gↄ̃ lán a bàro yãi.

⁵Ǹ yã we yↄ̃nkↄa a fayasarikɛ lɛ́n, de àsun a zĩda gwa ↄ̃ndↄ̃de ũro yãi.

⁶Tó n lɛ́gbãzã kɛ̀ yↄ̃nkↄ gãi, n n zĩda yàkamɛ, n yã wɛ̀tɛ n zĩdanɛ.

⁷Yáasi kũ à kú yↄ̃nkↄ lɛ́n de lán ɛrɛ gbá kũ àtɛn gbãkɛ bàmɛ.

⁸Bɛ̀ɛrɛlina yↄ̃nkↄnɛ de lán gbɛ̀dana gbɛ̀mban bà.

⁹Yáasi kũ à kú yↄ̃nkↄ lɛ́n de lán lɛ̀ kũ à dana wɛ̃dɛri ↄĩ bàmɛ.

¹⁰Gbɛ̃ kũ à yↄ̃nkↄ ke gbɛ̃ kũ àtɛn gɛ̃tɛ dà zĩn de lán tofekari kũ àdi nↄ̀bↄ sĩnda pínki gbã bàmɛ.

¹¹Yↄ̃nkↄ ɛrana a yãfayasarikɛnaaa de lán gbɛ̃da kũ à ɛ̀ra à a pisi blèe bàmɛ.

¹²N gbɛ̃ kũ à a zĩda dìtɛ ↄ̃ndↄ̃de ũ è yá? Yↄ̃nkↄ sã̀na deala.

¹³Ma'ãde dì pi: Músu kú zɛ́mmɛ, nↄ̀bↄ pãsĩ tɛ́ batun.

¹⁴Lákũ gbàa dìgↄ̃ yĩgã a asigbeaa nà, lɛn ma'ãde dìgↄ̃ litɛlitɛ a wútɛkia lɛ.

¹⁵Ma'ãde dì ↄ da tan à fu pↄ́blelinaa à da a lɛ́n.

¹⁶Ma'ãde dìgↄ̃ da a ↄ̃ndↄ̃ de yãwemmadↄ̃ri gbɛ̃nↄn supplanↄla.

¹⁷Gbɛ̃ kũ à vĩ̀ à pɛ̀tɛ dakenↄ ledikpanan de lán gbɛ̃ kũ à gbɛ̃da kũ̀ a sãaa bà.