YAASINƆ 24:3-22

³Ɔ̃ndↄ̃n òdi bɛ pɛ́tɛo, laakarii dì tó àgↄ̃ arubarika vĩ.

⁴Dↄ̃naan òdi pↄ́ káo kpɛ́nↄ pa kũ aruzɛkɛ mana bɛ̀ɛrɛdeo.

⁵Ɔ̃ndↄ̃de gbãna dìgↄ̃ karamɛ, dↄ̃̀ri ikoo dìgↄ̃ gɛ́ arɛmɛ.

⁶Baaruu dì tó ò zĩ̀ asãnsĩni dↄ̃, tó yãkɛkɛrinↄn dasi, àdi tó ò zĩ̀ ble.

⁷Ɔ̃ndↄ̃ lei de fayasaridela, lakutu kↄ̃kakaranaa gũn a lɛ́ dìgↄ̃ nakↄ̃anamɛ.

⁸Gbɛ̃ kũ àdigↄ̃ vãnikɛnnɛna laasun vĩn òdi a sísi manafikide.

⁹Yãfayasari wàaripana bi durunnamɛ, gbɛ̃ke dìgↄ̃ ye lalandikɛriiiro.

¹⁰Tó n mɛ̀busɛɛ kɛ̀ warikɛgↄrↄa, n gbãna zↄ̃kↄ̃ro.

¹¹Ǹ gbɛ̃ kũ ò mìi pɛ̀ gaanↄ sura ba, ǹ gí gbɛ̃ kũ ò sòro òtɛn si kakatɛnannↄnɛ.

¹²Tó n pì: O'o, ó dↄ̃ yãro fá, Luda kũ à nɛ̀sɛgũnyã dↄ̃ ni eroo? N wɛ̃̀ndi Gwàri a yã dↄ̃, ani fĩna bo baadinɛ a yãkɛnaaamɛ.

¹³Ma nɛ́, ǹ zↄ́ ble, zaakũ à mana, zↄ́sa dì kɛ lɛ́nɛ nna.

¹⁴Lɛn ↄ̃ndↄ̃ dì kɛ gbɛ̃nɛ nna a nɛ̀sɛn lɛ. Tó n ↄ̃ndↄ̃ kũ̀, ĩnigↄ̃ zia vĩ, tãmaa ni n nɛro.

¹⁵Dàde, ǹsun gbɛ̃ mana ↄn kpákparo, ǹsun a bɛ pↄ́nↄ wararo.

¹⁶Bee tó gbɛ̃ mana lɛ̀tɛ gɛ̃̀n suppla, àdi ɛra à futɛmɛ, yãvãnikɛrinↄ sↄ̃, kisira dì ń fu.

¹⁷Tó n ibɛrɛ lɛ̀tɛ, ǹsun pↄnna kɛro, tó à fù, ǹsun à yáa dↄro.

¹⁸Tó Dikiri è lɛ, ani kɛnɛ nnaro, a pↄfɛ̃ ni were n ibɛrɛɛ pìiamɛ.

¹⁹Ǹsun tó gbɛ̃ vãninↄ yã n kũ gbãnaro, ǹsun yãvãnikɛrinↄ gwena ni dɛro,

²⁰zaakũ gbɛ̃ vãni nigↄ̃ zia vĩro, Luda ni yãvãnikɛrinↄ fitila tɛ́ dɛ.

²¹Ma nɛ́, ǹ vĩna kɛ Dikirinɛ kũ kínao, ǹsun gbɛ̃nna kpá kũ gbɛ̃ kũ ò bò ń kpɛnↄoro,

²²zaakũ yã ni ń le kãntomɛ. Dí mɛ́ à dↄ̃ lákũ oni ń ásaru kɛ nàa?