HEREVA LADA-ISIDIA 24:3-22

³Aonega ai ruma e hadaiamu; lalo-parara ai e haginiamu;

⁴aonega ai ena daiutu na dava bada kohudia bona kohu namodia iboudiai amo e honumu.

⁵Aonega tauna ese goada tauna e hereaiamu, bona mai dibana tauna ese mai goadana tauna e hereaiamu;

⁶badina be hahekau mai aonegana amo emu tuari ba goadalaia, bona hahealo taudia hutuma daidiai ba kwalimu.

⁷Aonega na atai ai, kavakava tauna na basine davaria diba; hanua ikoukouna ai ia na se herevamu.

⁸Kara dika ikarana e laloa hatamu tauna na hahedika tauna bae gwauraia.

⁹Kara kavakavadia ilalo-hatadia na kerere, bona ḡonaḡona tauna na taunimanima ese bae inai henia bada.

¹⁰Hekwakwanai dinana ai boma manoka-manoka, emu goada na maraḡi-maraḡi.

¹¹Mase dalana ai e laohaidiamu taudia na ba hamauridia; mase gabuna ai e dedi dobimu taudia na ma ba veridia lou.

¹²Boma toma “A itaia, ina na do asia dibaia”, lalo e dibaiamu Diravana ese se itaiamu a? Laumamu e gimaiamu Diravana na asi dibana a? Ia ese taunimanima davadia na edia ḡaukara heḡereḡeredia ai baine henidia, ani?

¹³Natugu e, bada-ranuna bavania, badina be ia na namo; labolabo edia ruma amo e hetuturumu ḡauna na mai gaihona udumu ai.

¹⁴Ba diba, aonega na unuheto, laumamu enai; boma davaria, vaira dinadia be dounu, bona emu helaro na basine doko.

¹⁵Basio bani tao, kara dika tauna ese kara maoromaoro tauna ena ruma e bani henia taomu na heto; ena ruma na basio ḡiḡia dobi.

¹⁶Badina be kara maoromaoro tauna na nega hitu e ketomu, ma e tore isimu; a kara dika taudia na hahehisi karadia ese e doridia dobimu.

¹⁷Oi inaimu e ketomu negana ai na basio hisi dae; e hetutuhimu negana ai na lalomu basine moale;

¹⁸Iehova ese baine itaia, bena baine badu, bona ena badu na iena amo baine abia oho na garina.

¹⁹Lalomu basine hekwarahi kara dika taudia daidiai, bona kara havara taudia basio vaḡeḡe henidia;

²⁰badina be kara dika tauna enai vaira dinadia na dia mimia; bona kara havara tauna ena lamepa na baine bodo.

²¹Natugu e, Iehova bona hanua pavapavana na garidia ba gari, bona idia ta basio gwau edeede henia;

²²baduna be idia edia amo hahebua-tari baine hedinarai taku. Daika dibana dahaka hahedika na idia raruosi edia amo bainema?