YAASINƆ 13:1-18

¹Nɛ́ ↄ̃ndↄ̃de dì a de lɛ́damma ma, lalandide dì gí kpãkɛ̃naai.

²Lɛ́gbɛ nna dì gbɛ̃ ká pↄ́ manaa, náanisaride dì ble a pãsĩ gũmmɛ.

³Gbɛ̃ kũ àdi a lɛ́ kũ dì a wɛ̃̀ndi dãkpã, gbɛ̃ kũ a lɛ́ dì kúro dì a zĩda yaka.

⁴Ma'ãde dì pↄ́ kũ à yei lero, aniade sↄ̃ àdi nna ma.

⁵Gbɛ̃ mana zã̀ manafikiyãn, gbɛ̃ vãni dì wé'i daḿma àdi ń kpe bo.

⁶Manakɛnaa dì taarisaride sura ba, vãnikɛnaa dì durunnakɛri litɛ kpɛdangara.

⁷Gbɛ̃kenↄ dì ń zĩda ditɛ aruzɛkɛde ũ, ama òdigↄ̃ pↄ́ke vĩro. Gbɛ̃kenↄ dì ń zĩda ditɛ takaside ũ, ama òdigↄ̃ pↄ́ vĩ zↄ̃kↄ̃.

⁸Aruzɛkɛde dì a zĩda bo kũ a aruzɛkɛkɛo, takaside sↄ̃ àdi wɛ́tãmmana lero.

⁹Gbɛ̃ mananↄ gupura dìgↄ̃ puna, gbɛ̃ vãninↄ fitilaa dì gaḿma.

¹⁰Zĩdabinaa dì fìti da, lɛ́dammamana dì tó ò ↄ̃ndↄ̃ kũ.

¹¹Ɔgↄ vãni dì gɛ́ arɛro, ↄgↄ kũ ò lè ísimma gũn sↄ̃ àdi kↄ̃.

¹²Wɛ́dↄinaa gìkɛnaa dì ń nɛ̀sɛɛ yaka, pↄ́ kũ ò yei lenaa dì su kũ wɛ̃̀ndi dufuo.

¹³Gbɛ̃ kũ àdi yã daro ni yã le, gbɛ̃ kũ àdi yã ma ni àre le.

¹⁴Ɔ̃ndↄ̃de yãdannɛnaamɛ ísɛ̃boki wɛ̃̀ndide ũ, àdi ń bo ga bàn.

¹⁵Wɛ́zɛ̃ mana dì tó gbɛ̃ dakarɛ mìnnao, ama náanisaridenↄ zɛ́ pãsĩ.

¹⁶Laakaridenↄ dì yã kɛ kũ dↄ̃naao, yↄ̃nkↄ dì a fayasarikɛ mↄńnɛ.

¹⁷Zĩ̀ri vãni dì gɛ̃ yãn, ìba náanide dì su aafia.

¹⁸Gina foruii dì su kũ takasio kũ wé'io, lɛ́dammamanaa dì bɛ̀ɛrɛ líńnɛ.