Tinata Valavalar 13:1-18

¹A bul ba i kabinana i kapupi ra varvateten kai tamana, Ma ga ra tena varkulumai pa i nuk pa ra varpit.

²A tutana na en ra boina ure ra vuai ra ngiene, Ma ra tena vavagu i mainge ke ra vakavakaina.

³Nina i mono bat ra ngiene i vatur vake kana nilaun, Ma ga nina i manga tak ra ngiene na virua.

⁴A bala i ra tabauma i mamainga, ma pa i vatur vake ta magit, Ma ra bala i ra umana tena ongor na ti maur boko.

⁵A takodo na tutana i milikuane ra vaongo, Ma ga ra kaina tutana i milmilikuan ma i vuna ta ra vavirvir.

⁶A mangamangana takodo i mono bat nina ba i dovot kana mangamangana, Ma ra bilak na mangamangana i vue pukue vue ra tena varpiam.

⁷Tikai i malamala uviana ma pa i vung ta magit; Ta ra tikai i malamala luveana ma i vung ra peal magit.

⁸A tutana i varkul ure kana nilaun ma kana ngala na tabarikik, Ma ra luveana pa da vaununge.

⁹A kapa kai ra umana tena takodo i manga birao, Ma ra lamp kai ra umana tena varpiam da pun ia.

¹⁰A papait na luluai i vuna ta ra varngangar, Ma ra kabinana i ki pire diat dia matoto.

¹¹A tabarikik ba di lu varurue ma ra mangamangana vakuku na panie mulai, Ma ra magit di vatur vake ure ra papalum na ngala vanavana.

¹²A bala i diat dia vala ki ung upi ta magit i papait na tabulbulu, Ma ba da vatur vake kada mamainga i da ra davai na nilaun.

¹³Nina i pidimuane ra tinata i vakaina mule, Ma ga nina ba i ru ra vartuluai na vatur vake ra vapuak.

¹⁴A vartovo kai ra umana tena kabinana i da ra mata na nilaun, Upi da laun kan ra lavur palai na minat.

¹⁵Da manamanane ra bo na minatoto, Ma ga ra nga kai ra umana tena vavagu i dekdek ika.

¹⁶A tarai par ba dia matoto dia papalum ma ra kabinana, Ma ga ra lunga i vaarike vurvurbingitane ra magit na papaua.

¹⁷A kaina vilavilau i bura ta ra kaina, Ma ga ra dovot na tultul i valavalaun.

¹⁸A kini na luveana ma ra vavirvir dir a tadav nina ba na piam vue ra varvarteten, Ma ga nina ba na nuk pa ra varpit da ru ia boko.