YAASINƆ 10:1-30 - Luda yã takada kũ Bisã yão

YAASINƆ 10:1-30

Click on verse(s) to share them!

¹Nɛ́ ↄ̃ndↄ̃de dì tó a de pↄ kɛ nna, nɛ́ yↄ̃nkↄ dì a da nɛ̀sɛɛ yakanɛ.

²Ɔgↄ vãni dì àre kɛro, yãkɛna a zɛ́a dì ń sí ga ↄĩ.

³Dikiri dì tó nà gbɛ̃ mana dɛro, àdi yãvãnikɛrinↄ tɛ̃ pↄ́ kũ ò yeii.

⁴Ɔ ma'ãde dì su kũ takasio, zĩkɛna ↄplapla mɛ́ àdi su kũ aruzɛkɛo.

⁵Nɛ́ kũ àdi pↄ́wɛ kakara sakare bi laakaridemɛ, nɛ́ kũ àdi i o pↄ́kɛ̃gↄrↄ wé'i vĩro.

⁶Gbɛ̃ mana mìi dìgↄ̃ arubarika vĩ, yã pãsĩ dì yãvãnikɛri lɛ́ pa.

⁷Gbɛ̃ mana dì ga kũ a tↄ́oro, yãvãnikɛri tↄ́ dì kakatɛmɛ.

⁸Ɔ̃ndↄ̃de dì zĩ kɛ yãditɛnanↄa, yãbↄtɛri dì a zĩda nɛ.

⁹Gbɛ̃ kũ àdi yã kɛ a zɛ́a kú a laakariia, yãvãnikɛri yã ni bo gupuraa.

¹⁰Gbɛ̃gwana kũ wɛ́doo dì su kũ yão, gbɛ̃ kũ àdi yã utɛ a nɛ̀sɛɛ gũnlo mɛ́ àdi ibɛrɛ mì dɛ.

¹¹Gbɛ̃ mana lɛ́ bi ísɛ̃boki wɛ̃̀ndidemɛ, yã pãsĩ dì yãvãnikɛri lɛ́ pa.

¹²Zãngu dì fìti da, yenyĩ dì lá kútɛ taari sĩnda pínkila.

¹³Ɔ̃ndↄ̃ yã dìgↄ̃ kú laakaride lɛ́n, flã̀an fayasaride pↄ́ ũ a kpɛa.

¹⁴Ɔ̃ndↄ̃rinↄ dì dↄ̃na zĩ di, laakarisaride lɛ́ dì a kakatɛ araga.

¹⁵Ɔgↄde aruzɛkɛ dìgↄ̃ denɛ lán wɛ̃tɛ bĩnide bà, takaside takasi sↄ̃ àdi a kakatɛ.

¹⁶Gbɛ̃ mana láada dì sunɛ kũ wɛ̃̀ndiio, yãvãnikɛrii àree dì wɛ́tãmma inɛ.

¹⁷Gbɛ̃ kũ àdi lɛ́damma ma dì wɛ̃̀ndi zɛ́ mↄ́ńnɛ, gbɛ̃ kũ àdi pã kpá foruii dì ń sãtɛ.

¹⁸Gbɛ̃ kũ àdi zãngu utɛ bi ɛ́kɛdemɛ, gudɛri bi yↄ̃nkↄmɛ.

¹⁹Yã dasi bↄtɛnaa dìgↄ̃ durunna sariro, gbɛ̃ kũ àdi a lɛ́ kũ bi laakaridemɛ.

²⁰Gbɛ̃ mana nɛ́nɛ de lán andurufu swáswa bà, yãvãnikɛrii nɛ̀sɛɛ bɛ̀ɛrɛ vĩro.

²¹Gbɛ̃ mana yã'onaa dì gbɛ̃ dasinↄ da zɛ́a, laakarisaride dì ga fayasarikɛ gũmmɛ.

²²Dikiri arubarikaa dì ń kɛ aruzɛkɛde ũ, zĩkɛna kũ wario dì pↄ́ke kararo.

²³Vãnikɛna de yↄ̃nkↄnɛ kↄ̃kↄ̃yã ũ, ↄ̃ndↄ̃ dì kɛ laakaridenɛ nna.

²⁴Yã kũ yãvãnikɛri tɛn vĩna kɛnɛ mɛ́ ani a le, Luda ni pↄ́ kũ gbɛ̃ mana yei kpáa.

²⁵Tó zàga'ĩa kàka à gɛ̃̀, yãvãnikɛrinↄ dìgↄ̃ kun doro, gbɛ̃ mana zĩni dìgↄ̃ pɛtɛna gↄrↄ sĩnda pínki.

²⁶Lákũ lemu kpã̀kpãa dì kɛ sakaanɛ nà, lákũ túsukpɛ dì kɛ wɛ́nɛ nà, lɛn ma'ãde de lɛ gbɛ̃ kũ ò a zĩ̀nↄnɛ.

²⁷Vĩnakɛna Dikirinɛ dì wɛ̃̀ndi gbã̀na kara, yãvãnikɛrinↄ sↄ̃, ń wɛ̃̀ndi nigↄ̃ kutumɛ.

²⁸Gbɛ̃ mananↄ wɛ́ dìgↄ̃ dↄ pↄnnai, yãvãnikɛrinↄ sↄ̃, wɛ́dↄina ni ń nɛ.

²⁹Dikiri zɛ́ de utɛki ũ gbɛ̃ mananↄnɛ, yãvãnikɛrinↄ sↄ̃, àdi ń kakatɛmɛ.

³⁰Oni gbɛ̃ mana futɛ a gbɛ̀n zikiro, gbɛ̃ vãni sↄ̃ ani vutɛki e bùsunlo.