MUDENNIMÙ 15

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

¹Mɔyiisi nɛ̀ Isidɑyɛɛribɛ kɛ̀ bɛ̀ɛ dentɛ̀ fɛyɛ̀nfɛ̀ fiɛ nkɛ́sɑ̃ntɛnɛ̀ ti Yiɛ̀ nKuyie nkɛ dɔ̀: M bo ndiè nkɛ sɑ̃ntí ti Yiɛ̀ nKuyie, kù bɛnkɛmɛ̀ ku wɛ̃rímú dɛumɛ̀, kɛ diu ntɛsɑ̃ntɛ̀ nɛ̀ tɛ dèètì kɛ̀ dɛ̀ pɔ̃ntɛ́ dɑ̀mɛ́ɛ̀rì miɛkɛ.

²Ti Yiɛ̀ nKuyie nkuù tu n wɛ̃rímú n yó ndiè nkɛ ku nsɑ̃ntí, kuù n dɛɛtɛ́, kuù n te, n yó nku ndonti, n cicɛ do ku ntũ, n yó ndɛ́úkùnko kuù yètìrì.

³Ti Yiɛ̀ nKuyie ntú okpɑ̀rì nwe, kɛ sɑ̀nnɛ̀ o yètìrì.

⁴Kuù dìu nhokpɑ̀ɑ̀tì kpɑ̀rìsɛ̃ĩ́ nɛ̀ o ɑ̃ɑ̃pɔ̀mbɛ̀ dɑ̀mɛ́ɛ̀rì miɛkɛ kuù duɔ́ nkɛ̀ iwɛ̃ĩ yɛmbɛ̀ pɔ̃ntɛ́ tipèntì kóo dɑ̀mɛ́ɛ̀rì miɛkɛ.

⁵Kɛ̀ dɑ̀mɛ́ɛ̀rì fũ̀ɔ̃̀ kó mɛniɛ mbɛ̀ dɑ̀tínnɛ́, kɛ̀ bɛ̀ dìu kɛ cùtóo ditɑ̃́rì kɔ̃mɛ.

⁶Ti Yiɛ̀ nKuyie nhɑ kpeńnìmu, Ti Yiɛ̀ nKuyie nfɔ̃́ɔ̃̀ kèkíí ɑ dootitɔbɛ̀.

⁷A kó tikpetì tiì te kɑ̀ɑ nɑ ɑ dootitɔbɛ̀, kɑ̀ɑ miɛkɛ kó muhɑ̃ɑ̃́ mbɛ̀ cɔ̀útɛ́ timúkpetì kɔ̃mɛ.

⁸Kuyie fɔ̃́ɔ̃̀ wei kɛ̀ mɛniɛ nkpɛ̃̀ńnɛ́ kɛ̀ yɛnɛ́fĩ̀nfĩ̀rɛ̀ nɑɑ́ nyiduotí, kɛ còḿmú kɛ tɛ̃́nkɛ í pũɔ̃̀.

⁹Ti dootitɔbɛ̀ do nɑ́ɑ́mmu kɛ tú: Ti bo bɛ̀ tũ̀nnɛ kɛ́ bɛ̀ nìntɛ, kɛ́fekɛ bɛ kpɛrɛ, kɛ́di kɛ́nsɑ̀nnɛ̀. Ti bo kpɑtɛ ti se kɛ́ bɛ̀ kùɔ bɛmɔu.

¹⁰Kuyie nkɑ̀ɑ wei kɛ̀ dɑ̀mɛ́ɛ̀rì bɛ̀ dɑ̀tínnɛ́, kɛ̀ bɛ̀ dìu kɛ cùtóo dibiɛrìmínnì kɔ̃mɛ mɛnɛ́kperímɛ̀ cuokɛ̀.

¹¹We mbo kɛ dɑ dònnɛ̀ fɔ̃́ nti Yiɛ̀ nKuyie? Kɛ dò mpɑ́íí, kɛ kpɑ mɛyɛi nkɛ kpeńnì, kɛ dɔɔri tidiɛtì kɛ̀ bɛ̀ ò dé. Fɔ̃́ɔ̃̀ nɔ nkɛ dɔɔri tidiɛtì.

¹²Kuyie nfɔ̃́ɔ̃̀ yòùtɛ ɑ nɔ̀ùtɛ̀ mɛ̀mɑ́ɑ̀ kɛ̀ kɛtenkɛ̀ bɛ̀ mɑɑ́nko.

¹³Nɛ̀ ɑ kó mɛsɑ̀ɑ̀ nkɛ niitɛ́ ɑ nìtìbɛ̀ ɑ dontɛ́ bɛ̀ nɛ̀ ɑ wɛ̃rímú, kɛ bɛ̀ kɔ̀rinɛ̀ ɑ tenkɛ̀ sɑ̀ɑ̀kɛ̀.

¹⁴Kɛ̀ bɛnìtìbɛ̀ tì kèè kɛ̀ bɛ̀ kɔ̃̀ntì ɑu, kɛ̀ Fidisitɛ̃ɛ̃bɛ kɔ̃m̀bùɔ̀tì duò.

¹⁵Kɛ̀ Edɔmmu kó bɛkpɑ̀ɑ̀tìbɛ̀ yĩ̀ɛ̃̀kù, kɛ̀ kufɔ̃wɑɑ́ mpĩ Mɔɑbu kó bɛkpɑ̀ɑ̀tìbɛ̀, kɛ̀ Kɑnnɑhɑ̃ɑ̃ kɔbɛ kɔ̃̀ntì yɑ̃rikɛ.

¹⁶Kufɔ̃wɑɑ́ ndiɛkù nɛ̀ kukɔ̃m̀bɔ̀dorí kɛ̀ dɛ̀ bɛ̀ ɑutɛ́. A nɔ̀ùtɛ̀ kpeńnìmu tɛɛ̀ te kɛ̀ dɛ̀ bɛ̀ kpeí, kɛ bɛ̀ dò nkɑ́rɛ́, kɛ kémmúnɛ̀ ɑ nìtìbɛ̀ bo pɛ̃ɛ̃tɛ́mɛ̀, ɑ nìtìbɛ̀ ɑ dontɛ́ bɛ̀.

¹⁷Kɑ̀ɑ bɛ̀ kɔ̀rinɛ̀ ɑ tɑ̃rì ĩ́nkɛ̀, kɛ bo bɛ̀ kɑ̀nnɛ ɑ ɑ̃ dɛ̀. Ti Yiɛ̀ nKuyie nfɔ̃́ɔ̃̀ tũ̀ntɛ dikɑrì ɑ yó mborɛ̀, nɛ̀ ɑ nɔ̀ùtɛ̀ ntɛ ɑ mɑɑ́mɛ̀ ɑ cĩ́ɛ̃̀tɛ̀.

¹⁸Ti Yiɛ̀ nKuyie nfɔ̃́ɔ̃̀ yó ntú okpɑ̀ɑ̀tì sɑ̃́ɑ̃̀.

¹⁹Okpɑ̀ɑ̀tì sɛ̃ĩ́ nɛ̀ o kpɑ̀rìsɛ̃ĩ́ nɛ̀ si dèèbɛ̀ dɛ̀ dìu dìì mɔ̀nnì mɛniɛ, kɛ̀ ti Yiɛ̀ nKuyie nduɔ́ nkɛ̀ dɛ̀ɛ pɔ̃ntɛ́, kɛ̀ Isidɑyɛɛribɛ biɛ séntɛ́ bɑ́ bɛ nɑɑ̀cɛ̀i í bùútɛ́.

²⁰Kɛ̀ Midiyɑmmu, Anɔɔ tɑ̃ũ̀ Kuyie mpɑ̃ɑ̃nɑ́ɑǹtì nɑ́ɑǹtò túótɛ́ dibɑ̀rì kɛ̀ Isidɑyɛɛribɛ kó bɛnitipòbɛ̀ bɛmɔuu ò tũ̀nnɛ, kòo mbie nkɛ̀ bɛ̀ ɑu.

²¹Kòò dìè nkɛ tú: Nsɑ̃ntínɛ̀ ti Yiɛ̀ nKuyie kù bɛnkɛmɛ̀ ku wɛ̃rímú dɛumɛ̀, kɛ duɔ́ nkɛ̀ tɛsɑ̃ntɛ̀ dìu nɛ̀ tɛ̀ dèètì kɛ̀ dɛ̀ pɔ̃ntɛ́ dɑ̀mɛ́ɛ̀rì miɛkɛ.

²²Kɛ̀ Mɔyiisii bɛ̀ íi ntipèntì kóo dɑ̀mɛ́ɛ̀rì kɛ̀ bɛ̀ɛ kétɛ́ kɛ́nwetí dikpɑ́ɑ̀ diɛrì Suudi, kɛ́mmɔkɛ yɛwe yɛ̀tɑ̃ɑ̃ti bɑ́ bɛ̀ í pɛ̀tɛ́ mɛniɛ,

²³kɛ́tuɔkɛ Mɑɑrɑ kɛ́yɑ̀ mɛniɛ mbɛ̀ í nnɑ kɛ mɛ̀ yɑ̃̀, kɛ yɛ̃́ mɛ̀ tiimɛ̀. Mɛ tiiku kpɛ́í nte kɛ̀ bɛ̀ mɛ̀ tu Mɑɑrɑ.

²⁴Kɛ̀ bɛnìtìbɛ̀ ńkpɑnnɛ̀ Mɔyiisi kɛ tú: Ti yóó yɑ̃̀ bɑ?

²⁵Kɛ̀ Mɔyiisii kuɔ́nnɛ̀ ti Yiɛ̀ nKuyie, kɛ̀ kùu ò bɛnkɛ kudɔú mɑkù, kòo kù mɛ̀ú nkɛ̀ mɛ̀ɛ nɑrikɛ. Kɛ̀ ti Yiɛ̀ nKuyie mbɛ̀ duɔ́ nyikuɔ́ kɛ́bɛnkɛ bɛ̀ yó ndɔɔrimɛ̀. Dɛǹdɛ Kuyie mbɛ̀ yɑ̀ɑ́kɛ́mɛ̀,

²⁶kɛ́ bɛ̀ nɑ̀kɛ́ kɛ dɔ̀: Kɛ̀ di kémmú mí ndi Yiɛ̀ nKuyie n kpɛti, kɛ dɔɔri n dɔ́mɛ̀, kɛ kémmú n di nɑ́ɑ́ ntì, kɛ dɔɔri n kuɔ́ yɛ̃mmɛ̀, m bɑ́ɑ́ dì bɔntɛ́ mumɔmmú m bɔntɛ́ mù Esibiti kɔbɛ. Míì tu di Yiɛ̀ nKuyie nkùù di miɛkùnko.

²⁷Kɛ̀ bɛ̀ɛ tuɔkɛ dibòrì mɑrì bɛ̀ tu dì Edimmu kɛ̀ sibií dɛ̀ bo tɛpíítɛ̀ nɛ̀ sìdɛ́sì nɛ̀ dɛpuonnɛ sipísìyiekɛ̀ kɛ̀ bɛ̀ɛ dɛ̀ bɑ̀tɛ́ kɛ́ntɔ́kɛ́nɛ̀ mɛniɛ.