1Ben Musa kↄ̃n Isarailinↄ ń píngi lɛ̀ kɛ̀ sì Diinɛ wà bè: Mɛ́ lɛ̀ sí Diinɛ, zaakɛ à tↄ́ bↄna, à sↄ̃deenↄ kↄ̃n ń sↄ̃nↄ kà ísiaan.
2Dii bé ma gbãaa ũ, mɛ́ lɛ́ maa, àpi bé à ma mì sì. Àmbe ma Luda ũ, mɛ́ à tↄ́ kpá. Àmbe ma de Luda ũ, mɛ́ à tↄ́ sɛ́ lezĩ.
3Dii nɛ́ zĩ̀karimɛ, à tↄ́n Dii.
4À Fili'auna sↄ̃goronↄ kↄ̃n à zĩ̀kpɛɛnↄ kà ísiaan, à zĩ̀kari gbɛ̃nsinↄ vlɛ̃̀ɛ Isia Tɛ̃aan.
5Í lↄ̀dee pì dàńla, aↄ̃ kpàɛ gĩzĩ lán gbɛ̀ bà.
6Dii, n ↄplaan gbãaa kún kↄ̃n bítakɛɛo, Dii, n n ibɛɛnↄ dúgu zↄ̃̀ kↄ̃n n ↄplaao.
7N n zangurinↄ nɛ̀ n gakui bíta guu, n pↄ fɛ̃̀ n ń náɛ lán sɛ̃̀ bà.
8N pↄ́ bↄ̀ n yĩzĩ, ben í zↄ̃̀kↄ̃rɛ, à gↄ̃̀ zɛna lán bĩi bà, ísiaa ì ai a guragura.
9Wa ibɛɛ pìnↄ bè, aↄ̃é pɛ́ɛwazi aↄ̃ wa lemɛ, aↄ̃é wa pↄ́nↄ sɛ́ɛ lán aↄ̃ↄ yezi nà, aↄ̃é ń fɛ̃ɛdaanↄ woto aↄ̃ wa dɛdɛo.
10N n lɛ́'ĩa vù, ben ísiaa dàńla, aↄ̃ kpàɛ lán beoma bà í bíta pìn.
11Dii, tãanↄ tɛ́ à kparee bé à dɛ lán n bà? Dén weé lɛ́kↄ̃zinyo? Yãbↄnsaɛkɛri, n bítakɛɛ adona, n gakui naasi vĩ.
12N n ↄplaa pòro, ben tↄↄtɛ ń mↄmↄ.
13Wamↄwa kɛ̀ n wa bo zↄ̀bleennↄ nɛ́ dↄwe aɛ n gbɛ̃kɛɛ guu, nɛ́ gáwao n bùsun kↄ̃n n gbãaao.
14Tó boriinↄ mà, aↄ̃é lugaluga, Filisitini bùsudeenↄ kù égↄ̃ vĩi.
15Ɛdↄmunↄ kínanↄ é bídi kɛ, swɛ̃̀ é kɛ̃ Mↄabu dↄn'aɛdeenↄn, Kanaa bùsudeenↄ mɛ̀ é yↄ́ ń píngi.
16Vĩa bíta é ń kũ, swɛ̃̀ é kɛ̃ńgu, aↄ̃é gↄ̃ kítikiti lán gbɛ̀ bà n gbãa bíta yãnzi Dii, ai wamↄwa kɛ̀ n wa sɛ n pↄ́ ũunↄ gɛ̃tɛ.
17Dii, nɛ́ gáwao kpiii kɛ̀ ń sɛ̀ n pↄ́ ũu kiia, nɛ́ wa kãsãa pɛ́ɛ guu kɛ̀ ń dìɛ n vɛ̃ɛkii ũun, n kúkii kɛ̀ ń kɛ̀kɛ n zĩndanɛ pì.
18Dii égↄ̃ kí blee gurↄ píngimɛ.
19Kɛ̀ Fili'auna sↄ̃nↄ kↄ̃n à sↄ̃goronↄ kↄ̃n à sↄ̃deenↄ gɛ̃̀ ísiaa guu, ben Dii sù kↄ̃n ío à dàńla, mↄde Isarailinↄ táa ò gukoria ísiaa pì guu.
20Ben annabi Miriamu, Aruna dãre, a sɛ̃gɛ̃sɛ̃gɛ̃ sɛ̀, ben nↄgbɛ̃nↄ bↄ̀ wà tɛ́zi ń píngi, aↄ̃ↄe sɛ̃gɛ̃sɛ̃gɛ̃ paa aↄ̃ↄe ↄ̃ wãa.
21Miriamu lɛ̀ sìńnɛ à bè: À lɛ̀ sí Diinɛ, zaakɛ à tↄ́ bↄna, à sↄ̃deenↄ kↄ̃n ń sↄ̃nↄ kà ísiaan.
22Musa dà zɛ́n kↄ̃n Isarailinↄ, aↄ̃ kɛ̃̀ Isia Tɛ̃aaa aↄ̃ gɛ̃̀ Suru gbáan. Aↄ̃ táa ò gurↄ aagↄ̃ gbáa pìn aↄ̃ↄe í ero.
23Kɛ̀ aↄ̃ kà guu kɛ̀ wè sísi Mara, aↄ̃ↄe fↄ̃ wà à í mìro kɛ̀ à kɛ̀ kyã̀kyã yãnzi. Beee yãnzi wà tↄ́ kpà guu pìnɛ Mara.
24Ben gbɛ̃nↄ zↄka kà Musazi wà bè: Bↄ́n wé mii?
25Musa wii pɛ̀ Diizi, ben Dii lí ↄ̀dↄanɛ. Kɛ̀ Musa lí pì zù ín, ben í pì kɛ̀ nna. Gwen Dii yã dìɛńnɛ kↄ̃n dokao à ń lɛ́ à ń gwá
26à bè: Tó a làakari dↄ̀ mamↄma Dii a Luda yãa ée yã kɛ̀ má yezi kɛɛ, tó a yã kɛ̀ má dìɛnↄ mà, ben á ma dokanↄ kũna píngi, mɛ́ gyãa kɛ̀ má kà Igipitinↄn ke káaguro, zaakɛ mámbe Dii kɛ̀ è a gba aafia ũ.
27Beee gbɛra aↄ̃ kà Ɛlimu, guu kɛ̀ íbↄki mɛ̀n kuri awɛɛplaaanↄↄ kún kↄ̃n damina lí mɛ̀n baaagↄ̃ akurinↄo. Ben aↄ̃ bùra kàɛ í pì saɛ gwe.
