1Hamba Musa na Waisilaeli nawamwimbila Mkulu Nguluwi lwimbo alu aku wolonga, “Ndomwimbila Mkulu Nguluwi, kwa vila nakenuligwa kwa katogo, falasi na wakwina falasi nakawatoza mbahali.
2Mkulu Nguluwi ndo mong'ho na chiwalo cha lwimbo lwangu, heye ndo ulohozi wa heni. Heye ndo Nguluwi wa heni, nani ndomtogola. Ndo Nguluwi wa mhaza wa heni, nani ndomha ukulu.
3Mkulu Nguluwi ka mtowa ngondo, Mkulu Nguluwi ndo itagwa lyake.
4“Mituka ja Falao na wamizi wa heye nakawatoza mbahali, vilongozi wa heye wanojile kusinda weng'ha, nawazibila mli Bahali ya Shamu.
5Bahali iwele na mazi nyang'ha iwagubichiza, nawazibila mbaka hasi mwa bahali kota maganga.
6Mkulu Nguluwi, moko wa hegwe wa kudilo uwa na mong'ho, uwabenanga wang'honyo mvihande vidodo.
7Kwa ukulu wa hegwe, kuwagwisa walingukulema, kuzudila kwa hegwe kwangupulika na kuwalakaza kota mibeleje jikalile.
8Kwa muhe wa hegwe, mazi nagakwinizwa, nhigu nayima ngwalinga ifandile kota chidunda, Mazi nyang'ha nagebatana kota lukanzi hagati mwa bahali.
9Mng'honyo nakalonga, ‘Ndowawinza na ndowapata, ndowagawila lufufu lwa hewo na kuhola geng'ha gondilingugana, ndohola ipanga lya heni na moko wa heni wowasumya.’
10Nakuputa kwa mbeho ya hegwe, bahali naiwagubichiza. Nawazibila kota iganga mgati mwa mazi gawele na mleta.
11“Gwaa Mkulu Nguluwi, yalikohi yawele kota hegwe kuli milungu? Yalikohi yawele kota hegwe yawele yelile mkulu, ulingudumbiza kwa madito makulu, ulingudita mbuli za kububuwaza?
12Nakugolola moko wa hegwe wa kudilo uwele na mong'ho na isi naiwamela Wamisili weng'ha.
13“Gwegwe kwa igano lya hegwe lya kwimilila, nakuwalongoza wanhu wouwagombole, kwa mong'ho wa hegwe nakuwalongoza mbaka koulingikala helile.
14Wanhu wa isi zeng'ha wagahulika ago nawakakama, wenyeng'haye wa Ufilisti wenjililwa na chinhu cha kudumbiza chiwagalile usungu.
15Vilongozi wa Edomu nawadumba ng'hatu, wanhu wa Moabu wangukakama, wanhu walingikala Kanaani, nawagozola.
16Kudumba na kukakama kuwagwila, kwa chiwalo cha ukulu wa ludali lwako, hewo wanyamalila tulu kota iganga, mbaka howoloka wanhu wa hegwe Mkulu Nguluwi, ena, mbaka howoloka wanhu wa hegwe wouwagombole.
17Nakuwegala na kuwemiza kuli chidunda cha hegwe, honhu hala nahouditile ha kikala gwegwe baho Mkulu Nguluwi, hala honhu helile uhawichile goya, Mkulu kwa moko ga hegwe.
18Hegwe, gwa Mkulu Nguluwi, hegwe ndo mndewa mazuwa gose na mazuwa gose.”
19Mina falasi wa Falao na mituka ja heye na wakwina falasi wa heye nawenjila mgati mwa bahali, Mkulu Nguluwi nakagahilusa mazi ga bahali gawagubiche, ila Waisilaeli nawakola kuli isi isowile mazi hagati mwa bahali.
20Miliamu mdala mloli, nayawele lumbu wa Aluni nakahola kagoma kake mmoko, na wadala wanji weng'ha nawamuwinza wawele na vigoma vya hewo aku wovina.
21Miliamu nakawalongoza kwa kwimba, “Mmwimbile Mkulu Nguluwi kwa vila kasumya kwa katogo, falasi na wakwina falasi kawatoza mbahali.”
22Hamba, Musa nakawalongoza Waisilaeli kulawila kuli Bahali ya Shamu na kuza mbaka kuchiwala kwa Shuli. Nawenula majendo kwa mhela wa mazuwa gadatu kuchiwala ne kona mazi goneche.
23Lowafichile honhu halinguchemigwa Mala, hawajezile kunwa mazi ga Mala kwa vila nagali na usungu. Kwa chiwalo acho, honhu aho nahachemigwa Mala.
24Lelo wanhu weng'ha nawamng'ung'utila Musa wolonga, “Lelo tonwa choni?”
25Aho Musa nakamlilila Mkulu Nguluwi, na heye nakamlajila nhagala ya igodi, na Musa nakazwika mli mazi ago na baho mazi ago nagawa ganojile. Ako Nguluwi nakawapa Waisilaeli ilajizo na mzilo, leka yawajeze hewo,
26nakawalonjela, “Wone molihulichiza goya lizi lya heni Mkulu Nguluwi, Nguluwi wa hemwe, na kudita gawele goya kwa heni, na kibatilila mzilo na malajizo ga heni geng'ha, lelo heni siwagalila gala matamwa gondiwegalile Wamisili. Kwa vila, heni ndo Mkulu Nguluwi ndilinguwosela hemwe matamwa.”
27Hamba Waisilaeli nawafika ako Elimu kuwele na nzasa kumi na mbili na mitende makumi saba. Nawawika kambi ako behi na mazi.
