1Akũ Musa kũ Isarailanↄ ń pínki lɛ̀ dí sì Dikirinɛ ò pì: Mani lɛ̀ sí Dikirinɛ, zaakũ a tↄ́ bona, à sↄ̃denↄ kũ ń sↄ̃nↄ kà ísiran.
2Dikiri mɛ́ à ma gbãna ũ, mani a táaki lɛ́, àkũ mɛ́ à ma sura bà. Àkũmɛ ma Luda ũ, mani a tↄ́ kpá. Àkũmɛ ma de Luda ũ, mani a tↄ́ sɛ́ lei.
3Dikiri bi zĩ̀kariimɛ, a tↄ́n Dikiri.
4À Firi'auna sↄ̃gonↄ kũ a zĩ̀karinↄ kà ísiran, à zĩ̀kari gbɛ̃ zↄ̃kↄ̃nↄ vlɛ̃̀ Isira Tɛ̃ran.
5Í lòkotoo pìi dàńla, ò kpàtɛ zĩtɛ lán gbɛ̀ɛ bà.
6Dikiri, n ↄplan gbãna kun kũ zↄ̃kↄ̃kɛo, Dikiri, n n ibɛrɛnↄ kàkatɛ kũ n ↄplao.
7N n zãngurinↄ nɛ̀ n gakuri zↄ̃kↄ̃ↄ gũn, n pↄ fɛ̃̀ n ń nátɛ lán sɛ̃̀ɛ bà.
8N pↄ́ bò n yĩn, akũ í zↄ̃̀kↄ̃rɛ, à gↄ̃̀ zɛna lán bĩni bà, ísira ì ari a guragura.
9Ó ibɛrɛ pìnↄ pì, oni pɛ́tɛwái ò ó lemɛ, oni ó pↄ́nↄ sɛ́tɛ lákũ ò yei nà, oni ń fɛ̃nɛdanↄ bo ò ó dɛdɛo.
10N n lɛ́'ĩa vù, akũ ísira dàńla, ò kpàtɛ lán darumaa bà í zↄ̃kↄ̃ↄ pìn.
11Dikiri, tãnanↄ tɛ́ a kpate mɛ́ à de lán n bàa? Dín oni lɛkↄ̃a kũnwoo? Yãbonsarɛkɛri, n zↄ̃kↄ̃kɛ adona, n gakuri naasi vĩ.
12N n ↄpla pòro, akũ zĩtɛ ń mↄ́mↄ.
13Ókↄ̃nↄ kũ n ó bó zↄ̀blennↄ ĩni dowɛrɛ arɛ n gbɛ̃kɛ gũn, ĩni gɛ́ kũoo n bùsun kũ n gbãnao.
14Tó burinↄ mà, oni lukaluka, í wãna ni ká Filisitini bùsudenↄ pↄa.
15Ɛdↄmunↄ kínanↄ ni vĩna kɛ, swɛ̃̀ ni kɛ̃ Mↄabu don'arɛdenↄn, Kanaanↄ bùsudenↄ mɛ̀ ni yↄ́ ń pínki.
16Vĩna zↄ̃kↄ̃ ni ń kũ, swɛ̃̀ ni kɛ̃ńgu, oni gↄ̃ kítikiti lán gbɛ̀ɛ bà n gbãna zↄ̃kↄ̃ yãi Dikiri, ari ókↄ̃nↄ kũ n ó sɛ́ n pↄ́ ũnↄ ni gɛ̃tɛ.
17Dikiri, ĩni gɛ́ kũoo kpi kũ n sɛ̀ n pↄ́ ũ kĩnaa, ĩni ó zĩni pɛ́tɛ gu kũ n dìtɛ n vutɛki ũn, n kúki kũ n kɛ̀kɛ n zĩdanɛɛ pìi.
18Dikiri nigↄ̃ kí ble gↄrↄ sĩnda pínkimɛ.
19Kũ Firi'auna sↄ̃nↄ kũ a sↄ̃gonↄ kũ a sↄ̃denↄ gɛ̃̀ ísira gũn, akũ Dikiri sù kũ ío à dàńla, ama Isarailanↄ táa ò gukoria ísira pìi gũn.
20Akũ annabi Miriamu, Haruna dãre, a sɛ̃̀gɛ̃ɛ sɛ̀, akũ nↄgbɛ̃nↄ bò ò tɛ́i ń pínki, òtɛn sɛ̃̀gɛ̃ pá òtɛn ũ wã.
21Miriamu lɛ̀ɛ sìńnɛ à pì: À lɛ̀ sí Dikirinɛ, zaakũ a tↄ́ bona, à sↄ̃denↄ kũ ń sↄ̃nↄ kà ísiran.
22Musa dà zɛ́n kũ Isarailanↄ, ò kɛ̃̀kↄ̃a kũ Isira Tɛ̃rao ò gɛ̃̀ Suru gbárannan. Ò táa ò gↄrↄ aakↄ̃ gbáranna pìn odi í ero.
23Kũ ò kà gu kũ òdi pi Mara, odi fↄ̃ ò a í mìro kũ à kɛ̀ kyã̀kyã yãi. A yã mɛ́ à tò ò tↄ́ kpà gu pìinɛ Mara.
24Akũ gbɛ̃nↄ zuka kà Musai ò pì: Bↄ́n óni mii?
25Musa wiki lɛ̀ Dikiria, akũ Dikiri lí mↄ̀nɛ. Kũ Musa lí pìi zù ín, akũ í pìi kɛ̀ nna. Gwen Dikiri yã dìtɛńnɛ kũ dokao à ń yↄ̃ à ń gwá
26à pì: Tó a laakarii dↄ̀ makũ Dikiri á Luda yãa átɛn yã kũ má yei kɛ, tó a yã kũ ma dìtɛnↄ mà, akũ á ma dokanↄ kũna pínki, mani gyã kũ ma kà Misilanↄn ke kááguro, zaakũ makũmɛ Dikiri kũ àdi á gba aafia ũ.
27Abire gbɛra ò kà Ɛlimu, gu kũ ísɛ̃boki mɛ̀n kuri awɛɛplanↄn kun kũ domina lí mɛ̀n baaakↄ̃ akurinↄo. Akũ ò bùraa kàtɛ í pìi sarɛ gwe.
