1Anina ma Moses mai Israel maiteni wei voepaepa welana i ravi Bada awarina: Tau ana wela Bada awarina ma ana voepaepai, aubaina ana ḡavia i vipupui, ma horse ma chariot taugeruii au boga i viorerena-naiei,
2Bada au rewapana ḡaeḡaena, ma welei ana voepaepai; Tauna i vilawaniu Tauna au God ma ana voepaepai, Amamau ai God ma lamna aubaina ana vimae-ḡaeḡaeni ma ana voepaepai.
3Tauna wavana Bada. Tauna ḡavia ravana.
4Pharaoh ana chariot ma ana sorodia au boga i viorereni; Ana sorodia vinevinei au Boga Lebalebarina i monui.
5Gabinou i wanaiwaḡi da taui i purui; ma i monu boga au gabaurina me ḡaima.
6Oo Bada ura-oiem vivirewapana kaukauana, ura-oiem am ḡavia e viviaimutumutui.
7Tam ḡeḡetelaram ma taui i viḡaviem u vovaiubai. Am meji araratana u paritawanei da taui i aragibui me ai ragorago.
8Boga au tepana u uvena ma boga olana i mairi, i mairi genuatau me biribiri, ma gabinou i alala.
9Am ḡavia i riwa, “Ana viaḡaḡei, ana vojijini, ai purapura ma ai maura anatapui ana ḡutai, ma aiwai a ḡoeḡoei ana vaia, Au sod ana lavui ma ana vipupui.”
10Wate lavutumei u uvena, ma gabinou taui i purui; i monu me ḡaima rabama au ḡaeḡaena.
11Bada, mepa god ḡelaui me tam bo eḡa? Eḡateni! Tam anina vivivirem, am rewapana i rata dewadewa da tauai a rovorovoem, Tam kaua babai ma virewapanai taukaueina.
12Tam uraoiem u viloloi, ma doa am ḡavia i lawani.
13Am rava u vaimelei ma u rauetaraveni am nuavaina patupatutunei, Ma am rewapanei u taravaina-naiei am au animae vivivireina.
14Dobu ḡelaui wei riwana i nonori ma orai i sisi kaua. Mai Philistia orai rovo ina vioai.
15Edom gulagulaui ina rovo kaukaua, Moab nelara rewapana ini ina sisi. Canaan maemaei anatapui inii i wanagwadai.
16Rovo ḡaeḡaena anatapui orai i oai, uram ana rewapanei taui i mairi kwakwa me kokoitau, ma am rava ina verautua Bada, da ravai u vaivai-melei ina verautua.
17Bada ma taravaina da am au ola ina raunuma, Gabu u vinevineiana, tam uramei voavoaina.
18Bada ina vibada nonoa.
19Mai Israel doa au alalana i babara damana. Wate maranai mai Egypt ai horse ma ai chariot taugerui i rui au boga, Bada waira i neiana-meleiai da anatapui i purui Lamna aubaina Moses ana rava maiteni wei welana i ravi.
20Peroveta Miriam, Aaron novuna tambourine i vaia ma waivine anatapui, tauna i votaḡotaḡoi ma tambourine i vikalokaloei ma i ara.
21Miriam wei welana i ravi, “Tana raua Bada awarina, aubaina tauna ḡavia i vilamolamonei ma horse ma chariot taugerui au boga i viorereni.”
22Anina ma Moses mai Israel i taravaini da Boga lebalebarina i netawanei ma i nae au Shur mutuluana. Aupom tonuḡa au mutulua i babara wate waira eḡa ita nelaḡai.
23Maranai au waira vuvura Marah i ḡeta da ita uma wate wairana umana i viḡora da eḡa ita uma, lamna aubaina wei dobu wavana Marah.
24Ma rava Moses awarina i pariḡai i pa, “Aiwai tana umai?”
25Anina ma Moses i paritou bada awarina agu aubaina, ma Bada ai tupona i viatataiei. Ma wei aina i tawanei au waira ma waira i viaini aniuma aubaina. Nai au gabuna Bada ana tarawatu rava i verei ai lawana aubaina, ma ai votelatela i raudadani.
26Bada i riwa, “Mepa da riwau ona nonora-kauei ma kaua aiaii ona kauei au matau ma riwau anatapuna ona voteletelei, da kovoḡa mai Egypt a vereverei, eḡa ana veremi. Tau Bada tauvilawanimi.”
27Muriai taui i nei au Elim kampa vuvura 12 ma mutulua ai me pa 70 i maimairi ma kampa waira au adana i mae mara aburuna.
