1Beto asa, si kera vahesi la nia e Mosese meke sari na tinoni Izireli sa kinera hie koe Zihova: “Kaqu kera vahesia rau se Zihova, sina mataqara si Asa koasa Nana ṉiniraṉira lavata. Ele va lodui Sa pa korapa lamana sari na tie meke sari dia hose.
2E Zihova si va ṉiṉirau meke harupau. Asa tugo sa qua Tamasa sapu kaqu vahesia rau, meke Asa tugo sa Tamasa tadi na tiatamaqu, sapu kaqu kera vahesia rau guguana sa Nana ṉiniraṉira.
3E Zihova si na tie varipera; meke e Zihova tugo sa pozana.
4Meke ipa lani Sa pa kolo sa qeto minate tadi pa Izipi meke sari dia totopili varipera. Meke lodu pa Kolo Ziṉara sari na ṉati palabatu varipera tadirini.
5Meke lodu guana patu pa hubi lamana, meke kuzu beto pa korapana sa kolo si arini.
6Sa lima mataomu Goi Zihova si ṉiṉira hola meke variva magasa, sapu muzara va umumia sa kana.
7Meke koasa Mua vinariva magasa Baṉara, si va kilasi Goi sari na Mua kana; meke sa Mua binugoro si huruṉu vura guana nika sapu sulu betoi si arini guana remoremo popadi.
8Va givusia Goi sa lamana, meke varitomotomoi sage sari na kolo; meke turu toṉoto sage guana goba; sa pepeso pa lamana lavata si ta evaṉae guana patu ṉiṉira.
9Meke zama sa kana, ‘Kaqu hadu luli rau, meke saputu vagi si arini; meke kaqu lobusu vagia rau sa qua magu, meke vagi betoi sari doduru pu tagoi rini; meke kaqu variva hia ni rau sari doduru dia likakalae, meke vagi sari doduru pu hivani rau,’ gua si asa.
10Keke siṉo lavata mo Goi Zihova, si lodu beto mo sari na tie Izipi; meke lodu guana aeana pa korapa lamana si arini.
11Ke Zihova, esei koari na tamasa sapu kekeṉoṉo gua Agoi! Esei si kekeṉoṉo gua Agoi sapu hopemu meke variva magasa hola? Esei si boka taveti sari na tinavete variva magasadi meke ṉiṉiradi gugua Tamugoi?
12Ovulu sage nia Goi sa lima mataomu, meke ta onolo toa pa korapa pepeso sari nada kana.
13Koasa Mua tataru lopu ta ṉana kamona, si turaṉi Goi sari na Mua tie saripu ele vata rupahi Goi; meke koasa Mua ṉiniraṉira si turaṉa lani Goi koasa Mua popoa madina si arini.
14Soku butubutu si avoso nia, meke holoqoru na matagutu si arini, meke tarazuzu sari na tie Pilisitia.
15Matagutu sisigiti sari na koimata tadi pa Edomu d; meke sari na tie ṉiṉiradi pa popoa Moabi si neneqara; meke malohoro sari na tinoni pa Kenani.
16Meke matagutu sisigiti si arini, sapu dogoria rini sa ṉiniraṉira tamugoi Zihova. Meke turu nunala pa minatagutu si arini, osolae ene hola sari na mua tie saripu vata rupahi Goi pa tinoa pinausu.
17Turaṉi Goi sari na Mua tinoni, meke la vekoi Goi koasa Mua toqere soti, sa vasina sapu kuria Goi telemu, pude na Mua vasina kokoana, sapu sa vasina hopena sapu kuria Goi Zihova pa limamu soti.
18Kaqu koa Baṉara si Goi Zihova ninae rane ka rane.”
19Ene pa varikorapa kolo koasa pepeso popana sari na tie Izireli. Ba sipu ene luli la sari na totopili varipera, meke sari na tie Izipi koari na dia hose pa vari korapana sa kolo koa sa pepeso popana, si varikamo pule nia e Zihova sa kolo meke kuzu beto pa korapa kolo si arini.
20Beto asa si taṉini vagia poropita Miriami sapu sa tasina barikaleqe e Eroni sa tabarini, meke lulia ri doduru barikaleqe si asa, peka lopilopi turaṉi rini sari na tabarini.
21Meke kera se Miriami: “Mi kera vahesia se Zihova, tava lavata si Asa sina mataqara si Asa pa vinaripera; ele ipani Sa pa kolo sari na tie varipera koari na dia hose!”
22Meke turaṉa va seu i e Mosese pa Kolo Ziṉara meke la gua pa korapa qega sapu ta pozae Sura sari na tie Izireli. Ka ṉeta rane si enea rini sa korapa qega, ba loke kolo si dogoria rini.
23Meke sipu kamoa rini si keke vasina pozana Mara, ba sa kolo vasina si pasa sisigiti, ke lopu boka napoa rini si asa. Gua asa ke ta pozae Mara sa pozana.
24Meke qumiqumi na nanasia rini se Mosese, “Nasa si kote napoa gita?” gua si arini
25Meke varavara va ṉiṉirae la koe Zihova se Mosese, meke va dogoro nia e Zihova koasa si keke kukuru huda, meke oki la nia sa si asa pa kolo, pude va lomoso ia meke boka ta napo sa kolo. Meke ponini tinarae tugo e Zihova vasina si arini, pude luli. Podeki tugo Sa vasina si arini,
26meke zama si Asa, “Arau tugo se Zihova sapu salaṉa gamu si gamu. Be va tabe va hinokara si gamu koari na tinavete sapu gua toṉoto pa Qua hiniva, meke kopuni gamu sari na Qua zinama, si lopu kaqu va kilasa gamu Rau si gamu koari na minoho saripu vata razae lani Rau koari na tinoni pa popoa Izipi.”
27Beto asa si mae pa vasileana Elimi si arini, meke vasina si dogori rini sari ka manege rua bukaha kolo meke sari ka zuapa ṉavulu huda pamu, ke va turu dia ipi tata koasa kolo vasina si arini.
