Text copied!
CopyCompare
Bibeli Gusunɔn Gari - Yɑribu

Yɑribu 15

Help us?
Click on verse(s) to share them!
1Sɑɑ yerɑ Mɔwisi kɑ Isirelibɑ bɑ Yinni Gusunɔ siɑrɑbun womu kuɑ. Bɑ nɛɛ, kon Yinni Gusunɔ tɔmɑ kɑ womu domi u win wɛrɔbu tɑbu di. U dumi kɑ yin mɑɑsɔbu sure nim wɔ̃ku sɔɔ.
2Yinni Gusunɔwɑ nɛn dɑm, wiyɑ nɑ siɑrɑmɔ kɑ nɛn womu. Wiyɑ u mɑn fɑɑbɑ kuɑ. Wiyɑ nɛn Yinni, kon nùn bɛɛrɛ wɛ̃. Wiyɑ nɛn bɑɑbɑn Yinni, kon nùn wɔlle suɑ.
3U sɑ̃ɑwɑ tɑbu kowo kɑ ɡem. Win yĩsirɑ Yinni Gusunɔ.
4U Eɡibiti sunɔn tɑbu kɛkɛbɑ kɑ win tɑbu kowo dɑmɡibu sure nim wɔ̃ku sɔɔ ɡe bɑ mɔ̀ Nɑɑ yɑri. Win tɑbu kowo ɡisonkobɑ bɑ nim diirɑ.
5Nim mɛ, mu bu wukiri, mɑ bɑ numɑ temɔ nɡe kperu.
6Yinni Gusunɔ, wunɛn nɔm ɡeu ɡɑ dɑm yiikoɡim mɔ. Geyɑ ɡɑ wunɛn wɛrɔbu munkɑ muku muku.
7Wunɛn sinɑndun kpɑ̃ɑru tɑ rɑ wunɛn wɛrɔbu tɑɑre. Wunɛn mɔru yɑ̀ n seewɑ, ɑ rɑ de bu dɔ̃ɔ mwɑɑrewɑ nɡe wĩi.
8A wɛ̃ru wurɑ mɑ nim mu kpɑɑsinɑ mu sinum kuɑ berɑ kɑ berɑ nɡe ɡbɑ̃rɑru.
9Wɛrɔ u nɛɛ, u koo bu nɑɑ swĩi kpɑ u bu nɑɑmwɛ. U koo mɔru kɔsiɑ be sɔɔ nɡe mɛ u kĩ, kpɑ u tɑkobi womɑ u bu ɡo kɑ win nɔmɑ, kpɑ u ben dukiɑ bɔnu ko.
10Adɑmɑ ɑ wunɛn wom wɛ̃siɑ, mɑ nim mu bu wukiri. Bɑ numɑ bɑ kpunɑ nɡe dɔ̃ɔ kpenu mi nim mu duku.
11Yinni Gusunɔ, mbɑ n kɑ nun weenɛ ye tɔmbɑ sɑ̃ɑmɔ kpuro sɔɔ. Mbɑ n kɑ nun dɛɛrɑru nɛ, wunɛ wi ɑ nɑnum mɔ. Mbɑ n kɑ nun weenɛ, wunɛ wi bɑ koo siɑrɑ. Mbɑ n kɑ nun weenɛ, wunɛ wi ɑ rɑ sɔm mɑɑmɑɑkiɡinu ko.
12Domi ɑ wunɛn dɑm sɔ̃ɔsi, mɑ tem bu mwɛ.
13Wunɛn wɔnwɔndu sɔɔrɑ ɑ wunɛn tɔmbu swɑɑ sɔ̃ɔsi be ɑ yɑkiɑ. A mɑɑ bu kpɑrɑmɑ kɑ wunɛn dɑm ɑ kɑ dɔɔ sere wɑ̃ɑ yee te ɑ bu nɔɔ mwɛɛru kuɑ sɔɔ.
14Tɔn tukobu bɑ ye nuɑ, mɑ bɑ diirumɔ. Filisitibɑ bɑ bɛrum soorɑ.
15Edɔmun sinɑmbun toronu kɑrɑ. Mɑ Mɔɑbun tɑbu durɔbu bɑ diirumɔ. Kɑnɑnibɑ kpuro, ben wɑsi dwiiyɑ.
16Bɛrum kɑ nɑndɑbu koo bu deemɑ subɑru sɔɔ. Wunɛn dɑm sɑɑbu bɑ koo mɑri sɔ̃ɔ sɔ̃ɔ nɡe kperu. Sere wunɛn tɔn be ɑ yɑkiɑ yorun di bu kɑ nim wɔ̃ku tɔburɑ, Yinni Gusunɔ.
17Kɑɑ kɑ bu dɑ kpɑ ɑ bu tɑ̃sisiɑ wunɛn tiin ɡuuru wɔllɔ, mi ɑ wunɛn wɑ̃ɑ yeru sɔɔru kuɑ. Terɑ tɑ sɑ̃ɑ wunɛn sɑ̃ɑ yeru te ɑ tii kuɑ.
18Wunɛ Yinni Gusunɔ, kɑɑ n bɑndu diiwɑ kɑ bɑɑdommɑɔ.

19Sɑnɑm mɛ Eɡibiti sunɔn dumi kɑ win tɑbu kɛkɛbɑ kɑ mɑɑsɔbu bɑ duɑ nim wɔ̃ku sɔɔ, Yinni Gusunɔ u derɑ nim mu wurɑmɑ mu bu wukiri. Adɑmɑ u derɑ tem mu ɡberɑ nim wɔ̃ku ɡen suunu sɔɔ, mɑ Isirelibɑ bɑ tɔburɑ.
20Yen biruwɑ Aronin sesu Mɑriɑmu wi u sɑ̃ɑ Gusunɔn sɔmɔ, u bɑrɑ kpɑ̃ru suɑ mɑ tɔn kurɔbu kpuro bɑ nùn swĩi bɑ bɑrɑ kpɑ̃nu soomɔ bɑ yɑɑmɔ.
21Mɑriɑmu u bu womu ɡeni kuɑ u nɛɛ, i Yinni Gusunɔ tɔmɔ kɑ womu, domi u nɑsɑrɑ wɑ kɑ win yiiko. Dumi kɑ yin mɑɑsɔbu u sure nim wɔ̃ku sɔɔ.
22Yen biru Mɔwisi u Isirelibɑ kpɑrɑ sɑɑ nim wɔ̃ku ɡe bɑ mɔ̀ Nɑɑ yɑrin di bɑ dɑ ɡbɑburɔ te bɑ mɔ̀ Suri. Sɔ̃ɔ itɑwɑ bɑ sĩɑ ɡbɑbu te sɔɔ bɑ ǹ nim wɑ.
23Mɑ bɑ turɑ Mɑrɑɔ ɑdɑmɑ nim mɛ bɑ wɑ mi, mu sosu, bɑ ǹ kpĩɑ bu nɔ. Yen sɔ̃nɑ bɑ yɑm mi sokɑ Mɑrɑ. Yen tubusiɑnɑ sosurɑ.
24Mɑ tɔn be, bɑ Mɔwisi wɔkisi bɑ nɛɛ, mbɑ sɑ ko nɔ.
25Mɔwisi u Yinni Gusunɔ nɔɔɡiru sue. Mɑ Yinni Gusunɔ u nùn dɛkɑ ɡɑɑ sɔ̃ɔsi. Ye u dɛkɑ ye suɑ u kɑre nim mɛ sɔɔ, mɑ mu dorɑ. Miyɑ Yinni Gusunɔ u win tɔmbu woodɑbɑ wɛ̃ kɑ woronu. Miyɑ u mɑɑ ben lɑɑkɑri mɛɛrɑ.
26U nɛɛ, ì n nɛ Gusunɔ bɛɛn Yinnin ɡere nuɑ sɑ̃ɑ sɑ̃ɑ, mɑ i mɔ̀ ye n mɑn wɛ̃re mɑ i nɛn woodɑbɑ mɛm nɔɔwɑ, nɑ ǹ kɑ bɛɛ bɑrɑ ni sɛɛyɑsiɑmɔ ni nɑ Eɡibitiɡibu kpɛ̃ɛ. Nɛnɑ Yinni Gusunɔ nɛ wi nɑ rɑ n bɛɛ bɛkiɑmɔ.
27Yen biru bɑ turɑ Elimuɔ mi nim bwii wɔkurɑ yiru yɑ wɑ̃ɑ kɑ kpɑkpɑ bɛ̃ɛ wɑtɑ kɑ wɔkuru. Mɑ bɑ ben sɑnsɑni ɡirɑ bwii yin bɔkuɔ.