1Aphano Munsa na aana a meezirayiilu khumwiipela liipo ntthi, Nnyizinku yoori: “Kinimwiipela Nnyizinku, mwaasa yoori ashintta wooshapweyavo, khutupweeza mpahari khavalo na anakhavalo aya.
2Nnyizinku ti kuvu yaka na liipo laka, ye ti nusura yaka! Ye ti Nluku aka na miiyo kininsifu, ti Nluku wa papaaka na miiyo kinimwaaputu!
3Nnyizinku ti naviittha, nzina lawe ti Nnyizinku.
4Khutupweeza mpahari mikukutta za nvittha na anajanka a Firawuuna; anamalokozela awe apale awaakhupaliyeeyo khukhuteliwa ti pahari yookhuttuwa.
5Maati apale awiicha khuwaakhutela khwiiya oozama nkhama mawe.
6Oo Nnyizinku, nkhono nlume awo onaaye owahi nwulweene; Oo Nnyizinku, nkhono nlume awo wawaashijela maatuwi.
7Khwa owula wa ofwalume awo wawaakhitiri maatuwi awo, katapu yawo khuwaaja nkhama malala.
8Khwa ovitelela wa phula yawo maati na mawipi ajikusanya khujakhuwa nkhama muuri, vathi wa pahari khwiiya awuuma nkhama liwe la manlela.
9Maatuwi khusala alupa yoori: ‘Niweekarise niniwaasikana niwaanyakanye maali nafusi zeetthu zinlawa zatoshiwe pi yo, nasarule phanka yeetthu na makhono eetthu niniwaatapanya.’
10Khuperekha pheevo yawo, na pahari khuwaafinikha. Khuzama nkhama chumpwi mpahari wawiichamo.
11Khaziivo miluku zinlikananaaye weeyo oo Nnyizinku. Khaavo woottitthimisiwa woottakatthifu, wawoopisa khwa oretta vitthu zootikinisa na oretta minjuza.
12Wookoliye nkhono nlume awo nti khuwaamiza.
13Khwa pheta yawo wawaalokoza atthu awo apale owoosuruyeeyo; na kuvu zawo, khuwaattha puuro yawo yoottakatthifu.
14Khapila khusiila epile onrettaazo, khusala zithukumela na woova. Afiliishiti khuwaapattha huzuni.
15Attunkhulu a Meedomu khwiiya ooshanka na anamalokozela a amowaabu khuwaapattha othukumela; akanaani khuwaapattha otteettheya.
16Osuthuwa na woova khuwaapattha khwa owahi wa nkhono awo, khuhisala asakhinyeya nkhama mawe mpakha ovira atthu awo, Oo Nnyizinku, mpakha ovira atthu apale owoozanyiyeeyo.
17Oo Nnyizinku, weeyo oniwalawana na waweekhaze vamwaako wa eritho yawo puuro ttakatthiifu nyuupa yawo ojekiyeeyo na makhono awo.
18Nnyizinku mfwalume wa mileele.”
19Wakathi khavalo za Firawuuna na mikukutta zawe za nvittha na anakhavalo awe eettiyeevo mpahari, Nnyizinku khuwaazamisa a Misuri na maati a pahari etile; ila meezirayiilu aaviriye mwentto aluwatthelaka mishaka zawuuma vakatthi wa pahari.
20Nhupiri Miiriyamu nlupuwe Arawu khuthuula nttowu na aakha ooshi khusala anlotta eettaka opiya na wiina.
21Miiriyamu aari owaajipu eettaka wiipa araka: “Nimwiipele Nnyizinku, mwaasa yoori ashintta wooshapweyavo. Khutupweeza mpahari khavalo na anakhavalo aya.”
22Aphano Munsa khuwaalokoza meezirayiilu waaza pahari yookhuttuwa mpakha n'yaara ya Shuuri. Siikhu ttatthu eettaka weettetta n'yaara ahipatthaka maati.
23Aphano khufiya Maara, ila khuhiwahi onywa maati ottuukho mwaasa wa owaawa. Ti maana aya wiittheliweeyo nzina la Maara.
24Tiito meezirayiilu khusala amwaapa Munsa araka: “Ninttela onywa-ni?”
25Munsa khunkhuwela Nnyizinku ye khuthoonyeziwa muutthi khuthuula khweeselela mmaati khwiiya ootuva. Puuro etile ya Maara Nnyizinku khuwenkha kano na oruma na khuweeza,
26awoozaka yoori: “Mweeyo amana mwinsiileza Nnyizinku, Nluku enu na osiileza etile enintuvelaaye na khusiileza mirumo zawe na khushututela kano zawe zooshi, khamwiniiyana hatha orati opule kiwaatiseliyeeyo amisuri, maana miiyo ki Nnyizinku anvonisaaye.
27Aphano khufiya nti wa Elimu, ottuukho zaariiwo milipu khumi na miwiri na mikokonoothi sapiyiini; khumaka ottuukho khwaattamela maati.
