SEDEMII 51:35-61

³⁵Kɛ̀ Siyɔ̃ɔ̃ ɛì kɔbɛɛ bɛ́i nkɛ dɔ̀: Bɑbidɔnni ɛì kɔbɛ ti dɔ̀ɔ̀ mɛ̀ɛ̀ yɛi, bɛ̀ɛ yɑ̀ mɛ kó tiyeti. Kɛ̀ Sedisɑdɛmmu kɔbɛ dɔ̀: Bɑbidɔnni ɛì kɔbɛ còú mmɛ̀ɛ̀ nitiyĩ̀ĩ̀ ti ɛì, bɛ̀ɛ yɑ̀ mɛ̀ kó tiyeti.

³⁶Kɛ̀ ti Yiɛ̀ nKuyie mbɛ́innɛ̀ Sedisɑdɛmmu ɛì kɔbɛ kɛ dɔ̀: Míì mɔ́mmuɔ n yóó kpɑ ndi kpɛ́í míì yóó pɛitɛ di pɛ̀ì. Míì yóó duɔ́ nkɛ̀ sibií kṹṹ o ɛì kɛ ikó nkpeí.

³⁷Bɑbidɔnni ɛì bo nɑɑ́ nyɛdombìrɛ̀, sikpɑmɔɔ́ kó diɑ̃rì, bɛnìtìbɛ̀ níí bo ò yɑ̀ kɛ̀ dɛ̀ɛ bɛ̀ di, kɛ́wɛ̃tɛ kɛ́ bɛ̀ pĩ mmudɑɑ́, dì bo dɔúnko bɑ́ onìtì bɑ́ ndɛ̀ bo.

³⁸Bɑbidɔnni ɛì kɔbɛ yó mmuntímu yɛcìrícìrìpɑ̀ɑ̀ ntɛ̃mɛ̀, kɛ kontí yɛcìrícìrɛ̀ kɔ̃mɛ.

³⁹Sinɛ́yɛ̃ĩ siì bɛ̀ pĩ nkɛ̀ m bɛ̀ yu dibɑnni kɛ̀ bɛ̀ bo yɑ̃̀ mɛnɑɑ̀ nkɛ́muɔ́, kɛ́duɔ́, kɛ tɛ̃́nkɛ bɑ́ɑ́ entɛ. Mí ndi Yiɛ̀ nKuyie míì bɛ́i.

⁴⁰N yóó bɛ̀ kpɑ̀ɑ̀kɛ tipìètì nɛ̀ yɛpedɑkɛ̀ nɛ̀ yɛbɔdɑkɛ̀ tɛ̃mɛ̀ mmɛ kɛ́tɑnnɛ́ kukɔ̀ùdieku.

⁴¹Dɛ̀ dòmmɛ kɛ̀ Sesɑki kó dihɛì do, dindi dìì kó diyètìrì do feí kutenkù kumɔu miɛkɛ, dɛ̀ dɔ̀ɔ̀ ɔ̃̀mmɛ kɛ̀ Bɑbidɔnni ɛì dɔúnko kɛ nɑɑ́ ntɛdɔntɛ̀?

⁴²Dɑ̀mɛ́ɛ̀rì kó mɛniɛ mmɛɛ̀ dèkɛní kɛ tùɔ̀kɛ Bɑbidɔnni ɛì, kɛ̀ yɛnɛ́fĩ̀nfĩ̀rɛ̀ dì dɑ̀tínnɛ́.

⁴³Kòo ɛkɛ̀ nɑɑ́ nyɛ̀ɛ̀ dɔúnkoo, kòo tenkɛ̀ kpeí kɛ nɑɑ́ ntɛdɔntɛ̀, òmɔù tɛ̃́nkɛ í ɑ̃ kɛ miɛkɛ fɛnitiyɑnfɛ̀ òmɔù tɛ̃́nkɛ í dɛ̀ pɛ̃nkù.

⁴⁴Kɛ̀ ti Yiɛ̀ nKuyie mbɛ́i nkɛ dɔ̀: N yóó potɛ́mu Bɛɛdi Bɑbidɔnni kó dibɔɔ̀ kɛ dìi tɔ̃́ dì mɑɑ́ ndɛ̀. Yɛbotɛ̀ tɛ̃́nkɛ í yó ncokoo di borɛ̀. Bɑbidɔnni ɛì kó kuduotí domu.

⁴⁵Díndi n nìtìbɛ̀ yɛ̀nnɛ̀ dɛ kó dihɛì, bɑ́ wè kòo dɛɛtɛ́ o ɔ̃nnì, mí ndi Yiɛ̀ Kuyie n kó kɛmiɛkɛ yɑ̀ɑ̀ bo ò potɛ́.

⁴⁶Di kɔ̃̀ntì bɑ́ɑ́ yɑ̃rikɛ kɛ̀ kufɔ̃wɑɑ́ ndi pĩ́ di bo keè dìì mɔ̀nnì kunɔɔ̀roo kutenkù miɛkɛ, di mbenni níí bo nfitiní kɛ̀ dɛ̀ɛ nɔɔ̀rɛ̀mu kɛ̀ ditɛrì nyɛtìní kɛ̀ dɛ̀ɛ nɔɔ̀rɛ̀, yɛkpɑ̀rɛ̀ bo mbo kutenkù, we nkpɑ̀ɑ̀tì yonkuwe níí bo bɛti otɔù kɛ́kɑri.

⁴⁷Dɛ kó yɛwe kpɑɑnímu kɛ̀ m bo ítɛ́ kɛ́cómmú Bɑbidɔnni kó sibɔɔtenkɑɑnìi kpɛ́í, Bɑbidɔnni ɛì kɔbɛ bo di ifɛi, bɛcíríbɛ̀ bo ncóú cóú dihɛì miɛkɛ.

⁴⁸Kɛtenkɛ̀ nɛ̀ kɛĩ́nkɛ̀ dɛ̀ bo nyíú Bɑbidɔnni ɛì kpɛ́í, diwɛ̀ì bo dɛ̀ pĩ mbɛpɔ̀mbɛ̀ bo ítɛ́ní dìì yiè kubɑkù yoú, kɛ́do Bɑbidɔnni ɛì. Mí ndi Yiɛ̀ nKuyie mmíì bɛ́i.

⁴⁹Bɑbidɔnni ɛì dò nkɛ́pɔntɛmu, Isidɑyɛɛribɛ tɑ, kɛ tɑ kɛtenkɛ̀ nɛ̀ o kpɛ́í ndɛ̀ í sénní. O kùɔ kɛ kùɔ bɛnìtìbɛ̀ kutenkù, dɛ̀ í mɔkɛ dɛ̀ mɑ̀mɛ̀.

⁵⁰Díndi bɛ̀ɛ̀ nɑ kɛ yentɛ́, cokɛ́nɛ̀ kɛ́yɛ̀, bɑ́ nhɔɔtínɛ̀ dɛborɛ̀, bɑ́ kɛ̀ di dɛ̀tɛ́ kɛ berínɛ̀ dɛ̀, di bɑ́ɑ́ yɛ̃̀ ndi Yiɛ̀ nKuyie nkpɛ́í nnɛ̀ Sedisɑdɛmmu ɛì kpɛ́í.

⁵¹Bɛ̀ do ti sɑ̃́ɑ̃́ ndìì mɔ̀nnì dɛ̀ do í ti nɑɑti, ifɛi iì do ti kùɔ, bɛ̀ɛ̀ í tú Sifubɛ bɛ̀ tɑ dìì mɔ̀nnì ti Yiɛ̀ nKuyie ncɛ̃́sɑ̀ɑ̀tɛ̀ miɛkɛ.

⁵²Dɛ kó yɛwe kpɑɑnímu kɛ̀ m bo cómmú Bɑbidɔnni kó sitenkɑɑnìi kpɛ́í, dɛ yiè bɛ̀ kɔ̀utɛ bɛ̀ bo nkɔ̃ dihɛì dimɔu miɛkɛ,

⁵³kɛ̀ Bɑbidɔnni ɛì dɔ́ dìi dekɛ kɛ́tuɔkɛ tiwɛtì, bɑ́ kɛ̀ di duotí òkɛ̀ kɛ í dò nkɛ́nintɛ n yóó duɔnní bɛpɔ̀mbɛ̀ mbɛ kɛ̀ bɛ̀ɛ dì do. Mí ndi Yiɛ̀ nKuyie mmíì bɛ́i.

⁵⁴Ti yo ihúu mɑì nyi Bɑbidɔnni ɛì miɛkɛ, mɛyɛǹcɑɑ̀rìmɛ̀ diɛmɛ̀ kó yɛdɑbùò nyɛɛ̀ dɑ̀ɑ́tí Kɑndee tenkɛ̀ miɛkɛ.

⁵⁵Ti Yiɛ̀ nKuyie nkuù tɑ Bɑbidɔnni mupɔ̀mmù kɛ̀ dɛ kó kutoweku dèè, bɛ dootitɔbɛ̀ kó kunɔɔ̀roo kuù nɛ́ yiɛ̀ kɛ dò ndɑ̀mɛ́ɛ̀rì kó yɛnɛ́fĩ̀nfĩ̀rɛ̀, kutoweku diɛkù nku.

⁵⁶Opɔ̀ntì weè do Bɑbidɔnni ɛì kɛ pĩ̀ḿmú bɛkɔ̃m̀bɔ̀tiebɛ kɛ kèkɛ́ bɛ tɑ̃nnɛ̀. Ti Yiɛ̀ nKuyie nnɔmmu kɛ fɔku onìtì yɛi, kɛ yietì bɑ́ wè o yɛi.

⁵⁷N yóó niim̀mu mɛnɑɑ̀ bɛ̀ɛ̀ tũ nhokpɑ̀ɑ̀tì, mɛciì nyɛmbɛ̀ nɛ̀ kùmɑ̀ndɑ́ɑ̀bɛ̀ nɛ̀ bɛbeémbɛ̀ nɛ̀ bɛkpɑ̀rìtiebɛ, kɛ̀ bɛ̀ɛ muɔ́ nkɛ́duɔ́ kɛ tɛ̃́nkɛ bɑ́ɑ́ entɛ. Mí ndi Yiɛ̀ nKuyie nwèè yètìrì tu Mpɑkɛdɑɑ míì bɛ́i.

⁵⁸Bɑbidɔnni kó iduotí cɛ̃́ɛ̃́yì yóó puɔm̀mu yɛcɑ̀kɛ̀ diɛyɛ̀ yɛ̀ɛ̀ kpetí yɛbòrɛ̀ muhɑ̃ɑ̃́ mbo yɛ̀ cùɔ́. Iwuɔ mpĩ mmùù tɔ̃mmú bo nɑɑ́ ndɛtetìrɛ̀. Yɛbotɛ̀ ɑ̀rì kɛ dɔɔri dɛ̀ bo ntú muhɑ̃ɑ̃́ nkpɛrɛ.

⁵⁹Sedesiɑ Sudɑɑ kɔbɛ kóo kpɑ̀ɑ̀tì benni nɑɑnnì miɛkɛ, kɛ̀ Nɛdiyɑ birɛ Sedɑyɑ Mɑseyɑ yɑɑ̀birɛ wèè do bɑkɛ́ tɛkpɑ̀ɑ̀tìcĩ́ɛ̃̀tɛ̀ bɛ cɔú dɛ̀ bɛpɔ̀ɔ̀bɛ̀, kòo nkɔri Bɑbidɔnni kɛ nɛínɛ̀ Sedesiɑ Sudɑɑ kɔbɛ kóo kpɑ̀ɑ̀tì mí nSedemii kɛ̀ nhò nɑ̀nkɛ dipɑ́tíri.

⁶⁰Kɛ̀ dì wɑ̃̀ri mɛyɛi mmɛ̀ɛ̀ dò nkɛ́tuɔkɛní Bɑbidɔnni ɛì mɛmɔu.

⁶¹Kɛ̀ n dì nhò duɔ́ nkóò nɑ̀kɛ́ kɛ dɔ̀: Kɑ̀ɑ tùɔkoo Bɑbidɔnni ɑ́ nyɛ̃́ kɛ́kɑɑ ndɛ kó dipɑ́tíri.