Seremaia 51:35-61

³⁵Mehn Saion en patohwan, “Papilonia en pwukoahki kamaramas me wiawihong kitail!” Mehn Serusalem en patohwan, “Papilonia en pwukoahki lokolok kan me kitail aleier!”

³⁶Eri, KAUN-O ahpw mahsanihong aramas akan en Serusalem, “I pahn uhki amwail pwung oh kupwurehda pwe amwail imwintihti kan en ale dupuken dahme re wiahiong kumwail. I pahn kammadahda utuhn pihl en Papilonia oh kammadahda eh pillap akan.

³⁷Sahpwo pahn wiahla koasoakoasoak en mohn ihmw wasa me mahn lawalo kan pahn kousoanla ie. E pahn wiahla wasa kamasepwehk; sohte aramas pahn kousoan wasao, oh koaros me pahn kilang pahn masakada.

³⁸Mehn Papilonia kan koaros wie weriwer rasehng laion kan oh ngiringir rasehng kisin laion tikitik kan.

³⁹Ia duwe, re me mehwo? I pahn kaunopadahng irail ehu kamadipw oh kasakauwihirailla pwe re en pereperen. Re pahn meirla oh sohte pwurehng pirida.

⁴⁰I pahn ketikinirailla pwe re en kamakamala rasehng sihmpwul kei, kuht, oh sihpw wol. Ngehi, KAUN-O, me mahmahsen.”

⁴¹KAUN-O ketin mahsanih duwen Papilon: “Kahnimw me sampah pwon kin kapikapinga lohdier! Ia uwen kamasepwehklahn Papilon mwohn mesen wehi kan!

⁴²Sehd koaduhpwalkidier Papilon iloak kan me wie ngiringirisek.

⁴³Kahnimw kan wialahr wasa kamasepwehk oh duwelahr sapwtehn me sohte pihl ie, wasa me sohte aramas kousoan ie de pil keid ie.

⁴⁴I pahn kaloke Pel, koht en Papilonia, oh kupwurehda pwe en mweisang dipwisou me e pirapahda kan; wehi kan solahr pahn pwurehng pwongih. “Kehl kan en Papilon rengkdier.

⁴⁵Kumwail mehn Israel kan, kumwail tangasang wasao! Kumwail tengen mour sang ei engieng.

⁴⁶Kumwail dehr nan kapehd tikitikla de masakada rohng kan me kumwail kin rong. Nan sounpar koaros soangen rohng kei kin wiewiawiseli—rongen me dene kamaramas wiewiawi nan sahpwo, de pil nanmwarki kan wie mahmahwenpene.

⁴⁷Eri, ahnsou ehu kohkohdo me I pahn kaloke dikedik en eni kan en Papilonia. Sahpwo pwon pahn sarohdi, oh towe koaros pahn kamakamala.

⁴⁸Mehkoaros nin sampah oh pahnlahng pahn ngisingiski ar peren ni ahnsou me Papilonia pahn lohdi pahn aramas akan me kohdo sang ni paliepeng pwehn kauwehla.

⁴⁹Papilonia me kahrehda mehlahn aramas wasa koaros nin sampah, eri, met Papilonia pahn pwupwudi pwehki eh kahredahr mehlahn mehn Israel tohto. Ngehi, KAUN-O, me mahmahsen.”

⁵⁰KAUN-O ketin mahsanihong sapwellime aramas akan nan Papilonia: “Kumwail pitsangehr mehla! Eri, kumwail tang! Kumwail dehr pwand! Mehnda ma kumwail dohsang nan uhdakamwail, kumwail tamataman ie, amwail KAUN-O, oh tamataman Serusalem.

⁵¹Kumwail kin ndinda, “Se nameneklahr oh sarohdier; solahr sawasapat pwehki mehn liki kan ar adihasangkitehr wasa sarawi kan nan Tehnpas Sarawio.’

⁵²Eri met, I mahsanih me ahnsou ehu pahn kohdo me I pahn kaloke dikedik en eni kan en Papilon, oh ngilen weirek en me soahn kan pahn lelpeseng wasa koaros nan sahpwo.

⁵³Mehnda ma Papilon pahn kak en doudahla pahnlahng oh kauwada eh kelen mahwen wasao, I uhdahn pahn kadaralahng aramas en kauwehla. Ngehi, KAUN-O, me mahmahsen.”

⁵⁴KAUN-O ketin mahsanih, “Kumwail rong ngilen sengiseng nan Papilon, oh ngilen mwamwahieipen mwomwlahn sahpwo.

⁵⁵I wie kamwkamwomwala Papilon oh katokatokihedi ngile. Karis kan tangolong duwehte ngirisek en madau, re weriwer oh mahmahweniong kahnimwo.

⁵⁶Re kodohn kamwomwala Papilon; nah sounpei kan lohdier, oh neirail arep kan timpesengier. Iei ngehi Kohto me kin kaloke me suwed, oh pahn kaloke Papilon nin duwen me konehng eh wiewia.

⁵⁷I pahn kasakawihala nah lapalap akan— me loalokong kan, kaun akan, oh sounpei kan. Re pahn meirla oh sohte pwurehng pirida. Ngehi, nanmwarkio, me mahmahsen; ngehi KAUN-O, Wasa Lapalap.

⁵⁸Kehl kehlail kan en Papilon pahn rengkdiong nanpwel. oh eh ewen kehl ile kan pahn isihsla. Doadoahk en wehi kan sohla katepe; arail doadoahk laud pahn lulda. Ngehi, KAUN-O, Wasa Lapalap, me mahmahsen.”

⁵⁹Sapwellimen Nanmwarki Sedekaia sounsawas, iei Seraia, nein Neraia, oh e pahpa kahlapki Mahseia. Ni kapahieun sounpar me Sedekaia wiewiahki nanmwarkien Suda, Seraia iang Sedekaia ketilahng Papilonia, I ahpw patohwanohng kaweid kei.

⁶⁰I ntingihedi nan pwuhk ehu duwen ohla me pahn lelohng Papilonia, pil iangahki soahng kan me pid duwen Papilonia.

⁶¹I patohwanohng Seraia, “Ni omw pahn lel Papilon, ke pahn kanahieng wadekohng aramas akan ni ngihl laud soahng koaros me ntingdier nan pwuhk wet.