Jeremaia 51:35-61

³⁵Ekewe angangen mwänewüs a föri ngenikich pwal ngeni aramasach epwe ukun chon Papilon.” Ekewe chon Jerusalem repwe apasa, “Chaach epwe ukun chon Papilon.”

³⁶Iei usun mine ewe Samol mi Lapalap a apasa ngeni chon Jerusalem, “Üpwe penikemi o angei eliemi. Üpwe apwasatä ar we chanpupu o amorätä ar puächen koluk.

³⁷Papilon epwe wiliti eu ioien mettoch mi tala, eu leni ia kolak mi mwacho ra nom ie. Epwe och minen eniweniw me och minen turunufas, eu leni esap so.

³⁸Ekewe chon Papilon meinisin repwe wörüwörfengen usun ekewe laion, repwe ngüngü usun ekewe apanen laion.

³⁹Nge lupwen ra mochenia, üpwe amolätä eu kametip fän iter, üpwe apucheer pwe repwe mwälek. Repwe möürüfochola, nge resap chüen pwök.

⁴⁰Üpwe emwenirela ren ewe chon ninni usun eman a emwenala ekewe apanen sip, ekewe nienifön sip me ätemwänin kuuch. Ngang ewe Samol mi Lapalap üa kapas.”

⁴¹Ewe Samol mi Lapalap a apasa usun Papilon, “A oola ewe telinimw unusen fanüfan a mwareiti. Papilon a wiliti och minen eniweniw me lein ekewe mwü.

⁴²Sät a tötä won Papilon, ekewe nopuropur ra pwölüela.

⁴³Ekewe telinimw ra wiliti och minen eniweniw, ra wiliti eu leni mi pwas o pön, eu leni ia esap wor eman aramas a nom ie, esap pwal wor eman a pwerela lon.

⁴⁴Üpwe apwüngü Pel ewe koten Papilon o föri pwe epwe atowu mine a soläni. Chon ekewe mwü resap chüen fel ngeni. Tittin ewe telinimw Papilon a turula.

⁴⁵Nei aramasen Israel, oupwe towu me lon Papilon. Oupwe en me kütta manauan o sü seni ai song mi fokun watte.

⁴⁶Ousap akisala letipemi, ousap pwal niuokus, lupwen oupwe rong pworaus me lon ewe fanü. Eu pworaus a war lon eu ier, eu pworaus a pwal war lon eu ier mürin, pworausen angangen mwänewüs mi fis lon ewe fanü me pworausen än ekewe sounemenem maunfengen.

⁴⁷Iei mine epwe war ewe fansoun ai üpwe apwüngü ekewe uluulun anümwälin Papilon. Unusen ewe fanü epwe itengau, nge ekewe mi ninnila repwe chök toropasfeil lon.

⁴⁸Mürin ekewe läng me fanüfan pwal meinisin mi nom lor repwe köl fän pwapwa fänäsengesin Papilon. Pun ekewe chon kata repwe feito seni efeng pwe repwe maun ngeni.

⁴⁹Papilon i popun pwe chomong aramas won fanüfan ra mäla. Nge iei Papilon epwe fokun tala pokiten i popun pwe chomong chon Israel ra mäla. Ngang ewe Samol mi Lapalap üa kapas.”

⁵⁰Ewe Samol mi Lapalap a üreni nöün aramas me lon Papilon, “Ämi mi sü seni ewe mäfeiengau, oupwe feila, nge ousap üla. Oupwe chechemeniei ngang ewe Samol mi Lapalap me lon ewe fanü toau, nge Jerusalem epwe chem ngenikemi.

⁵¹Nge ämi oua apasa, ‘Äm aia säw ren ekewe kapasen turunufas aia rongorong. Itengau a pwölüela mesem, pun chon ekis ra tolong lon ekewe leni mi pin lon ewe imwenfel.’

⁵²Iei mine üa apasa pwe epwe war ewe fansoun lupwen üpwe kapwüng ngeni än Papilon kewe uluulun anümwäl. Ekewe mi kinas repwe ngüngü lemenen unusen ewe fanü.

⁵³Inamwo ika Papilon epwe fefeitä tori läng, inamwo ika epwe apöchöküla an we imwen maun mi nom wilitekia, üpwe chök tinala ekewe chon kata pwe repwe atai. Ngang ewe Samol mi Lapalap üa kapas.

⁵⁴Oupwe aüselinga ewe puchör seni Papilon, ewe akürangen feiengau mi fokun watte seni fanüen chon Papilon.

⁵⁵Pun ngang ewe Samol mi Lapalap üa ataela Papilon o aükätiu mwelian mi pöchökül. Chon oputeer repwe purolong lon usun chomong koluk, repwe maun ngeni fän akürangen mwelier mi leüömong.

⁵⁶Iwe, ewe chon kata a feito won Papilon. Nöün Papilon sounfiu ra oola, nge nöür kewe esefich ra kupukupukisitiu. Pun ngang ewe Samol mi Lapalap eman Kot mi ngeni aramas chappen ar föför, üpwe fokun aunusa ngeniir liwinin ar föför.

⁵⁷Üpwe apucha ekewe nöüwisen Papilon me nöün kewe soutipachem, nöün kewe kepina, nöün kewe meilap me nöün kewe sounfiu. Repwe möürüfochola, nge resap chüen pwök. Ngang ewe King itei ewe Samol mi Unusen Manaman üa kapas.

⁵⁸Tittin ewe telinimw Papilon mi chölap epwe tatiu tori pwül, nge asamalapan kewe mi tekia repwe karala. Än ekewe aramas angang a lomotmwäl, än chon ekewe mwü angang a chök mwüchün ekkei. Ngang ewe Samol mi Unusen Manaman üa kapas.”

⁵⁹Iwe, ewe soufos Jeremaia a öüröüra Seraia nöün Neria we mwän, nge Neria nöün Maseia we, lupwen a eti Setekia ewe kingen Juta le feila Papilon lon arüanün ierin mwün Setekia. Iwe, Seraia i meilapen chon tümwünü ewe sai.

⁶⁰Iwe, Jeremaia a makei lon echö toropwe usun ekei feiengau meinisin repwe tori Papilon, ekewe kapas meinisin mi fen maketiu fänäsengesin Papilon.

⁶¹Iwe, Jeremaia a üreni Seraia, “Lupwen kopwe tori Papilon, kopwe pi pwe kopwe aleani ngeni ekewe aramas ekei kapas meinisin mi mak lon ei toropwe.