Yeremi 51:35-61

³⁵Siyoŋ ne: «Yal na sama yàpp ak sama coono topp Babilon.» Yerusalem ne: «Yal na sama deret topp waa Babilon!»

³⁶Aji Sax ji nag dafa wax ne: «Maa ngii di leen layool seen layoo, ba feyul leen. Maay ŋeeral géejam, ŋiisal am walam,

³⁷Babilon def jali doj, di paxum till, di gent bu ñuy muslu, kenn du ko dëkke.

³⁸Ñu ngi ŋarandoo niy gaynde, di xiiroo ni gaynde yu ndaw.

³⁹Ñu tàng bay bëgga dee, ma may leen ñu naana naan, màndal leen, ñu mana xawaare, tëdd nelaw nelawi fàww, duñu yewwooti.» Kàddug Aji Sax jee.

⁴⁰Aji Sax ji nee: «Maa leen di wommat niy xar ba ca rendikaay ba, ñu mel ni kuuyi xar aki sikket.

⁴¹«Ãa! Ana nees mana nangoo Sesag? Nees mana tege loxo ki àddina sépp di kañ? Ana nu Babilon mana gente fi digg xeet yi?

⁴²Géej ay mëdd Babilon, mu sàngoo gannaxam yu jallaañoo,

⁴³ay dëkkam gental, réew mi ne sereŋ, di ndànd-foyfoy, kenn du ko dëkke, doom aadama du fa jaare.

⁴⁴Maay dikke mbugal Bel, tuur mi ci Babilon, yàbbiloo kob lancam. Xeet yi noppee def um wal, wuti ko, tatay Babilon it màbb.

⁴⁵Yeen sama ñoñ, génnleen fi seen biir, na ku ne rawale sa bakkan, ba mucc tàngooru sànjum Aji Sax ji.

⁴⁶Bu seen fit rëcc, ngeen di tiit xibaar yi ñuy yéene ci réew mi: ren yéene jib, déwén yéene jibati, fitna law ci réew mi, njiit ne njiit dann.

⁴⁷Kon ay bés a ngii di ñëw, yu may dikke mbugal tuuri Babilon, réew mépp torox, ña ñu bóom ñépp wetaroo fa biir.

⁴⁸Su boobaa asamaan ak suuf ak mboolem li ci biiram sarxollendoo, di bége li dal Babilon. Bëj-gànnaar kay la yàqkat yay bawoo.» Kàddug Aji Sax jee.

⁴⁹Waa Babilon it dinañu daanu ngir waa Israyil ñi ñu bóom, ba ñu yem ak mboolem waa àddina yi ñu bóom, te ñu daanu ndax Babilon.

⁵⁰Ée yeen ñi rëcc saamar, buleen taxaw, demleen, di fàttlikoo Aji Sax ji fu sore, tey bàyyi xel Yerusalem.

⁵¹«Nooka rus ci saaga yi nu dégg, ak gàcce gi nu sëlmoo ndax doxandéem yi dugg ci biir bérab bu sell bi ci kër Aji Sax ji.»

⁵²«Moo tax, bés a ngii di ñëw,» kàddug Aji Sax jee, «maay dikke mbugal seen jëmmi tuur yi, ñoom, ñi ñu jam di binnee fi réew mi mépp.

⁵³Su Babilon yéegoon asamaan, dàbbli fa tata ju ne kekk sax, du tee ay yàqkat bawoo fi man, dal ci kawam.» Kàddug Aji Sax jee.

⁵⁴Yuuxi njàqare fa Babilon, réewum Kaldeen ñooñaa toj ba tojatoo.

⁵⁵Aji Sax jee niy yàqtee Babilon, tukkal fa riir mu réy. Gàngoori noon yaa ngay buur ni gannaxi géej, seen riirum kàddu jolli.

⁵⁶Yàqkat déy dikkal na Babilon, jàpp ay jàmbaaram, dammatey fittam. Aji Sax ji déy mooy Yàlla jiy yoole, di fey pey gu mat sëkk.

⁵⁷Mu ne: «Maay màndal seeni kilifaak seeni kaaŋ ak seeni kàngam ak seeni jawriñ ak seeni jàmbaar, ñu tëdd nelaw nelawi fàww, duñu yewwooti.» Kàddug Buur a, Aji Sax ji Boroom gàngoor yi.

⁵⁸Aji Sax ji Boroom gàngoor yi dafa wax ne: «Tatay Babilon yu mag yi dees koy màbba màbb; bunt yu kawe ya lakk ba jeex. Xeet yee ñaq ci neen, waaso yee sonnal sawara.»

⁵⁹Bëkk-néegu Buur Cedesyas moo doon Seraya doomu Nerya doomu Maaseya. Ba Cedesyas tolloo ca ñeenteelu atu nguuram, la Seraya ànd ak moom Babilon.

⁶⁰Fekk na Yeremi bind cib taxañ mboolem safaan yiy dikkal Babilon, di mboolem mbir yooyu jëm ci Babilon.

⁶¹Yeremi sant Seraya, ne ko: «Boo àggee Babilon, fexeel ba biral kàddu yii yépp.