Zeremaea 51:35-61

³⁵Madi zama guahe sari na tinoni pa Zaione, “Mani ta evaṉa koa ri pa Babiloni sari doduru kinaleadi gua pu tavete maeni rini koa gita!” Madi zama guahe sari na tinoni pa Zerusalema, “Mani ta tubehe nia Babiloni sari kinaleadi saripu tavete mae ni rini koa gita,” gua.

³⁶Meke hiera gua si zama nia e Zihova koa ri na tinoni pa Zerusalema, “Dotu, Arau kaqu tuqe vagia sa mia tinasuna meke kaqu tavete la nia koa rina mia kana gua sapu tavete atu nia rini koa gamu. Kaqu va popa ia Rau sa bukaha kolo tadi pa Babiloni meke va popai sari na nana ovuku.

³⁷Sa popoa sana si kaqu ta evaṉae keke vinarigarae remoremo mo, vasina kaqu koa sari na kurukuru ṉame pinomodi. Kaqu ta evaṉae keke vasina variva hodahodakana si asa, meke loke tie si kaqu koa vasina, meke arini pu dogoria si asa si kaqu gagaemana nia.

³⁸Sari doduru tie Babiloni si kurumu guana laione meke kabo guana tuna laione.

³⁹Vegua, puhi si arini? Kaqu va namanama poni ni Rau si keke inevaṉa meke va naponapoi meke va qetuqetui si arini. Kaqu puta si arini meke lopu kaqu vaṉunu pule hokara.

⁴⁰Kaqu turaṉa vagi Rau si arini pude tava mate, guana lami, qoti, meke na sipi kokoreo,” Arau, Zihova, ele zama nia si hie.

⁴¹Zama nia e Zihova sa guguana Babiloni, “Sa vasileana lavata sapu vahesia sa doduruna sa kasia popoa si ele ta tuqe vagi! Ve toleṉe gua variva matamatagutuna gua sa dinoṉona Babiloni koa rina butubutu pa kasia popoa!

⁴²Puzaka tamunia na bogusu si pa Babiloni meke nobi tamunia na tovovo ovaṉana.

⁴³Variva matamatagutu dinoṉodi sari na vasileana nomadi meke kekeṉoṉo guana qega loke kolona, vasina pu loke tie koa ia babe ene la ia.

⁴⁴Kaqu va kilasia Rau se Belo, sa tamasa pa Babiloni, meke vata evaṉae nia koa sa pude lua vura ni sari na tiṉitoṉa pu onoli sa, meke lopu kaqu vahesi pulea ri na butubutu si asa. Ele hoqa sa gobana Babiloni.

⁴⁵Gamu na tinoni Izireli, mi govete taloa vasina! Mi tuturei govete taloa nia sa Qua tinaṉaziri.

⁴⁶Mi lopu malohoro babe matagutu sina koa gua koa sa inavoso sapu avosia gamu. Hopeke vuaheni si keke votiki inavoso si ta urahae na inavoso vinaripera koa sa popoa meke keke baṉara si raza ia si keke votiki baṉara.

⁴⁷Gua asa ke korapa mae sa totoso pana kaqu va kilasi Rau sari na beku pa Babiloni. Kaqu tava kurekure sa doduruna sa popoa, meke kaqu tava mate sari doduru nana tinoni.

⁴⁸Sari doduru tie pa pepeso meke pa maṉauru si kote kukili qetuqetu pana hoqa se Babiloni. Ura sari na tinoni pu mae guadi pa kali gede si mae pude razaia na huaria si asa.

⁴⁹Babiloni evaṉia sa minate tadi na tie pa doduruna sa kasia popoa, meke kamahire Babiloni si kaqu hoqa sina evaṉia sa sa minate tadi soku tie Izireli. Arau, Zihova, ele zama nia si hie.”

⁵⁰Zama la se Zihova koa rina Nana tinoni Izireli pa Babiloni, “Ele govete nia gamu sa minate! Ego mi taloa kamahire! Lopu aqa! Koa va seu pa mia popoa si gamu, ba mi balabala Au si Arau, sa mia Tamasa, mamu balabala ia tugo si pa Zerusalema.

⁵¹Zama si gamu, ‘Ele tava gore hokara si gami, meke tava kurekure; va nonoga ia gami sapu lopu ta tokae hokara si gami sina sari na tie karovodi si ele nuquru lai sari vasina hopena koa sa Zelepade,’ gua.

⁵²Ke gua asa, zama si Arau sapu korapa mae sa totoso pana kaqu va kilasi Rau sari na beku Babiloni, meke sari na tie bakoradi si kaqu hilala pa doduruna sa popoa.

⁵³Be guana boka kamo sage la pa galegalearane se Babiloni meke tavetia si keke goba ṉiṉirana vasina, ba kaqu garuni tugo Rau sari na tinoni pude huaria si asa. Arau, Zihova, ele zama nia si hie.”

⁵⁴Zama se Zihova, “Mi va avosia sa mamalaiṉi kinabo pa Babiloni, kuliusu nia sa sa tina huara nomana koasa popoa.

⁵⁵Arau huaria si pa Babiloni meke va mokomokoa si asa. Sari na qeto minate varipera si nuquru zukuru nono la guana puzaka tovovo meke rapata pa vinevehe kinukili.

⁵⁶Mae si arini pude zaloa si pa Babiloni gua; ta saputu vagi sari nana tie varipera, meke ele ta moku sari nana bokala. Arau si keke Tamasa sapu va kilasia sa kinaleana meke kaqu va kilasia Rau si pa Babiloni gua sapu pada koari dia tinavete kaleadi.

⁵⁷Kaqu va naponapoi Rau sari na dia palabatu arileadi sari na dia tie tumatumaedi, sari na koimata, meke sari na tie varipera. Kaqu puta si arini meke lopu kaqu vaṉunu pule hokara. Arau sa Baṉara si ele zama, sapu Arau, se Zihova Tadi na Qeto Minate si ele zama.”

⁵⁸Hiera gua pule si zama nia e Zihova tadi na Qeto Minate, “Sa goba ṉiṉirana pa Babiloni si kaqu ta gona gorei pa pepeso, meke kaqu ta sulu sari na sasada ululudi tanisa. Sa tinavete tadi na butubutu si namu loke laedi hokara, ta sulu palae sari dia tinavete ṉiṉiradi,” gua si Asa.

⁵⁹Sa tie sapu luli meke kopu nia sa inene tanisa baṉara Zedekaea si e Seraea, sa tuna koreo e Neraea meke na tuna sa tuna koreo e Maseia. Koa sa vina made vuaheni sipu koa baṉara pa Ziuda se Zedekaea, si la pa Babiloni se Seraea luli koa sa baṉara, meke vala i rau koa sa si kaiqa vina balau.

⁶⁰Kuberia rau pa keke pepa ta viqusuna sa guguadi ri doduru tina huara saripu kaqu ta evaṉa pa Babiloni, gua tugo sari doduru tiṉitoṉa gua hire pa guguana Babiloni.

⁶¹Tozi nia rau se Seraea, “Pana la kamo si goi pa Babiloni si mamu tiro va ululae lani koa rina tinoni sari doduru tiṉitoṉa pu ta kubere pa korapana.