Jeremiah 51:35-61

³⁵Ngan pag e girdi’ nu Zion ngar ga’argad, “Mang e yigi mang yu Babylon e aw ngak malngin e kireb ni kan rin’ ngodad!” Ngan pag e girdi’ nu Jerusalem ngar ga’argad, “Mang e yigi mang yu Babylon e aw ngak malngin e gafgow ni kan tay ngodad!”

³⁶Ma aram me ga’ar SOMOL ngak e girdi’ nu Jerusalem, “Bay gu aywegmed mu gu sulweg taban ngak e pi to’ogor romed e n’en ni kar rin’ed ngomed. Bay gu mliknag e gin ma yib e ran nu Babylon riy nge pi lul’ riy ni go’ ra mlik.

³⁷Re binaw nem e bayi par ni dakriy woton u but’ ni go’ gamanman ni malboch e ma par riy. Nike tamdag ya’an ni dakriy be’ nra par u rom, gubin e pi’in yad raguy miyad ra dugow.

³⁸Piyu Babylon e go’ ra tolulgad ni bod e layon miyad gowol ni bod pifak e layon.

³⁹Gur yad ba dogol? Bay gu fal’eg ba mur ni farad ngar ching niged miyad felfelan’. Bay ra mulod ni dakriy e ngiyal ni yad ra od.

⁴⁰Bay gu fekrad ni ngan thangrad, ni bod rogon e saf, pifak e saf nge kaming. I Gag SOMOL e kugog e pi thin ney.”

⁴¹I ga’ar SOMOL u murung’agen yu Babylon: “Fare binaw ni i yog e fayleng e sorok ngay e kan kol! Kari aw yu Babylon nga bang u mit e pi nam!

⁴²Pi to’ogor rok yu Babylon e bay ra puw gad ngarbad ni gawa n’ew ni nge tharay fare binaw.

⁴³Pi yochi binaw u charen i yan e pig ya’an nga bang ke bod lan e ted ni dariy e ran riy, ni dakriy be’ nma par riy fa milekag riy.

⁴⁴Bay gu gechignag Bel, ni fare got nu Babylon, mu gu gagiyegnag nge chuwan’ ko tin ni iring; ma pi nam e bay dab kur tedfan bi’id. “Ke puth e yoror nu Babylon nga but’.

⁴⁵Gimed e girdi’ nu Israel, mmil gad ngam chuwgad u wur! Mmil niged e pogofan romed ko damumuw rog nib gel.

⁴⁶Dabi mulan’med ara mu rus gad ni bochan e tin kam rung’aged. Gubin e duw ma yug reb e thin e be wear ni murung’agen e wodmang u lan binaw nge pilung ni be togopluw reb nga reb.

⁴⁷Ma aram e ngiyal’ ni nge taw ngay ni bay gu kirebnag e pi liyos nu Babylon. Ga’ngin fare nam ni bay ni tamra’nag, ma gubin e girdi’ riy ni bay ni li’rad ngarm’ad.

⁴⁸Gubin e ban’en u daken e fayleng ngu lanelang e bay ra tolul niged e felfelan’ ko ngiyal nra aw yu Babylon nga pa’ e girdi’ ko lel’och ni karbad ni ngar kireb niged.

⁴⁹Yu Babylon e ir e k’aring e yam’ ngak e girdi’ u ga’ngin e fayleng, ma chiney e nge mul yu Babylon ni bochan e ir e k’aring e yam’ ngak e girdi’ nib yo’or u Israel. I Gag SOMOL e kugog e pi thin ney.”

⁵⁰I SOMOL e be ga’ar ko girdi’ rok u lan yu Babylon: “Kam thaygad ko yam’! Ngam marod e chiney ni dab mu son gad! Yug aram rogon ni gimed ra palog nga orel, ma dab mu paged talin ni Gag e SOMOL romed, mi i par yu Jerusalem u lanin’med.

⁵¹Gimed be ga’ar, ‘Kandariyfan nagdad ma kan tamra’ nagdad; kug nanged ni kari m’ay gelingmad ni bochan e pi milekag e yad e ke gel farad ko yungin nib thothup u lan fare Tempel.’

⁵²Ere chiney, e gu be yog ni aram e nge taw ko ngiyal’ ni bay gu kirebnag e pi liyos nu Babylon, ma pi’in nike maad’ad e bay ur gel’gel’gad u ga’ngin yang fare nam.

⁵³Fa’an mang e rayag ni yan yu Babylon nga lanelang nge toy e tagil’ nib gel u rom, ma kug ra l’oeg e girdi’ ni ngar kireb niged. I Gag SOMOL e kugog e pi thin ney.”

⁵⁴Be ga’ar SOMOL, “Motoyilgad nga laman e meyor u Babylon, ni yibe duloloy’nag fare riya’ nike aw ngalan e re nam nem.

⁵⁵Gu be buthug yu Babylon nggu tay nike mathgulngan. Pi salthaw e bay ra po’gad nga langgin ni bod e n’ew ngar chamgad ngay nike mada’ lamrad ngalang ni yad be tolul.

⁵⁶Karbad ni ngar kireb niged yu Babylon; kan kol e pi salthaw riy, ma pi gan e gat’ing rorad e ke m’ingm’ing. I Gag ba Got ni gu ma gechignag e kireb, ma bay gu rin’ nga Babylon e tin nib merag ni ngan rin’ ngay.

⁵⁷Bay gu gagiyegnag e pi tolang riy ngar chinggad — girdi’ nib gonop, nge tayugang’, nge salthaw. Bay ra molod ni dab kur odgad. I gag fare pilung e gu be non; ni Gag fare SOMOL ni Gubin ma Rayag Rok.

⁵⁸Fapi yoror rok yu Babylon nib gel e bay ni buthug nga but’, nge pi garog riy ni totolang e ngan urfiy nga but’. Maruwel nma tay e pi nam e gubin ni dariy rogon; tin ur athamagiliyed e ke daramram. I Gag fare SOMOL ni Gubin ma Rayag Rok e kugog e pi thin ney.”

⁵⁹Serayah e ir e ta’ayuw rok Zedekiah ni Pilung, i Serayah e be’ nib mo’on ni fak Neriah nib mo’on ni fak Mahseyah. U lan e bin aningeg e duw nike pilung Zedekiah u Judah, me un Serayah ngak nga ranow nga Babylon, mu gog boch ban’en ngak ni nge rin’.

⁶⁰Kug yoloy ngalan e babyor gubin e riya’ nra yib nga daken yu Babylon, nge ku tin ba’aray ni murung’agen yu Babylon.

⁶¹I lungug ngak Serayah, “Nap’an ni ga ra taw nga Babylon, ma dabisiy ni ngam be’eg ngak e girdi’ nib ga’ lamam gubin e n’en ni kan yoloy ngaray.