Yeremi 51:35-61

³⁵Siyon kaane a falama, e naxa, “Babilɔn kaane gbalon naxan saxi en fari, Ala xa na sa e fan fari!” Yerusalɛn kaane a falama, e naxa, “Babilɔn kaane faxan naxanye ti en konni, Ala xa na wunla goronna lu e xun ma.”

³⁶Nanara, Alatala ito nan falaxi, a naxa, “N na ɛ xun mayɛngɛma nɛn, n na ɛ gbeen ɲɔxɔma nɛn, n yi Babilɔn yamanan baa gbeen xɔri, n yi a baan xunna xara.

³⁷N Babilɔn taan kalama nɛn, a findi gɛmɛ malanxine ra, e nun kankone kurudena. A fe yi magaxu ayi, muxune yi kolin a kala kii ma. Muxu yo mi dɔxɛ a yi.

³⁸A muxune xaɲɛ alo yatane, e wurundunma alo yata sɛnbɛmane.

³⁹Koni e na kunfa ɲaxi ra, n donse donna yitɔnma nɛn e xa e yi n ma xɔlɔn dɔlɔn min han e xunna yi keli e ra, e yi xi habadan, e mi fa kelɛ mumɛ!” Alatalaa falan nan na ra.

⁴⁰“N yi e xali alo yɛxɛɛ diine na siga e faxadeni, alo kontonne nun kɔtɔne.”

⁴¹“Ee! Sesaki taan suxuma nɛn! A tan naxan matɔxɔma bɔxɔ xɔnna taane birin yɛ! Ee! Babilɔn taan naxɔrima nɛn siyane tagi!”

⁴²“Fɔxɔ igen sama nɛn Babilɔn bɔxɔn xun ma, a mɔrɔnne yi dangu a fari.

⁴³A taane kalama nɛn, a findi bɔxɔ xaren nun tonbonna ra, muxu yo mi dɔxɛ yamanan naxan yi, adamadi yo mi danguɛ dɛnaxan yi.

⁴⁴N Beli suxuren ɲaxankatama nɛn, Babilɔn taana ala. A naxan gerunxi, n na bama a dɛ nɛn. Siyane mi fa luma sigɛ a ma sɔnɔn. Babilɔn taan makantan yinne yatin birama nɛn.

⁴⁵N ma yamana, ɛ mini a yi, birin xa a niin makata! Ɛ masiga Alatalaa xɔlɔ gbeen na!

⁴⁶Ɛ nama tunnaxɔlɔ ɛ ma, ɛ nama gaxu feene yɛɛ ra naxanye xinla mɛma yamanani! Bayo fena nde xinla mɛma nɛn to fari, fe gbɛtɛ xinla yi mɛ faraxi. E naxa, a gbalon na a ra yamanani, hanma mangana nde bata keli nde xili ma.

⁴⁷Nanara, lɔxɔne fama, n Babilɔn suxurene ɲaxankatama lɔxɔn naxanye yi. N na e yamanan birin nayarabima nɛn a faxa muxune binbine birin yi lu biraxi taan xun xɔn.

⁴⁸Naxanye birin kore xɔnna nun bɔxɔ xɔnna ma, ne e xuini tema nɛn Babilɔn xili ma sɛwani, bayo halagi tiine fama nɛn a xili ma sa keli sogeteden kɔmɛnna ma,” Alatalaa falan nan na ra.

⁴⁹“Babilɔn taan kalama nɛn Isirayila faxa muxune fe ra alo muxune bata faxa dunuɲa yiren birin yi Babilɔn taana fe ra kii naxan yi.

⁵⁰Ɛ tan naxanye mi faxaxi yɛngɛni, ɛ gi, ɛ nama ti de! Ɛ nɛma sa yamana makuyeni, ɛ miri Alatala ma, Yerusalɛn ma fe yi lu ɛ bɔɲɛni!”

⁵¹Yamana a falama nɛn, e naxa, “En yagi nɛn, en to konbi ti xuine mɛ, yagin yi lu en yɛtagi, bayo xɔɲɛne bata so yire sariɲanxine yi Alatalaa banxini.”

⁵²Alatalaa falan ni ito ra, a naxa, “Lɔxɔne fama, n suxureni itoe ɲaxankatama lɔxɔn naxanye yi, muxu maxɔlɔxine kutun xuiin yi mini e yamanan birin yi.

⁵³Hali Babilɔn taan te tiyɛ han kore xɔnna, a yire makantanxine yi so raxɔlɔ ayi, n halagi tiine rafama nɛn a xili ma,” Alatalaa falan nan na ra.

⁵⁴“Gbelegbele xuiin tema nɛn Babilɔn taani, gbalo gbeen naba xuiin mɛma nɛn Babilɔn kaane yamanani.

⁵⁵Bayo Alatala Babilɔn kalama nɛn, a yi a xui gbeen dan. Yaxune fa xuiin minima nɛn alo fɔxɔ igen mɔrɔnne xuxu xuina, e yi sɔnxɔ alo kuye sarinna.

⁵⁶Halagi tiin fama nɛn Babilɔn taan xili ma, a yi a sofane suxu, a yi e xanle kala. Bayo Ala nan Alatala ra naxan a gbeen ɲɔxɔma, a muxune birin saran e kɛwanle ra.

⁵⁷N na n ma xɔlɔn dɔlɔn fima a kuntigine nun a fe kolonne ma nɛn han e xunne yi keli e ra, e nun a yamana kanne nun a kitisane nun a sofane, e yi xi habadan, e mi fa kelɛ sɔnɔn!” Mangana falan nan na ra, naxan xili Alatala Sɛnbɛn Birin Kanna.

⁵⁸Alatala Sɛnbɛn Birin Kanna ito nan falaxi, a naxa, “Babilɔn taan makantan yin gbeene rabirama nɛn, a taan so dɛ gbeene yi gan. Nayi, siyane e yɛtɛ yixadanma fuyanna nin, yamanane muxune wali xɔnne sa luma tɛɛn nin.”

⁵⁹Nabi Yeremi na falane nan xɛraya so Neriyaa dii xɛmɛn Seraya yii, Maxiseya mamandenna, kuntigi gbeena nde, a to siga Babilɔn yi e nun Yuda mangan Sedeki, na mangayaan ɲɛɛ naaninden ma.

⁶⁰Gbalon naxan birin yi lanma a xa Babilɔn sɔtɔ, Yeremi yi ne birin sɛbɛ kɛdin kui, a falan naxanye birin sɛbɛ lan Babilɔn ma.

⁶¹Yeremi yi a fala Seraya xa, a naxa, “I na so Babilɔn yi waxatin naxan yi, falani itoe birin xaran i xuini texin na,