Yeremi 51:35-61

³⁵Yen sɔ̃, Bɑbilonigii be, bu nɔni sɔ̃ɔro dɑm mɛ bɑ mɑn dɔren sɔ̃, kpɑ yɛm mɛ bɑ yɑri mi, mu wɔri ben wiru wɔllɔ.

³⁶Wee ye Yinni Gusunɔ u geruɑ Yerusɑlɛmugibun sɔ̃. U nɛɛ, wee, kon bɛɛ sɑnnɑ. Kon Bɑbilonin dɑɑnu kɑ yen bwii kpuro gberɑsiɑ.

³⁷Bɑbiloni koo kowɑ bɑnsu mi gbeeku bɔ̃nu nu ko n wɑ̃ɑ. Tɔnu kun ko n mɑɑ wɑ̃ɑ mi, kpɑ bu ye yɛ̃ɛ.

³⁸Wee yen tɔmbɑ ginɑ sɑ̃ɑ nge gbee sinɑnsu si su kukirimɔ.

³⁹Adɑmɑ sɑnɑm mɛ bɑ gɑ̀rì seewɑ, kon de bu tɑm nɔ sere n bɑndɑ, kpɑ bɑ n nuku dobu mɔ̀, kpɑ mu bu go, bu dweeyɑ sere kɑ bɑɑdommɑɔ. Bɑ ǹ mɑɑ seemɔ. Nɛ, Yinni Gusunɔwɑ nɑ yeni geruɑ.

⁴⁰Kon bu sɑkiriwɑ nge yɑ̃ɑnu kɑ bonu yɑɑ goo yerɔ.

⁴¹Wee ye Yinni Gusunɔ u geruɑ Bɑbilonin sɔ̃. U nɛɛ, ɑnnɑ ɑ wɑ mɑ Bɑbiloni, wuu bɔkɔ ge tɔmbɑ rɑɑ siɑrɑmɔ, yɑ wɔrumɑ. Wee, yɑ kuɑ bɑnsu bwesenu kpuron suunu sɔɔ.

⁴²Nim kurenu nu ye swee, mɑ nu ye wukiri.

⁴³Yen bɑru kpɑɑnu nu kuɑ bɑnsu, mɑ tem mu gberɑ mu kuɑ tem sɑɑrɑm. Goo kun mɑɑ wɑ̃ɑ mi. Goo ku rɑ mɑɑ sɑre mi.

⁴⁴Yinni Gusunɔ u mɑɑ nɛɛ, kon Bɑbilonin bũu wi bɑ mɔ̀ Bɛli seesi. Kon nùn siɑsiɑ ye u rɑɑ mwɛ, kpɑ tɔmbu bu ku mɑɑ nɑ win mi. Wee Bɑbilonin gbɑ̃rɑrɑ wɔrumɑ.

⁴⁵Bɛɛ, nɛn tɔmbu Isirelibɑ, i yɑrio min di. Bɑɑwure u win wɑ̃ɑru wɔro nɛn mɔru bɑkɑ ye yɑ ween di.

⁴⁶I ku nɑndɑ. I ku mɑɑ diiri lɑbɑɑri ye yɑ nɔɔrɑmɔ tem mɛ kpuro sɔɔn sɔ̃. Wɔ̃ɔ bɑɑgere kɑ gen lɑbɑɑriwɑ. Tɔmbu bɑ ko n dɑm diinɑmɔ, kpɑ sinɑmbu bɑ n seesinɑmɔ.

⁴⁷Adɑmɑ sɔ̃ɔ teeru kon Bɑbilonin bũnu seesi, kpɑ yen tem kpuron tɔmbu bu sekuru wɑ. Gonu nu ko n tɛriewɑ bɑɑmɑ kpuro.

⁴⁸Wɔllɔ kɑ temɔ kɑ yɑm kpuro, nuku dobun kuuki koo nɔɔrɑ Bɑbilonin sɔ̃. Domi yibɛrɛbɑ bɑ koo nɑ sɑɑ sɔ̃ɔ yɛ̃sɑn nɔm geu giɑn di, bu ye kpeerɑsiɑ.

⁴⁹Yen tɔmbɑ tɔn dɑbinu go hɑnduniɑ kpuro sɔɔ. Tɛ̃ yen tiin sɑɑ yɑ tunumɑ yu kɑ wɔrumɑ. Domi bɑ Isirelibɑ dɑbinu go.

⁵⁰Bɛɛ Isirelibɑ, bɛɛ be i kisirɑ ben nɔmɑn di, i ku mɑɑ yɔ̃rɑ mini. I doonɔ n tomɑ Bɑbilonin di. Sɑɑ min di, i Yinni Gusunɔ yɑɑyo kɑ bɛɛn wuu Yerusɑlɛmu.

⁵¹Mɑ Isirelibɑ bɑ nɛɛ, sɑnɑm mɛ sɑ nuɑ bɑ sun wɔmmɔ, sekurɑ rɑ sun mwɛwɑ. Sɑnɑm mɛ yibɛrɛbɑ bɑ Yinni Gusunɔn sɑ̃ɑ yeru wɔri bɑ kɔsukɑ, sekurɑ sun mwɑwɑ.

⁵²Adɑmɑ wi, Yinni Gusunɔ u nɛɛ, wee, tɔ̃nu sisi nì sɔɔ u koo Bɑbilonin bũnu seesi, kpɑ be bɑ mɛɛrɑ wɑn wuri yi nɔɔrɑ tem kpuro sɔɔ.

⁵³Bɑɑ Bɑbilonigibu bɑ̀ n seewɑ bɑ dɑ wɔllɔ, bɑɑ bɑ̀ n ben gbɑ̃rɑnun dɑm sosi sere goo kun kpɛ̃ u dɑ mi, kɑ mɛ, u koo de yibɛrɛbɑ bu bu wɔri bu kɑm koosiɑ.

⁵⁴Kɑm kobu Bɑbilonin tem deemɑ, mɑ kuuki nɔɔrɑmɔ yen wusu sɔɔ.

⁵⁵Yinni Gusunɔwɑ u ben wusu kɑm koosiɑ. U koo de ben kuuki yi kpe. Yibɛrɛbɑ bɑ wee bɑ wɔki nge nim wɔ̃ku.

⁵⁶Bɑ wee bu Bɑbilonigii be wɔri, kpɑ bu ben tɑbu kowo dɑmgibu mwɛɛri bu ben tɛnnu bɔɔku. Domi Gusunɔ u sɑ̃ɑwɑ Yinni wi u rɑ bɑɑwure kɔsie ye u kuɑ.

⁵⁷U sɑ̃ɑwɑ sunɔ. Win yĩsirɑ wɔllu kɑ tem Yinni. U nɛɛ, u koo de tɑm mu Bɑbilonin sinɑmbu go, kɑ ben bwisigibu kɑ ben tem yɛ̃robu kɑ ben wirugibu kɑ ben tɑbu durɔ dɑmgibu kpɑ bu dweeyɑ sere kɑ bɑɑdommɑɔ bɑ kun mɑɑ seewe.

⁵⁸Bɑbilonin gbɑ̃rɑ bɑkɑ ni, nu koo wɔrumɑ. Nin kɔnnɔ bɑkɑ si, su koo dɔ̃ɔ mwɑɑrɑ. Nge mɛyɑ sɔmbu te bɑ kuɑ gbɑ̃rɑ ten sɔ̃, tɑ koo kɑm ko. Ben hɑniɑ kpuro yɑ koo kɑm kowɑ dɔ̃ɔ sɔɔ.

⁵⁹Serɑyɑ, Nɛriyɑn bii, Mɑseyɑn debubu, u sɑ̃ɑwɑ Sedesiɑsi, Yudɑbɑn sinɑ bokon sɔm kowobun wirugii. Sedesiɑsin bɑndun wɔ̃ɔ nnɛse sɔɔrɑ bɑ dɑ Bɑbiloniɔ wi kɑ sinɑ boko.

⁶⁰Yerɑ Yeremi u yoruɑ tireru sɔɔ kɔ̃sɑ ye yɑ koo Bɑbiloni deemɑ kɑ sere mɑɑ gɑri kpuro yi Yinni Gusunɔ u geruɑ Bɑbilonin sɔ̃.

⁶¹Mɑ u Serɑyɑ yiire u nɛɛ, sɑnɑm mɛ ɑ turɑ Bɑbiloniɔ, ɑ kookɑri koowo ɑ gɑri yini gɑri kɑ dɑm tɔmbu bu nɔ.