IEREMIA 51:35-61

³⁵Siona dekenai idia noho taudia do idia gwau, “Dagedage karadia ai dekenai, bona aiemai varavara taudia dekenai be Babulonia ena kerere.” Ierusalema dekenai noho taudia do idia gwau, “Babulonia taudia ese ai idia hisihisi henia, bona hari aiemai rarana ena davana do idia abia be namo.”

³⁶Unai dainai, Lohiabada ese, Ierusalema noho taudia ia hamaoroa, ia gwau: “Lau ese umui dainai do lau heatu, bona umui idia hadikaia taudia edia davana do lau henia. Lau ese Babulonia ena sinavai do lau hakaukaua, bona iena ranu lohilohi gabudia edia heau, be do lau hadokoa.

³⁷Babulonia be momoru dika momokani haboua gabuna do lau halaoa, uda sisia idia loaloa noho gabuna. Taunimanima ese Babulonia do idia itaia noho, mai gari bona mai hereva dika danu. Tau ta be unuseni do ia noho lasi momokani.

³⁸Babulonia taudia ibounai ese, laiona natudia bamona idia boiboi noho. Laiona maragidia bamona idia maumau noho,

³⁹badina edia aria lalonai, uaina muramura idia inua momo. To uaina dainai, edia lalodia idia do siahu momokani neganai, aria ma ta do lau abia hegaegae idia edia, idia do lau hakekeroa, ia lao bona do idia mahuta mase. Bona do idia mahuta noho ia lao hanaihanai, do idia noga lasi. Lau inai Lohiabada, lau hereva noho.

⁴⁰Lau ese idia do lau hakaudia diho, ala-ala taudia ese idia do idia alaia ore totona, mamoe edia natudia idia alaia mase bamona, bona mamoe tau bona nanigosi tau idia alaia mase bamona.”

⁴¹Lohiabada ese Babulonia ia herevalaia inai bamona: “Babulonia hanua be idia abia vadaeni. Tanobada ibounai ese idia hanamoa bada hanua, be tuari orea ta ese ia dogoatao vadaeni. Babulonia madi, be gari bona hoa gauna lau halaoa vadaeni, bese idauidau edia vairana dekenai.

⁴²Tuari be davara bada bamona, ia daekau mai, iena hurehure ese, Babulonia idia koua momokani vadaeni.

⁴³Babulonia ena hanua badadia, be gari bona hoa gaudia idia lao vadaeni. Idia be tano kaukau, ranu noho lasi gabudia, tau ta unuseni do ia noho lasi gabudia. Taunimanima ta ese, unai gabudia do ia raka hanaia lasi momokani.

⁴⁴Lau ese Bel dirava ena dika davana, do lau henia Babulonia dekenai. Ia ese ia henaoa gaudia, be do lau abia lou, bona bese idauidau ese, ia do idia tomadiho henia lou lasi. Babulonia hanua ena magu, be do idia moru diho.

⁴⁵“Egu bese taudia e, Babulonia dekena amo do umui raka siri! Umui ibounai be ta ta ena mauri, ena mauri dalana do umui tahua. Lau Lohiabada egu badu mai siahu danu, dekena amo do umui heau mauri.

⁴⁶Badina be lagani ta sivarai ta ia mai, bona lagani ma ta sivarai ma ta ia mai noho, bona dagedage karadia, be tano lalonai idia karaia noho, bona lohia ta ese, lohia ma ta ia tuari henia noho. Unai karadia umui kamonai neganai, do umui gari lasi, to emui laloa goada do umui dogoatao noho.

⁴⁷Badina nega be kahirakahira do ia ginidae, lau ese Babulonia ena dirava koikoidia dekenai, edia dika davana do lau henia. Babulonia tano ibounai ese hemarai do ia abia, bona iena huana dekenai noho taunimanima ibounai, be do idia alaia mase.

⁴⁸“Unai neganai guba bona tanobada, bona edia lalonai noho gaudia ibounai ese, tuari kwalimu ane mai moale danu do idia abia, Babulonia be tuari ia lusi dainai, badina be mirigini kahana dekena amo, tuari orea taudia do idia mai, Babulonia do idia hadikaia ore totona. Lau inai Lohiabada, lau hereva noho.

⁴⁹Babulonia ese tanobada taudia momo ia aladia mase. Hari Babulonia be do ia moru, badina be ia ese Israela taudia ia alaia mase dainai.”

⁵⁰Lohiabada ese iena bese taudia Babulonia dekenai ia hereva noho, ia gwau, “Umui ese tuari dekena amo, umui heau mauri vadaeni, do umui heau lao, do umui gini kava lasi. Momokani emui gabu korikori dekena amo umui noho daudau, to umui ese lau Lohiabada do umui laloatao. Bona Ierusalema do umui laloa danu, do umui gwau,

⁵¹‘Ai be ai hemarai bada noho, badina be hereva dikadia, be ai dekenai idia hamaoroa. Hemarai dainai aiemai vairadia ai koua noho. Badina be idau bese taudia, be Lohiabada ena Dubu Helaga lalonai, iena gabu helagadia lalonai, idia raka vareai vadaeni.’ ”

⁵²Lohiabada ia gwau, “Unai dainai, lau gwau, nega be kahirakahira do ia ginidae, lau ese Babulonia ena dirava koikoidia, edia dika davana do lau henia, bona Babulonia ena tano kahana ibounai lalonai, mai edia bero taudia be do idia tai noho.

⁵³Bema Babulonia ena goada be bada dainai, ia ese guba dekenai bema ia daekau lao, bona unuseni guba dekenai, bema gabu aukana ia haginia danu, to lau ese bese ta do lau siaia lao, Babulonia do lau hadikaia ore totona. Lau inai Lohiabada, lau hereva vadaeni.”

⁵⁴Lohiabada ma ia gwau, “Kamonai! Taitai ena regena, be Babulonia dekenai ia vara noho,

⁵⁵badina be lau Lohiabada ese, Babulonia lau hadikaia noho. Lau ese hanua badana ena regena lau hadokoa noho. Tuari taudia be idia heau mai, davara hurehure mai regena bada bamona. Mai boiboi bada danu idia ese, Babulonia idia tuari henia noho.

⁵⁶Inai tuari taudia ese, Babulonia hadikaia ore totona idia mai vadaeni. Babulonia tuari taudia, be unai idau bese tuari taudia ese idia abia mauri. Babulonia taudia edia peva be idia makohia vadaeni, badina lau Lohiabada be davana henia Diravana, bona lau ese Babulonia ena kara hegeregerena, davana do lau henia.

⁵⁷Babulonia ena lohia taudia bona ena aonega taudia, bona ena tuari taudia dekenai, uaina do lau henia, vadaeni do idia kekero. Idia be do idia mahuta hanaihanai, do idia noga lasi. Lau King badana, Siahu Ibounai Lohiabada, be lau hereva noho.

⁵⁸“Babulonia hanua badana ena magu, lababa bada gauna, be tano dekenai do idia negea diho, bona ena magu iduaradia, ataiai herea gaudia, be lahi dekenai do idia gabua ore. Bese idauidau taudia edia hekwarahi be anina lasi. Basileia idauidau taudia, madi idia gaukara kava vadaeni, idia karaia gaudia be lahi ese ia gabua ore. Lau inai Siahu Ibounai Lohiabada lau hereva vadaeni.”

⁵⁹King Sedekaia ena hesiai tauna, ia naria tauna, be Seraia, Neraia Maseaia ena natuna tau. King Sedekaia ese Iuda ia naria ena lagani namba 4 neganai, Seraia be king Sedekaia danu Babulonia dekenai idia lao. Unai neganai lau Ieremia ese Seraia dekenai hereva haida lau hamaoroa.

⁶⁰Lau Ieremia ese dika ibounai Babulonia dekenai do idia vara gaudia be buka ta lalonai lau torea.

⁶¹Vadaeni lau ese Seraia lau hamaoroa, lau gwau, “Babulonia dekenai oi ginidae neganai, inai buka ena hereva ibounai do oi duahia.