Sandane 27:7-26

⁷Naxan lugoxi, na nan a mɛma kumin na, koni hali naxan xɔlɔ, na ɲaxun kamɛtɔɔn dɛ.

⁸Xɛmɛn naxan a mɛma a konna ra, na luxi nɛn alo xɔliin na a mɛ a tɛɛn na.

⁹Latikɔnɔnna nun wusulanna muxun bɔɲɛn nan nasɛwama, i xɔyina fanna dangu i yɛtɛ miriyane ra.

¹⁰I nama i xɔyin nabeɲin, hanma i baba xɔyina. I nama siga i ngaxakedenna fɛma gbalo waxatini, i dɔxɔ boden fisa i ngaxakeden makuyen xa.

¹¹N ma diina, findi fekolonna ra, i n bɔɲɛn nasɛwa. Nayi, naxan na n nayagi, n nɔɛ na yabɛ nɛn.

¹²Xaxilimaan na gbalon to fɛ, a luxunden fenma nɛn, koni fe kolontarene dangun nɛn tun, ɲaxankatan yi e sɔtɔ.

¹³Naxan na donla tongo i yii muxu gbɛtɛ xa, a mi naxan kolon, na kanna domaan tongo a ɲɔxɔni. Tolimaan maxɔdin a ma, xa a raba xɔɲɛn nan xa.

¹⁴Duban xui yitexin na xɔtɔn xɔtɔnni, na yatɛma dangan nan na.

¹⁵Ɲaxanla a yɛngɛ xunxurine luxi nɛn alo tule igen na lu dindinɲɛ banxini.

¹⁶A ramaran naxɔlɔ alo foyena, alo muxun na turen sa a yiin kui.

¹⁷Wuren nan wuren nalemunma, muxun nan muxuni tɔnma.

¹⁸Wudi binla masuxu muxun nan a bogin donma. Naxan na a kanna masuxu, na binyama nɛn.

¹⁹Muxuna a yɛtɛ yɛtagin nininna nan toma igeni. Muxun bɔɲɛn fan a yɛtɛ kɛɲaan nan yitama.

²⁰Laxira nun yahannama mi wasama. Muxun yɛɛne fan mi nɔɛ wasɛ.

²¹Gbetin nun xɛmaan nasɛnsɛnma sulun tɛɛni, koni muxun kɛɲaan fɛsɛfɛsɛma a tantun kiin nan xɔn.

²²Hali i xaxilitaren din wunla kui se kɛsɛne tagi wulin diin na, a mi bɛ a xaxilitareyani.

²³I ya xuruseene kolon ki faɲi, i yi i ɲɔxɔ lu i ya xuruse kurune xɔn,

²⁴amasɔtɔ nafunla mi luma habadan, mangayaan mi marama i ya denbayaan xa mayixɛtɛn nun mayixɛtɛni.

²⁵I na sɛxɛne lanfun, i yi e ramara xuruseene xa, sɛxɛ nɛnɛn mɔn yi mini, i geya ma sɛxɛne malan xuruseene balon na,

²⁶nayi, yɛxɛɛne xabene findima i ya dugine ra nɛn, kontonne yi findi gbetin na i xɛɛn sarama naxan na.