Olcueih 27:7-26

⁷Aka hah kah hinglu loh khoilitui pataeng a suntlae dae, aka pongnaeng kah hinglu long tah khahing khaw boeih a didip sak.

⁸A hmuen lamkah aka poeng hlang khaw, a bu dong lamkah aka coe vaa bangla om.

⁹Situi neh bo-ul loh lungbuei ko a hoe sak. Hinglu dongkah cilsuep loh a hui taengah olding la om.

¹⁰Namah hui neh olrhoep khaw na pa kah a hui khaw hnoo boeh. Rhainah hnin ah na manuca kah im te na cet pawt ve ne. A hla kah manuca lakah a yoei kah na imben te then ngai.

¹¹Ka ca nang cueih lamtah ka lungbuei a kohoe saeh. Te daengah ni kai aka veet te ol ka thuung thai eh.

¹²Aka thaai long tah boethae a hmuh vaengah a thuh tak, hlangyoe rhoek long tah a paan uh dongah lai a sah uh.

¹³Hlanglak kah rhi a khang pah vaengah a himbai mah lo saeh, kholong nu ham atah a laikoi pa akhaw.

¹⁴Mincang a thoh neh ol ue la a hui yoethen aka pae khaw, anih te rhunkhuennah lamni a nawt eh.

¹⁵Hohmuhnah neh olpungkacan nu khaw, tlanbuk hnin vaengkah tuicip a puh neh vai uh.

¹⁶Anih aka khoem te khohli aka khoem bangla, a bantang kut bueng neh situi aka paco bangla om.

¹⁷Thi te thi loh a haat sak bangla, hlang khaw a hui kah mikhmuh long ni a haat sak.

¹⁸Thaibu aka kueinah loh a thaih a caak vetih, a boei kah bitat aka ngaithuen te a thangpom ni.

¹⁹Tui sokah maelhmai neh a maelhmai a loh uh bangla, hlang kah lungbuei he hlang taeng long ni a tueng.

²⁰Saelkhui neh Abaddon, Abaddon long tah hah rhoi tlaih pawh. Hlang kah a mik he khaw hah tlaih pawh.

²¹Cak hamla cak am, sui hamla hmai-ulh om dae, hlang tah a ka dongkah a hoemnah ming uh.

²²Hlang ang te sum khuikah canghum lakli ah sumkhal neh na daeng cakhaw a khui lamkah a anglat te coe mahpawh.

²³Na boiva kah a hmuethma te ming rhoe ming lah, tuping taengla na lungbuei te khueh.

²⁴Khohrhang he kumhal ham moenih, rhuisam khaw cadilcahma kah cadilcahma, tekah cadilcahma patoeng duela nguel mahpawh.

²⁵Sulrham khaw tlaai, toian khaw poe dae tlang kah baelhing bangla a coi uh.

²⁶Tuca rhoek te na pueinak la, kikong te khohmuen phu la om.