Sandane 25:5-28

⁵Xa i muxu ɲaxine ba mangan nabilinni, a mangayaan sabatima nɛn tinxinna xɔn.

⁶I nama i yɛtɛ yigbo mangan yɛtagi, i nama ti muxu gbeene tideni.

⁷Amasɔtɔ a fisa mangan xa a fala i xa, a naxa, “Te be n fɛma,” benun a xa i rayagi kuntigina nde yɛtagi i yɛɛn naxan na.

⁸I nama mafura i mawugɛ muxun fari kitisadeni. I nanse ligɛ dɔnxɛn na, xa a yoon sɔtɔ i ma.

⁹Yoon fen i adamadi boden xun ma kitisadeni, koni i nama muxu gbɛtɛna wundo feen makɛnɛn

¹⁰alogo naxan na a mɛ, na nama i konbi, i yi xili ɲaxin sɔtɔ habadan.

¹¹Xɛma sawurane nun gbeti se tofaɲine, ne fan alo fala faɲina.

¹²Fekolonne maxadi xuiin luxi nɛn a ramɛ muxun xa alo tunla soon xɛma daxin tunla ra hanma maxidi seen xɛma daxina a ma.

¹³Xɛra tinxinxina a xɛ muxun nii yifanma a ma nɛn alo foye faɲina se xaba waxatini.

¹⁴Naxan na a yɛtɛ matɔxɔ a finma seene fe ra anu a mi muxun kima, na luxi nɛn alo kundaan nun foyen naxanye mi tulen nafama.

¹⁵Muxu diɲaxin nɔɛ kitisaan mabandunɲɛ nɛn. Fala ɲaxumɛne fan nɔɛ xɔnna kalɛ nɛn.

¹⁶Xa i kumin to, naxan i lugɛ, na nan don, alogo i nama a radangu ayi, i yi a baxun.

¹⁷I nama lu sigɛ i bodena banxini yɛyɛ, alogo i ya fe nama xɔli ba a ra, a i raɲaxu.

¹⁸Muxun naxan wulen sama a adamadi boden xun ma, na luxi nɛn alo silanfanna nun gbelemɛn nun xalimakuli ɲɔɛ ralemunxina.

¹⁹I mi i yigin sɛ yanfantenni tɔrɔ waxatini, alo ɲin xɔlɛn nun san kalaxina.

²⁰I na sigin sa muxu sunuxin yɛtagi, na xɔlɔn luxi nɛn alo i na domaan ba muxun ma xunbenli, hanma i muluxunna sa furen dɛ.

²¹Xa kamɛna i yaxun ma, donseen so a yii. Xa min xɔnla a ma, igen so a yii,

²²bayo na luma a xa nɛn alo i tɛɛ wolonne nan malanma a xunna ma, Alatala nan i saranma.

²³Foyen naxan kelima sogeteden kɔmɛnna ma, na tulen nafama nɛn. Yanfa falane fan muxun yɛtagini xɔlɔma.

²⁴A fisa i lu banxin fari ma dogodogoni, benun ɛ nun ɲaxalan yɛngɛ gidin xa lu banxini.

²⁵Xibaru faɲin na keli yamana gbɛtɛ yi, na ɲaxun alo ige xunbenla muxu xadanxin xa.

²⁶Tinxin muxun naxan gaxun muxu ɲaxin yɛɛ ra na yifu nɛn alo tigin dunduxina hanma xɔɲin ige lɔxina.

²⁷A mi lan i yi kumi gbeen kɔn. I na binyen fan fen i yɛtɛ xa, binye mi na ra.

²⁸Muxun naxan mi a yɛtɛ suxuma, na kanna mi nɔɛ a yɛtɛ xun mafalɛ alo taan naxan nabilin yinna bata bira.