YAASINƆ 25:5-28

⁵ǹ zaakɛrinↄ bↄɛ kína aɛ, à kpata é gbãa kũ yãzɛdee musu.

⁶Ǹton n zĩnda sɛ́ lezĩ kína aɛro, ǹton vɛ̃ɛ gbɛ̃nsinↄ vɛ̃ɛkiiaro.

⁷Zaakɛ à sã̀ↄ à bennɛ ǹ mↄ́ aɛ kɛ̀ dɛ à n diɛ kɛ̃sãna gbɛ̃ bɛ̀ɛdeenↄ aɛla.

⁸Yã kɛ̀ n wɛ́ɛ è, ǹtongↄ̃ wãa kↄ̃n à gↄ̃gↄ̃naoro, zaakɛ tó wà n yã ɛgɛ bò, bↄ́n nɛ́ yãa ǹ kɛɛ?

⁹Tó nɛ́ɛ yã gↄ̃gↄ̃ↄ kↄ̃n n gbɛ̃daaao, ǹton bↄ kↄ̃n gbɛ̃ pãnde asiioro.

¹⁰Tó à mà, eé wí dammamɛ, n tↄ́ zaaa é yãa dↄro.

¹¹Yãmaa'ona a gurↄↄa nna lán mango tɛ̃aa kɛ̀ da kondogi taan bà.

¹²Ɔ̃ndↄ̃dee lɛ́damma maa gbɛ̃ kɛ̀ nↄ̀sɛ vĩinɛ lán vura zãblebↄ bà.

¹³Lán í yĩi ègↄ̃ dɛ nà pↄ́kɛ̃rinↄnɛ, lɛn zĩ̀ri náanɛdee dɛ lɛ gbɛ̃ kɛ̀ aↄ̃ à zĩ̀nↄnɛ, è ń nↄ̀sɛ yĩi kũńnɛ.

¹⁴Gbɛ̃ kɛ̀ è gbadana lɛ́ gbɛ̃ ben è daroo dɛ lán lou kɛ̀ sìsi à ĩa kàka èe maroo bàmɛ.

¹⁵Mɛnadee è tó kína a yãzɛ e, kpaɛna yãzi è tó à yã ble.

¹⁶Tó n zↄ́ è, ǹ ble mↄ́kↄ̃ana yão, lɛ ǹton ble bíta ǹ lɛ́ sↄkparo yãnzi.

¹⁷Ǹton n gbɛ̃daaa bɛ zɛ́ sↄro, lɛ àton kpasanyo à zanguro yãnzi.

¹⁸Gbɛ̃ kɛ̀ yã dì a gbɛ̃daaaa dɛ lán gò ke fɛ̃ɛdaa ke kàlɛ sↄ̃ntɛ bàmɛ.

¹⁹Làakarikpaɛna náanɛsaideea nawɛ̃akɛgurↄ dɛ lán swaa gyãree ke gbá ɛrɛ bàmɛ.

²⁰Pↄnna lɛ̀sina pↄsiadeenɛ dɛ lán utasimmana ĩampuu gurↄ ke yↄ̃nku kana bↄ̀a bàmɛ.

²¹Tó nↄaa e n ibɛɛ dɛɛ, ǹ pↄ́blee kpáa, tó ímiimɛ sↄ̃, ǹ à gba í.

²²Tó ń kɛ̀ lɛ, nɛ́ɛ à ↄↄ kaanɛ a lɛ́mmɛ, Dii é fĩa bonnɛ.

²³Lán gu'igbãroo kpa ĩa è mↄ́ louo nà, lɛn gbɛ̃pena è mↄ́ uusisinao lɛ.

²⁴Ina kpɛ́ làasin maa dɛ kuuna kpɛ́n lɛdo kↄ̃n nↄ swèedeeola.

²⁵Baaru nna bↄna bùsu zã̀azãn dɛ lán íyĩikpana gbɛ̃ kɛ̀ gbãaa yã̀aa bàmɛ.

²⁶Gbɛ̃ maaa kɛ̀ è we zaakɛrinɛ dɛ lán íbↄkii kɛ̀ à í yana bàmɛ, lán lↄ̀gↄ kɛ̀ à í yàka bà.

²⁷Zↄ́blena à ↄ gɛ̃ɛ maaro, gbɛ̃ bɛ̀ɛlina a zĩndanɛ gakui vĩro.

²⁸Gbɛ̃ kɛ̀ à a zĩndakũna dↄ̃roo dɛ lán wɛ́tɛ kɛ̀ à bĩi gborona bàmɛ.