Sandane 1:2-30

²Sandani itoe sɛbɛxi nɛn alogo muxune xa fe kolonna nun xurun sɔtɔ e yi xaxilimaya falane famu

³alogo e xa xuru, e xaxili sɔtɔ e tinxinna nun kiti sa kɛndɛn nun fe faɲin liga,

⁴fe kolontarene yi e ɲɔxɔ lu, foningene yi kolonna sɔtɔ, e feene yɛ fen.

⁵Fe kolonne xa itoe ramɛ, e yi e fe kolonna fari sa, xaxilimane yi fatan muxune maxadɛ

⁶alogo e xa sandane nun taline bunna kolon e nun fe kolonne wundo falane nun e maxɔdin tilinxine.

⁷Xaxilimayaan fɔlɔma Alatala yɛɛragaxun nan ma. Fe kolonna nun xurun naɲaxu xaxilitarene nan ma.

⁸N ma diina, i fafe nɛma i xuru falane tiyɛ, i tuli mati a ra, i nama i ngaa kawandi falane beɲin.

⁹E luxi nɛn alo mangaya kɔmɔtina i xunna alo ɲɛrɛna i kɔɛ i maxidi seen na.

¹⁰N ma diina, xa yulubitɔne kata i mayendendeni, i nama tin de!

¹¹Xa e a fala i xa, e naxa, “Fa nxu fɔxɔ ra! En sa dɔxɔ muxuna nde yɛɛ ra, en yi a faxa. En sa fu sɔntarena ndee ma,

¹²en yi e ɲɛɲɛne ralɔ ayi alo gaburun muxun gerunma kii naxan yi, e gbindin birin alo en tan nan yi sayaan na.

¹³En se faɲi kɛndɛn sifan birin sɔtɔma nɛn en yi en ma banxine rafe se tongoxine ra.

¹⁴Nxu na seene yitaxun, i fan i gbeen sɔtɔma nɛn, en ma gbetine birin yi malan gbeti sase kedenna kui.”

¹⁵N ma diina, i nama bira ne fɔxɔ ra mumɛ! I nama bira ne kiraan fɔxɔ ra de!

¹⁶E gima siga fe ɲaxin nabadeni, e mafura wunla raminɛ.

¹⁷Naxan na lutin nati xɔline yɛɛ ra xɔline yɛɛn tixi a ra, a na ligan nɛn fufafu.

¹⁸Muxu sifani ito lutin natima e yɛtɛ nan yɛɛ ra, e yanfan soma e yɛtɛ nan ma.

¹⁹Awa, naxanye kunfama se muɲaxine xɔn, ne niin luma na nin.

²⁰Xaxilimayaan falan tima kirane xɔn, a xuini te yamaan malandeni,

²¹a sɔnxɔma kira xunne ma yamaan gbo dɛnaxan yi, a kawandin ba taan so dɛɛne ra.

²²A naxa, “Ɛ tan fe kolontarene, fe kolontareyaan nafanɲɛ ɛ ma han waxatin mundun yi? Ɛ tan magele tiine, magelen nafanɲɛ ɛ ma han waxatin mundun yi, xaxilitarene yi kolonna raɲaxu?

²³N na ɛ sɔnna fala, ɛ n xuiin namɛ. Nayi, n nan n ma niin sa ɛ yii, n yi n ma falane makɛnɛn ɛ xa.

²⁴Koni bayo n bata ɛ xili, ɛ tondixi n ma xinla ratinɲɛ, n yi n yiini bandun ɛ xa, ɛ mi a suxu,

²⁵ɛ yi ɛ mɛ n ma maxadi xuine birin na n yi ɛ sɔnna fala ɛ xa, ɛ mi na yatɛ,

²⁶nayi, gbalon na ɛ sɔtɔ, n fan gelema ɛ ma nɛn. Fe magaxuxin na ɛ sɔtɔ, n yi ɛ magele.

²⁷Fe magaxuxin fama ɛ ma nɛn alo tule gbeena, gbalona ɛ sɔtɔma alo foye gbeen na keli, tɔrɔyaan nun nii yifɔrɛn yi ɛ yili.”

²⁸“Na waxatini, ɛ n xilima nɛn ɛ malideni koni n mi ɛ yabima, ɛ yi n fen koni ɛ mi n toma.

²⁹Amasɔtɔ ɛ bata kolonna raɲaxu, ɛ yi ɛ mɛ Alatala yɛɛragaxun na,

³⁰bayo ɛ mi tin n ma maxadi xuine ramɛ, n to ɛ sɔnna fala ɛ xa, na yi raɲaxu ɛ ma.