Olcueih 1:2-30

²cueihnah ming sak ham neh ol yakmingnah te yakming sak ham thuituennah la om.

³Thuituennah la loh ham neh duengnah, tiktamnah neh vanatnah te aka cangbam sak la om.

⁴Camoe hlangyoe taengah mingnah neh thuepnah, khinglangnah aka pae la om.

⁵Aka cueih loh hnatun saeh lamtah rhingtuknah la thap thil saeh, aka yakming loh a niing la hol saeh.

⁶Aka cueih rhoek kah thuidoeknah, nuettahnah olka neh amih kah olkael aka yakming sak la om.

⁷BOEIPA hinyahnah tah cueihnah, mingnah a tongnah la om tih aka ang loh thuituennah a hnoelrhoeng.

⁸Ka ca aw na pa kah thuituennah he hnatun lamtah na nu kah olkhueng khaw tloeng sut boeh.

⁹Te te na lu ham mikdaithen kah lukhueng neh na rhawn ham oi la om.

¹⁰Ka ca nang te hlangtholh rhoek loh n'hloih cakhaw rhoih boeh.

¹¹“Kaimih taengah pongpa lamtah hlang thii te rhongngol thil sih, ommongsitoe te a tloengtlaih la dawn sih.

¹²Amih te saelkhui bangla a hing la dolh sih lamtah tangrhom ah a pum la a cungpung bangla om saeh.

¹³A boei a rhaeng boeih neh a phu aka tlo te n'dang uh vetih mamih im he kutbuem neh m'baetawt sak mako.

¹⁴Na hmulung te kaimih lakli ah naan lamtah mamih boeih ham sungsa pakhat la om saeh,” a ti uh atah,

¹⁵Ka ca aw, amih kah longpuei ah cet boel lamtah na kho te amih kah a hawn lamloh hoi lah.

¹⁶Amih kah a kho tah boethae hamla cungpoeh uh tih thii long sak ham loe uh.

¹⁷Vaa phae boeih kah ah a hmaiah a tloengtlaih la lawk a tung uh.

¹⁸Amih loh amamih kah a thii te a rhongngol thil uh tih a hinglu te a mae uh.

¹⁹Mueluemnah dongah aka mueluem boeih kah a khosing te tah a boei kah a hinglu ni a rhawt pah.

²⁰Cueihnah tah vongvoel ah tamhoe tih toltung ah a ol a huel.

²¹Thohka ah aka kawk rhoek kah a lu ah a pang pah tih khopuei vongka ah ol a thui.

²²Hlangyoe nang loh mevaeng hil nim hlangyoe na lungnah ve, hmuiyoi rhoek tah amamih kah saipaat dongah naep uh tih, aka ang rhoek loh mingnah te a hmuhuet uh.

²³Ka toelthamnah he mael thil lah, ka mueihla he nang hamla kan thaa saeh lamtah ka ol he khaw nang kam ming sak eh.

²⁴Kang khue vaengah na aal uh tih ka kut kan cavaih vaengah nim te hnatung uh pawh.

²⁵Kai kah cilsuep boeih te na dul uh tih, kai kah toelthamnah khaw na ngaih uh pawh.

²⁶Kai khaw nangmih kah rhainah te ka nueih thil vetih nangmih ah birhihnah a thoeng vaengah kan tamdaeng ni.

²⁷Nangmih kah birhihnah tah khohli rhamrhael bangla ha pawk vetih na rhainah loh cangpalam bangla halo vaengah, citcai neh khobing loh nangmih te m'paan vaengah,

²⁸Kai ng'khue uh cakhaw ka doo mahpawh, kai n'toem uh cakhaw m'hmu uh bal mahpawh.

²⁹Te yueng te mingnah a hmuhuet uh tih BOEIPA kah hinyahnah te tuek uh pawh.

³⁰Kai cilsuep dongah naep uh pawt tih, kai kah toelthamnah khaw boeih a tlaitlaek uh.