Sandane 19:2-21

²Wɛkilɛn tɔnɔn mi na fe kolonna xanbi. Naxan na san mafura ayi, na sinma nɛn yinla ra.

³Adamadina a sigati kiini dɔxɔma a xaxilitareyaan nan xɔn, a fa xɔlɔ Alatala ma.

⁴Nafunla muxun xɔyine rawuyama ayi nɛn, koni yiigelitɔɔn xɔyina a makuyama a ra nɛn.

⁵Wule serena fe saranma a ra nɛn. Naxan wulen falama, na mi xunbama.

⁶Muxu wuyaxi kuntigin mafanma. Naxan muxune kima, na xɔyin nan birin na.

⁷Xa yiigelitɔna ngaxakedenne birin a raɲaxuma, a xɔyine e makuyama a ra nɛn dangu ne ra! Hali a lu e fɔxɔ ra, a e mafan han, e mi fa toma.

⁸Naxan na findi xaxilimaan na, na niin nafan a ma. Naxan na xaxinla fen, na bata hɛrin sɔtɔ.

⁹Wule serena fe saranma a ra nɛn. Wule falan halagima nɛn.

¹⁰A mi daxa xaxilitaren xa lu ɲaxunni, konyin fan mi lan a kuntigine yamari.

¹¹Xaxilimaan diɲa. Xunna kenla na a ra a xa, a na muxuna nde mafelu a hakɛn na.

¹²Mangana xɔlɔn luxi nɛn alo yatan wurundun xuina, a hinanna fan luxi nɛn alo xiila sɛxɛn ma.

¹³Gbalon nan dii xaxilitaren na a baba yii. Ɲaxanla a yɛngɛ xunxurine luxi nɛn alo igen na lu dindinɲɛ banxini.

¹⁴Banxin nun hɛrisigɛn fataxi muxun fafe kɛɛn nan na, koni Alatala nan ɲaxalan xaxilimaan soma a yii.

¹⁵Narin xixɔnla nan biran muxun na, koni kamɛn muxu narixin suxuma nɛn.

¹⁶Naxan na sariyan suxu, na a niin nan nakantanma, koni naxan na sigan ti a ɲaxin na, na faxama nɛn.

¹⁷Naxan na hinan sɛnbɛtaren na, na Alatala nan dolima, a saranna soma a yii nɛn.

¹⁸I ya diin xuru, bayo i yigin na nan na. I nama tin a xa faxa.

¹⁹Bɔɲɛ gbee kanna lan a yanginna fi. I na a xunba, i bata a rawɛkilɛ kalan ma.

²⁰I tuli mati kawandi xuine ra, i xurun sɔtɔ, alogo i xa findi fekolonna ra.

²¹Miriya wuyaxi nan muxun bɔɲɛni, koni Alatala a fe ragidixin nan nakamalima.