Sandane 16:12-28

¹²Kɛwali ɲaxine mi rafan mangane ma, bayo tinxinna nan e mangayaan sɛnbɛ soma.

¹³Tinxin muxuna falan nafan mangane ma, ɲɔndi falan nafan e ma.

¹⁴Mangana xɔlɔn faxan nan tima, koni xaxilimaan fatan a raxunbelɛ.

¹⁵Mangan na sɛwa, siimayaan na a ra, a fanna luxi nɛn alo kundaan naxan fama tulen na.

¹⁶Fe kolonna sɔtɔn tɔnɔn gbo dangu xɛmaan na pon! Xaxilimayaan sɔtɔn fisa gbetin xa ki faɲi!

¹⁷Muxu faɲine kiraan mi sigama fe ɲaxin mabinni. Naxan na a yengi dɔxɔ a sigati kiin xɔn, na a niin nakantanma nɛn.

¹⁸Kalan fama wason nan xɔn. Naxan na a yɛtɛ yite, na fe godomatɔɔn nan na ra.

¹⁹A fisa i lu magodoni yiigelitɔne yɛ, benun ɛ nun wasodene xa se muɲaxine yitaxun.

²⁰Naxan na a miri ki faɲi, na hɛrin sɔtɔma nɛn. Sɛwan na kanna xa naxan na a yigi sa Alatala yi.

²¹Fekolonna naxanye bɔɲɛ yi a falama nɛn ne ma a xaxilimane, fala faɲin xaxinla nan xun masama.

²²Siimayaan binla nan xaxilimayaan na xaxilimane xa. Xaxilitareyaan nan xaxilitarene ɲaxankatan na.

²³Fe kolonne bɔɲɛn nan fala faɲin naminima e dɛ, xaxilimaya falane nan e dɛ.

²⁴Fala faɲine findixi kumin nan na, e ɲaxun muxun niini e soma han muxun xɔnne alo senna.

²⁵Kirana nde tinxin adamadiin yɛɛ ra yi, koni a raɲanma sayaan nan ma.

²⁶Walikɛɛn kuiin nan a rawɛkilɛma wanla ma, kamɛn yi a karahan a xa lu walɛ.

²⁷Fuyantenna fe ɲaxini tɔnma, a dɛɛn muxune ganma alo halagi ti tɛɛna.

²⁸Muxu ɲaxin matandi feene nan nakelima, nafigin fan xɔyimane yitaxunma nɛn.