Sandane 13:8-23

⁸Muxuna nafunla nɔɛ a xunbɛ nɛn. Anu, muxune mi e kɔnkɔma yiigelitɔɔn tan ma.

⁹Tinxin muxune luma sɛwan nin kɛnɛnyani. Koni muxu ɲaxine luxi nɛn alo lɛnpun na tu.

¹⁰Wason yɛngɛne nan nakelima. Koni naxanye e tuli matima maxadi xuine ra, fe kolonyaan ne nin.

¹¹Seen naxanye sɔtɔxi a ɲaxin na mafurɛn, ne sigan ɲanɲɛ nɛn. Koni naxanye sɔtɔxi a faɲin na ndedi ndedi, ne xun masama nɛn.

¹²Yigi makuyen muxun tunnaxɔlɔma a ma nɛn. Koni muxun waxɔn feen na liga a xa, na a nii yifanma a ma nɛn alo siimaya wudin yɛtɛna.

¹³Naxan na a mɛ maxadi xuiin na, na kanna a saranna sɔtɔma nɛn. Naxan fan na yamarin suxu, na fan a saranna sɔtɔma nɛn.

¹⁴Fe kolonne xaranna fama nii rakisin nan na, a muxun ba sayaan lutin na.

¹⁵Xaxilimaan muxune kɛnɛn. Koni yanfantenna kiraan mi raɲanma a ma.

¹⁶Xaxilimaan feen ligama a kolonna nan xɔn. Koni xaxilitarena a daxuyaan nan nawangama.

¹⁷Xɛra ɲaxin birama kɔntɔfinla nin. Koni xɛra tinxinxin dandanna nan tima.

¹⁸Naxan mi a tuli matiyɛ a xuru falane ra, na yiigelitɔyaan nun yagin sɔtɔma nɛn. Koni naxan na a tuli mati a sɔnna fala muxune ra, na binyama nɛn.

¹⁹Muxun waxɔn feen na liga, na a nii yifanma a ma nɛn. Koni a mi rafan xaxilitarene ma, e xɛtɛ fe ɲaxin fɔxɔ ra.

²⁰Naxan nun fekolonne sigan tima, na fe kolonna tima nɛn. Koni xaxilitarene xɔyine tɔrɔma nɛn.

²¹Tɔrɔyaan yulubitɔɔn nan fɔxɔ ra. Koni hɛrin nan tinxin muxun saranna ra.

²²Muxu faɲin kɛɛn luma a mamandenne yɛɛ ra nɛn. Koni yulubitɔna nafunle sa findima tinxin muxune nan gbee ra.

²³Yiigelitɔne xɛɛn naxan bima na donse gbeen nan fima. Koni kiti sa kobina a birin naminima nɛn.