Sandane 11:10-29

¹⁰Xa tinxin muxune sɛwa, taan birin nan ɲaxanma. Koni muxu ɲaxine na faxa, ɲaxaɲaxan nan na ra.

¹¹Taan sabatima muxu faɲine duban nan xɔn. Koni a kalama nɛn muxu ɲaxine dɛ xuiin ma.

¹²Naxan na a adamadi boden naɲaxu, na xaxili mi na. Koni xaxilimana a dunduma nɛn.

¹³Mafala tiin wundo feene nan naminima kɛnɛnni. Koni lannaya muxuna e ramarama nɛn.

¹⁴Xa maxadin mi na, yamaan birama nɛn. Koni kisin na a ra xa kawandi muxune wuya ayi.

¹⁵Naxan na a bodena donla goronna tongo, na tɔrɔma nɛn yati. Koni naxan na tondi na dɛ xui sifane ma, na kanna luma makantanna nin.

¹⁶Ɲaxalan faɲin binyen nan sɔtɔma. Koni xaɲɛden tan nafunla nan sɔtɔma.

¹⁷Lannaya muxuna a yɛtɛ nan malima. Koni kininkinintarena a yɛtɛ nan tɔrɔma.

¹⁸Muxu ɲaxine walima nɛn fuu! Koni naxan na tinxinyaan liga, na saran kɛndɛn nan sɔtɔma.

¹⁹Tinxinyaan fama nii rakisin nan na. Koni naxan na lu fe ɲaxin fɔxɔ ra, na faxama nɛn.

²⁰Muxu bɔɲɛ ɲaxine mi rafan Alatala ma. Koni fɛ mi naxanye sigati ki ra, ne nan a kɛnɛnxi.

²¹Muxu ɲaxine saranma nɛn e kɛwanle ra. Koni tinxin muxune xunbama nɛn.

²²Ɲaxalan tofaɲin na findi xaxilitaren na, na luxi nɛn alo xɛma wuredin xɔsɛn ɲɔɛɛn na.

²³Tinxin muxun waxɔn feen nan fe faɲin na, koni muxu ɲaxine natan nan xɔlɔn na.

²⁴Muxuna ndee kiin tima e findi nafulu kanne ra, gbɛtɛye yi kuma ayi, e findi yiigelitɔne ra.

²⁵Muxun naxan luma dubɛ bonne xa, na bannama nɛn. Naxan bonne nii yifanma e ma, na fan nii yifanma a ma nɛn.

²⁶Naxan na maala malan, a tondi a matiyɛ, yamaan na dangama nɛn. Koni naxan na a mati, yamaan dubama nɛn na fan xa.

²⁷Naxan na fe faɲin fen na rafan muxune ma. Koni naxan na fe ɲaxin fen, na yati a sɔtɔma nɛn.

²⁸Naxan na la a nafunle ra, na birama nɛn. Koni tinxin muxune sabatima nɛn alo ɲɔxɔndena.

²⁹Naxan na a denbayaan tɔrɔ na mi kɛɛ sɔtɔma fɔ foyena. Xaxilitarene luma nɛn fe kolonne konyiyani.