Sua Tutŋana 11:10-29

¹⁰Sombe wal ndeeŋeŋan timbot ambai, na kar kan ko menmeen zin. Mi sombe zin wal sananŋan tisaana ma tila len, ina tomini ikam zin tomtom ma lelen ambai.

¹¹Kampeŋana ta imbotmbot se kizin wal ŋgeezeŋan na, ikamam ma kar niini ise. Mi sua ta iwedet pa wal sananŋan kwon, ta ipasansaana kar.

¹²Zin wal ta len ŋgar somŋan na, kwon pasomsom waen bizin pakan. Mi tomtom ta so ikam kat ŋgar, nako imborro kat kwoono.

¹³Zin wal ta tininin kao na, tilala ma tizzwe sua turkeŋana kizin tomtom. Mi tomtom ŋonoono na, ni irao iswe sua turkeŋana ki waene bizin pakan na som. Tana iti irao tendemeeri.

¹⁴Sombe zin bibip ki lele sa tikamam kat peeze som, nako lele tana isaana. Mi sombe wal boozomen tiuluulu zin bibip tana pa ŋgar, nako lele tana imbot ambai.

¹⁵Tomtom ta so imbuk sua be imender pa tomtom toro mi ikot mbun kini, nako indeeŋe pataŋana. Tana nu sombe lelem be mbot ambai, na mbuk sua ta kembei pepe!

¹⁶Moori sa, sombe mbulu kini irao pa tomtom lelen, nako ikam zaana biibi. Mi zin wal ta tikamam zaaba pizin tomtom na, tikamam len pat men. Koroŋ toro sa som.

¹⁷Tomtom ta so iurur leleene pa wal kini mi ikampewe zin, na iuluulu itunu. Mi tomtom ta so imuŋaiŋai zin tomtom som, ina ni ipasansaana itunu.

¹⁸Kadoono ta wal sananŋan tikamam pa uraata kizin, ina ŋono somŋana. Mi tomtom ta so iwaswaaza mbulu ndeeŋeŋana, na kadoono tabe ikam i, ina koroŋ ŋonoono.

¹⁹Tomtom ta so ikam kinkiini be ito mbulu ndeeŋeŋana, nako ikam mbotŋana ambaiŋana. Mi zin wal ta tirru zaala pa mbulu sananŋana, nako timetmeete ma tila len.

²⁰Zin wal ta tikamam ŋgar sananŋana na, Yooba leleene pizin ri sa som kat. Mi zin wal ta tipa pai kizin ma ambai men na, ni leleene pizin ilip.

²¹Lelem iwe ru pepe. Wal sananŋan na, Anutu irao ileele zin na som. Zin kola tire kadoono pa mbulu kizin. Mi wal ndeeŋeŋan ziŋan popoŋan kizin na, zin len uunu sa isaana som. Tana pataŋana sa ko irao ikam zin na som.

²²Moori ta so ruŋguunu ambai, mi tamen ipizil ndemeene pa mbulu ambaiŋana, ina kembei aigau ta izuk koroŋ buzaanaŋana.

²³Wal ndeeŋeŋan lelen pa koroŋ ambaimbaiŋan men. Tana kaimer zin ko tindeeŋe kampeŋana ambaiŋana. Mi wal sananŋan na, tiurur matan pa koroŋ sananŋan men. Tana kaimer Anutu kete malmalŋana kini ko ikam kat zin.

²⁴Tomtom ta, ni mata merereŋana mi irairai koroŋ boozo pizin tomtom. Tamen koroŋ ta imilmiili pini na, boozo ma ilip. Mi tomtom toro, ni mata konŋana, mi ikiskis koroŋ kini ta boozomen. Tamen molo som na, koroŋ kini tana imbiriizi, mi isu ma imbot ŋoobo.

²⁵Tomtom rairaiŋana ko ikam mboti ambaiŋana. Pa tomtom ta so ise yok mi ikam pizin wal pakan, na itunu ko iwin kana tomini.

²⁶Tomtom ta so iruutu kini kini pa mazwaana ki peteele, nako tipiri sua sananŋana pini. Mi tomtom ta so iyok pizin tomtom be tiŋgiimi kini kini na, kampeŋana tabe imbotmbot se kini i ko ikam ma zaana iwe biibi.

²⁷Zin wal ta tikamam kinkiini pa koroŋ ambaimbaiŋan, nako tindeeŋe kampeŋana biibi. Mi sombe ŋgar kiti ilala pa koroŋ sananŋan men, na mbulu sananŋana ko ipet piti.

²⁸Tomtom ta le koroŋ boozo mi ipase pa, na mbotŋana kini ko isaana. Mi wal ndeeŋeŋan na, zin kembei ke ka saluundu ta indom ma ise i.

²⁹Tomtom ta so ikamam pataŋana pa wal kini, nako irao ikam le matamur sa na som. Mi wal kankaanaŋan ta tizorzooro na, zin ko tiwe mbesooŋo sorok pizin wal ta len ŋgar ambaiŋana na.