Sandane 10:5-28

⁵Muxun naxan se xabaxine malanma a waxatini, xaxilimaan nan na kanna ra, koni naxan xima se xaba waxatini, yagin nan na kanna xa.

⁶Tinxin muxune barakan nan xilima e yɛtɛ ma. Koni muxu ɲaxine fala xuine gbalo feene nan luxunma.

⁷Tinxin muxune fe na rabira muxune ma, e dubama nɛn e xa, koni muxu ɲaxine xili kalama nɛn alo se kunxina.

⁸Fe kolonna muxun naxan bɔɲɛni, na tinma nɛn yamarine ma. Koni xaxilitare falane muxun naxan dɛ, bɔnɔn na kanna xa.

⁹Fɛ mi muxun naxan sigati kii ra, na kanna ratangaxi. Koni naxan sigan tima tinxintareyaan kiraan xɔn, na fe makɛnɛnma nɛn.

¹⁰Muxun naxan a yɛɛn magirama bodene yanfadeni, na yamaan nan tɔrɔma. Koni xaxilitare falane muxun naxan dɛ, bɔnɔn na kanna xa.

¹¹Tinxin muxuna falane fama nii rakisin nan na. Koni muxu ɲaxine fala xuine gbalo feene nan luxunma.

¹²Xɔnnantenyaan yɛngɛne nan nakelima, koni xanuntenyaan hakɛne birin nan ɲanma.

¹³Fe kolonna famuma xaxilimana falane nin, koni xaxili mi muxun naxan ma, bosaan nan na kanna xa.

¹⁴Fekolonne kolonna nan namarama, koni xaxilitarene falan kalan nan tima xulɛn.

¹⁵Nafulu kanna sɔtɔ seene nan a ratangama alo taa makantanxina. Koni yiigelitɔyaan nan sɛnbɛtarene kalama.

¹⁶Tinxin muxune saranna nan nii rakisin na. Koni muxu ɲaxina a sɔtɔ seene nan tongoma, a yulubin liga.

¹⁷Muxun naxan a xuru falane ramɛma, na sigan nii rakisin kiraan nan xɔn. Koni, muxun naxan sɔn falama a xa, a mi a suxu, na lɔma ayi nɛn.

¹⁸Nafigin nan xɔnnantenyaan luxunma. Koni xaxilitaren nan xili kala falane raxuyama ayi.

¹⁹Falan na wuya ayi, hakɛn fan mi ɲanma. Nayi, xaxilimaan nan a dɛɛn suxuma.

²⁰Tinxin muxuna falane dangu gbeti gbeen na. Koni muxu ɲaxin bɔɲɛ yi feen tɔnɔn mi na.

²¹Tinxin muxuna falan tɔnɔn muxu gbegbe ma, anu, xaxilitarene faxama bayo e mi e mirima.

²²Nafunla sɔtɔma Alatala barakan nin. A mi tɔrɔya yo sama a fari.

²³Fe ɲaxi ligan findixi sabaan nan na xaxilitaren yii. Koni xaxilimayaan findixi sɛwan nan na xaxilimaan yii.

²⁴Muxu ɲaxin gaxuma naxan yɛɛ ra, na a sɔtɔma nɛn. Koni tinxin muxun tan a waxɔn feene nan sɔtɔma.

²⁵Foye gbeen nɛɛn fa dangu, muxu ɲaxine bata raxɔri, koni tinxin muxun luma nɛn habadan.

²⁶Muluxunna ɲinne ramuluxunma, tutin fan yɛɛne tɔrɔma, muxu narixin fan na kii nin a xɛ muxun xa.

²⁷Alatala yɛɛragaxun muxune siimayaan xɔnkuyama ayi, koni muxu ɲaxine siin ɲanma nɛn sinma.

²⁸Tinxin muxune xaxili tixi sɛwan nan na, koni muxu ɲaxine yigin kalama nɛn.