1Eme Filisa ŋic jaŋe Israe ŋic jaŋehec qaqac eku Israe ŋic jaŋe wisepie Giliboa tikio qâhâmoc‐jopambiŋ.
2Eme Filisa ŋic jaŋe Saulo â ŋokâfâcne jâpec‐jopa raku bâfuac‐jopambiŋ. Erâ Filisa ŋic jaŋe Saulo â ŋokâfâcne jâpec‐jopahuc kikeo kikeo ejarembiŋ. Ehuc Saulore ŋokâfâc Jonataŋ, Abinada â Malikisua qâhâmoc‐jopambiŋ.
3Eme râsi jaŋe bâqiŋkehuc Saulo kikeo kikeo boc ecnehapie tepeŋic gâcne jaŋe bâfuarâ ʒâpâ murumbiŋ.
4Murupie Saulo e maro babaju‐ticne ʒiŋuc âzâcnewec: “Sahac tofa‐jeŋic mi hezukicne ʒi jaŋe fisi âke hâmocnuhuc mu ruruc enarenʒipiŋte go sânduge rorâ âke hâmocnuc.” Eme maro babaju‐ticne e hâwicke sâqoreme wiac iŋucne eocte mi afeckewec. Irec Saulo e jahacne sându rorâ âkendâŋnehuc micnao hewâcnewec.
5Eme maro babaju‐ticne e Saulozi hâmome honerâ iŋuc jaha sându‐ticne rorâ âkendâŋnehuc micnao hewâcneme mâmâc jaha hâmopic.
6Iŋuc ehuc ʒoaŋ ira Saulo e jahacne â ŋokâfâcne â maro babaju‐ticne erâ ŋicfâcne jaŋe hâmo‐fârembiŋ.
7Ehame Israe ŋic wâneŋ ŋifecnao â Jordaŋ ocniŋucnao jumbiŋ jaŋe Israe momori jaŋe wisembiŋ i honec‐jopambiŋ, ehuc Saulo â ŋokâfâcne hâmombiŋ irec biŋe manarâ hae‐jeŋic behe‐fârerâ wisembiŋ. Wisepie Filisa ŋic jaŋe fisirâ ira ŋeŋe juju embiŋ.
8Hae fureme Filisa ŋic jaŋe qâŋɋâŋ jaŋere ŋaqi qoruc wiac hetara‐jareniŋte fisirâ Saulo â ŋokâfâcne 3 Giliboa tikio hâmocne fohapie honec‐jopambiŋ.
9Honec‐joparâ Saulo e qizecne qâtâcnehuc maruku‐ticne hetaracnembiŋ. Iŋuc erâ kiŋaŋ sorec‐jopapie Filisa mâreŋ sâckerâ rahuc nemufâc‐jeŋic â ŋic ŋokac sâko jaŋerao biŋe biaŋ barambiŋ.
10Eme Filisa ŋic jaŋe Saulore maruku i Asitaroto nemure ufuŋko râembiŋ â qâŋɋâŋ‐ticne ine Bete‐Saŋ haere sacko niŋgiŋkepie domawec.
11Ehame Jabesi‐Gileade hae rune jaŋe Filisa ŋiczi Saulo wiac ecnembiŋ irec biŋe manambiŋ.
12Manarâ ŋic tâpirihec jaŋe ŋafeoa raku Saulo â ŋokâfâcne jaŋere qâŋɋâŋ Bete‐Saŋ haere sacko domahapie batarac‐joparâ Jabesi haeo bacjopa risierâ ʒocko rikec‐jopambiŋ.
13Erâ siec‐jeŋic qânusuckerâ Jabesi haeoa kasaŋ kasaŋ jâc fuŋnao duckembiŋ. Iŋuc erâ ʒoaŋ gie bapa 7 nânâ sowa jumbiŋ.
