1Eme Dawidi e Rama haeoa Naioti hae ŋewec irecnec wiserâ Jonataŋtao fisirâ muwec, “No wemo wiac moc epo? No wemo kiŋ hurepo? Mamacge e wemo wiac epe sâqorewec irec nuocte manasuekac?”
2Iŋuc mume Jonataŋzi dâŋ ʒiŋuc bâtikiecnewec: “Anutuzi manakac, go mi hâmocmu. Mamac‐nane e no mi nazahuc wiac i me i moc mi ejâmbâŋkeocmu. Mamac e wiac iŋucne eocte wemocko hesoŋke‐narezac. No dâŋ keci mi mana ʒakiekopac.”
3E iŋuc mume Dawidizi dâŋ ʒiŋuc bâtikiecnewec: “Go nore boc egarekac i mamacgezi mana‐jâmbâŋkekac. Ehuc ʒiŋuc manasuekac: ‘Jonataŋ wiac ʒi mi manazejec, wiac iŋucnezi busâqoc bâfuacnezackohec.’ Erâ ʒi Wofuŋ â go jujâmbâŋkekopirec ŋohere maio ʒiŋuc manapaŋkekopac: Hâmoczi bâmbeŋnukac.”
4Iŋuc mume Jonataŋzi ʒiŋuc âzâcnewec: “Wiac i me i mutec gore erâ epemu.”
5Jonataŋ e iŋuc mume Dawidizi ʒiŋuc âzâcnewec: “Manakic, tomâcko mosa furune wahaocmu. Eme no ira ŋicwofuŋhec nânâ nâpe biaŋkezac. Erâ sifu râecnutec ra soŋkerâ juhape ʒoaŋ gie bapa jahec â moc irec ŋafe maickezejec.
6Ehame mamacgezi teboo basacnurâ mume ʒiŋuc âzâcnezemec: ‘Dawidi e dameŋ bembeŋne sawa Betelehem hae‐ticnao jurâ risieocte numu‐narejec. Ira hâcne jara sâc Dawidire garikiŋfâc jaŋere taha bâzi fuaekac i.’
7Eme e, ‘Sâcne, biaŋne,’ iŋuc muocmuo ine norao sâckeocmu, me aarickeme dâŋ kosa woseme ine ʒiŋuc mana tarazemec: E wiac hâhâwicne ecneocte maname fokac.
8Bomboŋ‐nane, nâhâc Wofuŋte maio ʒâʒâfic sanaŋne epec, irec maŋge mi betaŋkeoc. No kiŋhec ekopacko wemocte mamacgerao bacnu racmu, go gahac qâhâmocnuc.”
9Iŋuc mume Jonataŋzi muwec, “No mamac‐nanezi guocte maŋkehuc jukac i manarâ muzac wemocko hesoŋke‐garezapo. I Anutuzi manaha mukopac.”
10Eme Dawidizi Jonataŋ ʒiŋuc âzâcnewec: “Mamacgezi dâŋ ʒocnehec egareocmuo ine mozi nazaocmu?”
11Iŋuc mume Jonataŋzi Dawidi ʒiŋuc âzâcnewec: “Waretec gieo ranac.” Iŋuc mume jahe mâmâc jaha gieo rapic.
12Ehuc Jonataŋzi Dawidi ʒiŋuc âzâcnewec: “No Israere Wofuŋ Anutu ere maio mupaŋke‐garepe: No tomâcko dameŋ ʒiŋucne mamac‐nane mu wioc ecnepe arec jahec â moc eocmu, eme eki go akicguocte manasukac i mutaniŋke‐jâmbâŋkeocmuo ine kiŋaŋ sorec‐jopape ware gazapie manazemec.
13Me mamac‐nane guocte muhame noni ŋezicguhuc egarepe mi wisecmuo ine Wofuŋzi irec okacne i mocwâc bâmâmâckehuc no enarezejec. Wofuŋzi mamac‐nanehec juwec irec sâc jaha gohec juzejec.
14No mi hâmopemuo ine Wofuŋzi ââgo jujure sâc munâctekac irec sâc enarezemec.
15Â no hâmopemuo ine eehâmoge i wiacfâc‐nane jaŋerao wâc fohuc juzejec sanaŋ. Eme Wofuŋzi Dawidire kisâfâc mâreŋ ʒirecnec bâsirowec‐jopaocmuo ine
16Jonataŋte ʒâŋezi Dawidire wiacfâc jaŋerao mi rârâŋnezejec. Â Dawidire râsifâc jaŋe ine Wofuŋzi okacne jarezejec.”
17Iŋuc muhuc Jonataŋ e maŋne Dawidirea domawec i muburockewec. E jahacnere ecnewec irec sâc jaha Dawidire ecnewec.
18Eme Jonataŋ e Dawidi ʒiŋuc âzâcnewec: “Tomâcko mosa furune wahaocmu. Eme go ira mi jucmu irec nânâ teboo gore ŋeŋe i tacne fome basacguniŋmu.
19Go ʒoaŋ gie bapa jahec â moc eme Eʒele qânâ ŋekacko mârâc tiwâ bâzi fuame soŋkemeŋ ira picpac jaha rarâ soŋkezemec.
20Ehame no ma moc ira me ira qâtâcnekopac tinac tepe motec jahec â moc irapec qâtâcnepe fâocmu.
21Ehuc ŋicmotec moc tepe motec i roocte sorehuc ʒiŋuc âzâcnepemu: ‘Go rarâ tepe motec i bâfuac. Tepe motec i ʒiŋucpec ira honerâ roc.’ Iŋuc mupe manarâ fuazemec. Ira wiac moc mi fua‐gareocmu i manapaŋkekopac.
22Me ŋicmotec e ʒiŋuc âzâcnepemu: ‘Tepe motec i ocniŋuc ira,’ iŋuc mupe manarâ Wofuŋzi sorecguocmure wisezemec.
23Eme ʒâʒâfic epec irec mumutaniŋ i Wofuŋzi raŋɋa raŋɋa junâctezejec.”
24Eme Dawidi e ra kâteo soŋkerâ juwec. E ira juhame mosa furune wahame ŋicwofuŋ e nânâ nâocte teboo waha ŋewec.
25Ŋicwofuŋ e ŋeŋe‐ticne sâpeopec ŋewecte ira ŋejujec, eme ira hâcne waha ŋewec. Ehame Jonataŋ e ŋifec domawec â Abenezi ine Saulore gâjoŋko ŋewec. Â Dawidire ŋeŋezi ine tacne ŋewec.
26Eme Saulo e ʒoaŋ ira dâŋ moc mi muwec. E ʒiŋuc manasuwec hâcne: Dawidirao wiac i me i fuawec, me pectâc jâmbâŋ wâc mi mecne jukacte iŋuc ekac.
27Eme hae fureme Dawidire ŋeŋezi tacne jaha ŋewec. Irec Saulozi ŋokâ‐ticne Jonataŋ wiocnehuc muwec, “Isaire ŋokâ e fuŋne weniŋucte jacne mecne â miŋecgac mecne nânâre mi warejec?”
28Iŋuc wiocneme Jonataŋzi Saulo dâŋ ʒiŋuc bâtikiecnewec: “Dawidi e Betelehem haeo raocte manacnepemurâ numu‐narejec.
29Ehuc ʒiŋuc mujec: Manahaŋ rape, soctofafâc‐nane jaŋe hae sâkoo tiwâ bâzi rikeŋgopieŋ, ehuc hahac‐nanezi rapemurâ munarejec. Irec honecnutec âgoge ekopacko behecnutec rarâ hahacfâc‐nane honec‐jopape. Irec Dawidi e ŋicwofuŋ gore teboo mi warejec i fuŋne iŋucte hacne.”
30Eme Saulozi Jonataŋ mana gâpârecnerâ muwec, “Ŋokac kosane â fecbâsicne eraonec fuakicne go, no fuŋnege mi manakopac me? Go Isaire ŋokâ âgo egareocte rowosâemeŋ i go gahacnao â neŋgocgere ɋâric fufua mimi feocte hâcne.
31Isaire ŋokâzi mâreŋko juhame go gahacne mi juhâmocmu â ŋicwofuŋ ŋeŋege mi ŋesanaŋkeocmu. Irec go kiŋaŋ soretec ra rorâ norao bawareniŋ, e hâmocte biŋe ekac.”
32Eme Jonataŋzi mamac‐ticne Saulo dâŋ ʒiŋuc bâtikiecnerâ muwec: “E wemocte qâhâmozo? Wemo wiac moc ejecte?”
33Eme Saulozi âeckeocte sându wickecnewec. Iŋuc eme Jonataŋzi ʒiŋuc hone tarawec: Mamac‐nanezi Dawidi qaocte mana sanaŋkekac.
34Irec Jonataŋ aaricke sâqoreme teboonec fahare rawec, ehuc mosare ʒoaŋ namba 2 ira nânâ moc mi nâwec. Wiac mamac‐ticnezi Dawidi ŋic maio bawahawecte busâqoc mana utuckewec i!
35Hae fureme Jonataŋzi uupictea gieo Dawidihec muc manac epicko rawec, ehuc motec piticne moc jowame mâmâc rapic.
36Erâ motec‐ticne hâcne âzâcnewec, “Gasacke rarâ tepe motec qâtâcnepe fâocmu sâc rozemec.” Motec e gasacke rahame tepe qâtâcneme motec huckehuc jâururâ rawec.
37Eme motec e Jonataŋzi tepe qâtâcneme rawec i fowec ira ra fisime Jonataŋzi motec hâcne wiracne muwec, “Tepe motec ocniŋuc rajec fokac i.”
38Erâ ʒuhuckerâ wira muwec, “Uneŋ boc mi juhuc biac warec.” Eme Jonataŋte motec e tepe nuse‐fârerâ bomboŋ‐ticnerao barâ warewec.
39Wiac ekicne irec fuŋne moteczi mi manawec, Jonataŋ â Dawidi jahe buc manapic.
40Eme Jonataŋ e tepe wiac‐ticne motec râcnehuc âzâcne muwec, “Wiac ʒi haeo bafec.”
41Motec e rahame izia Dawidi e qânâ guru râpenao foweckonec faharerâ ware ʒâŋe mainezi mâreŋko hetutuckewec. Erâ arec jahec â moc fodapewec. Eme jahe mumuduc erâ kikioc epic, eku Dawidi bune uruewec.
42Eme Jonataŋzi Dawidi ʒiŋuc âzâcnewec: “Go wamao razemec, nâhâc dâŋ murâ Wofuŋte maio mupaŋkepac, dâŋ i Wofuŋ e jahac nâhâcnao â ɋâricfâc‐nâhec jaŋerao soŋaŋke rahuc juzejec sanaŋ.” Eme Dawidi e fahare rawec, â Jonataŋzi haeo risie fewec.
