1Eme Samuezi Israe ŋic sasawa ʒiŋuc jazawec: “Manaŋgopieŋ, no dâŋŋeŋic sasawa nazambiŋ i manarâ ŋicwofuŋ moc âkendâŋne‐ŋarepo.
2Eme ʒi ŋicwofuŋ e ŋoŋere micne bapa jukac hâcne. No ine ŋicqizec â jaŋɋâŋ‐nanehec, â ŋokâ jahec‐nane jahe ŋoŋehec mâmâc juŋgopieŋ. Erâ no motec‐naneonecteaŋ ŋoŋere micne juwarehuc jupozi jukopac.
3No ʒi hâcne domakopac. Irec nore dâŋ i me i moc bajuŋgopieŋko ine Wofuŋ â wokemaŋ ruac‐ticne jahere maio mutaniŋkeniŋ. No ŋic mocte bulimakao me doŋgi wiac moc ropo? Me ŋic moc râsi ecnehuc ro waha âte moc ecnepo? Me wiac hehesicne ehuc tiŋtuŋne epemurâ bâbâmiriŋ moneŋ narepie mocte meonec moc ropo me? Ŋoŋe i mutaniŋke‐nare‐fârepie no mocwâc bârisie‐ŋarepemu.”
4Iŋuc mume jaŋe dâŋ ʒiŋuc bâtikiecnembiŋ: “Go ŋic i me i moc ro waha âte ecnehuc wiac kosa eecne me meticnaonec wiac jâjâoc ro i moc mi emeŋ.”
5Jaŋe iŋuc mupie Samuezi ʒiŋuc jazawec: “Ŋoŋe ʒoaŋ ʒira Wofuŋ â wokemaŋ ruac‐ticne jahere maio noraonec wiac moc mi bâfuaŋgopieŋ irec jahe hâcne mumutaniŋ‐nâŋec ekopirec.” Eme jaŋe mumbiŋ, “Jahe hâcne mumutaniŋ ŋic jahec‐nâŋec.”
6Mupie Samuezi ŋic ŋokac ʒiŋuc jazawec: “Wofuŋ e Mose â Aroŋ âkendâŋ‐jofarâ ejacteme apa ŋosafâc‐ŋeŋic micne bajarehapire Aigita mâreŋkonec wefumbiŋ.
7Irec fisi‐fârepie Wofuŋzi ŋoŋe â apa ŋosafâc‐ŋeŋic ŋoŋerao eebapa biaŋ bâfua‐ŋare wareekac irec muc manac enʒepeneŋ.
8Jakobo â ɋâricfâc‐ticne jaŋe Aigita mâreŋko fisimbiŋ, erâ ira juwefuhapie Aigita ŋic jaŋe fific guguriŋ ejarepie apa ŋosafâc‐ŋeŋic jaŋe Wofuŋ kio wâwâsic ecnembiŋ. Ehame Wofuŋzi Mose â Aroŋ ejacteme jahe apa ŋosafâc‐ŋeŋic Aigita mâreŋkonec jowac‐jopa wefupic. Erâ ejarepire mâreŋ ʒira hâcne fisirâ jumbiŋ.
9Eme jaŋe sifu Wofuŋ Anutu‐jeŋicte nikec‐jopawec. Jaŋe Wofuŋte nikec‐jopame Wofuŋzi Hazoro ŋicwofuŋ Jabiŋte momori guru irec micne bapa, ʒâŋene Sisera, ere meo râec‐jopawec. Erâ wâc Filisa ŋic jaŋere meo â Moabi ŋicwofuŋte meo wâc râec‐jopame jaŋehec ʒika gie bambiŋ.
10Jaŋe iŋuc ehuc Wofuŋ kio wâwâsic ecnehuc ʒiŋuc mumbiŋ: ‘Nâŋe Wofuŋ go râpecguhuc Baali â Asitaroto nemu kiŋaŋ qajarehuc sâqocne bambeŋ, irec go sifu kisâfâc‐nâŋec jaŋere meonec batarac‐nâpotec kiŋaŋ qagarenʒepeneŋ.’
11Iŋuc mupie Wofuŋzi Jeru‐Baali, Baraki, Jefita â Simsoŋ sorec‐jopame jaŋe kisâfâc‐ŋeŋic ŋifec â ŋifec jumbiŋ jaŋere meonec batarac‐ŋopapie ŋoŋe wamao juhâmombiŋ.
12Ehame Amoŋ ŋicwofuŋ Nahasizi ŋoŋe râsi fisi‐ŋareme honerâ Wofuŋ e Fekicne juŋare‐bipieha ʒiŋuc nazambiŋ: ‘Aricne, sifu ŋicwofuŋ moczi soŋaŋ‐nâpozejec.’
13Eme ŋicwofuŋ rowosâehuc numu‐narembiŋ e hâcne ʒi honeniŋ. Wofuŋzi e hâcne ŋicwofuŋ‐ŋeŋic juocte âkendâŋne‐ŋarewec.
14Eme ŋoŋe Wofuŋ araŋ bacnehuc dâŋticne manarâ e sawa kiŋaŋ qacnehuc sâcmutâc dâŋticnere maŋrâŋgeŋ mi bâfuaniŋmuo, erâ ŋoŋe â ŋicwofuŋ soŋaŋ‐ŋopaekac e mâmâc Wofuŋ Anutu‐ŋeŋic bâjâpehuc juniŋmuo ine sâckeocmu.
15Me ŋoŋe Wofuŋ dâŋticne mi manahuc sâcmutâc dâŋticnere maŋrâŋgeŋ bâfuaniŋmuo ine Wofuŋte mezi ŋoŋe â ŋicwofuŋ‐ŋeŋic ŋoŋerao okac babazu gie baocmu.
16Irec ŋoŋe niniŋkerâ domahuc Wofuŋzi mâsi hâhâwicne ʒâŋe fai‐ŋeŋicko bâfuaocmu i honenʒepieŋ.
17Dameŋ ʒi padi qa roro dameŋ. Eme no Wofuŋtao mupe ɋuŋ parandaŋ â hoe ejareme fisipie ŋoŋe ŋaŋac ŋicwofuŋ moc juŋareocte muhuc Wofuŋte ʒâŋe faio wiac hehesicne sâko bâfuambiŋ i hone mana tarac enʒepieŋ.”
18Samue e iŋuc murâ Wofuŋ wâsickeme Wofuŋzi ʒoaŋ ira ɋuŋ parandaŋ â hoe ejareme fisimbiŋ. Iŋuc fuame ŋic ŋokac jaŋe Wofuŋ â Samue jahere araŋ mâretec bambiŋ.
19Ehuc ŋic ŋokac jaŋe Samue ʒiŋuc âzâcnembiŋ: “Kiŋaŋŋicfâcge nâŋe hâmonʒipeŋte nâŋere erâ Wofuŋ Anutuge numucnec. Nâŋe kiŋnâŋec sasawa ira ʒuhuckerâ ŋicwofuŋ moc junâreocte muhuc hehesic bâfuambeŋ hâcne.”
20Iŋuc mupie Samuezi ŋic ŋokac ʒiŋuc jazawec: “Mi hâwic‐ŋopaoc. Ŋoŋe kiŋ sasawa bâfuambiŋ, erâ sifu Wofuŋ mi râpeckehuc maŋ hâcbuc jaha kiŋaŋ qacnenʒepieŋ.
21Ŋoŋe wiac omane jaŋe sâcne mi bafic‐ŋopahuc ŋezic‐ŋopaniŋmu iŋucne jaŋerao mi siŋkenʒepieŋ. Wiac i jaŋe hâcne racne.
22Wofuŋ e ʒâŋe biŋe sâko‐ticnere erâ maname sâckeme e jahacne ŋicgurufâc moc bâfuac‐ŋopawecte sâcne mi behec‐ŋopa sanaŋkeocmu.
23No ŋoŋere erâ nunumu gie bapa i mocwâc ʒuhuckerâ mi bapemuo ine Wofuŋzi maname kiŋsâkohec eocmu. Irec no wiac fâretiŋ â biaŋne i ŋaza ŋowatuc ehuc jupemu.
24Ŋoŋe ine jauŋ fârihec maŋ hâcbuc jaha Wofuŋ araŋ bacnehuc kiŋaŋ qacnehuc junʒepieŋ. Wofuŋzi ŋoŋerao mâsi qâreŋ hâhâwicne bâfuaekac irec hâcne manatâc qâtâc ehuc junʒepieŋ.
25Ŋoŋe ʒuhuckerâ hehesicko huutuckeniŋmuo ine ŋoŋe ŋaŋacne â ŋicwofuŋ‐ŋeŋic mâmâc ofaŋ‐ŋopazo.”
