1Dawidi e maŋnezi ʒiŋuc muwec: “No ʒi juku dameŋ moc maickeme Saulore meo omaezipohec. Irec no Filisa mâreŋko wiserâ rape sâckezejec. Eme no Sauloraonec wisehape Israe mâreŋko basacnu‐bipiezejec.”
2Iŋuc murâ ŋic 600 ehec jumbiŋ jaŋehec faharerâ Gati ŋicwofuŋ, Maokare ŋokâ Akisi erao rambiŋ.
3Erâ Dawidi â ŋonâŋ jahec‐ticne Ahinoam, Jesere haeonec e â Abigai, Nabalire hozec, Karamele haeonec e, erâ ŋicfâcne â wiacfâc‐jeŋic sasawa jaŋe Akisihec Gati haeo jumbiŋ.
4Eme Saulo e Dawidizi Gati haeo wiserâ rawec irec biŋe manarâ basahuc juwec i behewec.
5Eme Dawidi e Akisi ʒiŋuc âzâcnewec: “Go honecnutec sâckekacko ine mâreŋ ʒira haege moc naretec ira sâcne juzapo? Kiŋaŋ qaqage no wemocte ʒira ŋicwofuŋ haeoa gohec jupemu?”
6Iŋuc mume Akisizi Zikilaga hae râcneme juwec. Irec dameŋ ʒi Zikilaga hae i Juda ŋicwofuŋ jaŋere hae ewec ŋekac jaha.
7Eme Dawidizi Filisa mâreŋko jara 1 â mosa 4 juwec.
8Eme Dawidi â ŋicfâcne jaŋe ŋicguru ʒiŋuc râsi ejarembiŋ: Gesuri, Giʒeri â Ameleke. Eme ŋicguru i jaŋe hâcne juwicnaoa mâreŋ rune erâ Suru mâreŋkonec raku Aigita mâreŋko mickekac ira jurambiŋ.
9Eme Dawidi e mâreŋ i imackehuc ŋic me ŋokac moc mi akic‐jopa jujec. Erâ lama, bulimakao, doŋgi kamele â ŋaqi qoruc wiac rocjoparâ Akisirao risie jujec.
10Eme Akisizi wiocne jujec, “Ʒoaŋ ʒi wena jaha ʒika qambieŋ?” Iŋuc wiocneme Dawidizi ʒiŋuc mujujec: “Judaŋic Negebe mâreŋko juŋgopieŋ jaŋerao,” me “Jeramec ŋic Negebe mâreŋko juŋgopieŋ jaŋerao,” me “Keniŋic Negebe mâreŋko juŋgopieŋ jaŋerao.”
11Dawidi e jahacne ŋic me ŋokac moc akickerâ Gati haeo mi bacjopa warewec. E ŋicfâcne jaŋere fuŋne taniŋkezacte hâwickeme Filisa mâreŋko juwec sâc mâsi iŋuc hâcne ehuc juwec.
12Eme Akisi e ʒiŋuc manahuc Dawidirao roweckewec: “Dawidi e Israe ŋicfâcne jaŋerao mumusoriŋ bâfuawecte norao ʒuhuckerâ nore ŋic erâ jusanaŋkeocmu mecne.”
