1Eme Dawidi e wiserâ raku Nobo haeo taha bapa Ahimelectao fisime eki faharerâ Dawidi ʒiŋuc muhuc wiocnewec: “Go wemocte buc warekic?”
2Mume Dawidizi dâŋ ʒiŋuc bâtikiecnewec: “Ŋicwofuŋ e hata jukopac ʒirec sorecnuhuc ʒiŋuc muwec: ‘Go wemo wiacte sorecgukopac â wemo dâŋ jaha gazahuc sorecgukopac i ŋic moc mi jazazemec.’ Eme haeonec faharehuc ŋicmotecfâc‐nane jaŋehec hae mocko bâbâfua enaŋte dameŋ babac embeŋ.
3Irec go wemo wiac jaha fogarekac? Go poroŋ memoc narec, me fogarekac sâc narec.”
4Mume taha bapazi Dawidi dâŋ ʒiŋuc bâtikiecnewec: “No poroŋ omane i moc mi fonarekac, poroŋ furu mukicne i sawa ine fonarekac.” Erâ ʒuhuckerâ muwec, “Ŋicmotecfâcge jaŋe ŋokac dic bajareeŋgopieŋ me?”
5E iŋuc mume Dawidizi dâŋ ʒiŋuc bâtikiecnewec: “Nâŋe faharembeŋkonecteaŋ juhapene ʒoaŋ gie bapa jahec â moc ʒi ŋokac jaŋe râpec‐jopa‐jâmbâŋkekicne. Irec ŋicmotec jaŋe ɋaɋacne juŋgopieŋ. Wemonea moc ʒuhuckerâ ɋaɋackezo?”
6Iŋuc mume taha bapazi poroŋ gâcne mi focnewecte ŋic ŋokac jowatuhuc râekicne poroŋ tirine i hâcne rorâ râcnewec. Poroŋ ɋâricne râe jumbieŋ dameŋ ira ine raŋɋane i Wofuŋte maionec bârârie jumbieŋ.
7Ehame ʒoaŋ ira wâc Saulore kiŋaŋ qaqafâc jaŋeraonec Edomŋic moc ʒâŋene Doege e ecnepie Wofuŋte maioa juwec. E Saulo lama soŋaŋfâc‐ticne jaŋere micne.
8Eme Dawidizi Ahimelec ʒiŋuc muhuc wiocnewec: “Go sându me ʒika wiac moc mai jaha fogarekac me? No ŋicwofuŋte gie ʒizi fâronehec ewecte sându me ʒika wiac moc mi rorâ warepo hâcne.”
9Mume taha bapazi muwec, “Go gahac Ela wâneŋko Filisa ŋic Goliata qameŋ ere ʒika sawa qoruczi foŋkekicne taha bapa ŋaqi râpenao domakac. Ʒikare wiac moc ʒira moc mi fokac, i sawa hâcne. Eme go i rozo mukicko roc.” Mume Dawidizi muwec, “Eme narec, ʒika iŋucne moczi moc mi bajukac.”
10Eme ʒoaŋ ira Dawidizi Saulore hâwickeme wiserâ Gati ŋicwofuŋ Akisirao rawec.
11Rame Akisire kiŋaŋ qaqafâc jaŋe honerâ ŋicwofuŋ ʒiŋuc âzâcnembiŋ: “Ʒi Dawidi jâmbâŋ, mâreŋ ʒirec ŋicwofuŋ hâcne. Ŋokac jaŋe ere hâcne gae ʒiŋuc hehuc wombiŋ: ‘Saulozi ŋic 1 tauseŋ jopawec â Dawidizi ine 10 tauseŋ jopawec.’”
12Eme Dawidi e dâŋ mumbiŋ i maŋkerâ manatâc qâtâc ehuc Gati ŋicwofuŋ Akisire hâwicke sâqorewec.
13Hâwicke sâqoreme jaŋere maio eebapa‐ticne herisieme mutuc matacne hawari ewec. Erâ haere sacmotâcko qâreŋ wiac bame micopâ‐ticnezi mecʒâwâ‐ticnao qâniniperâ wahawec.
14Iŋuc eme honerâ Akisizi kiŋaŋ qaqafâcne ʒiŋuc jazawec: “Honeniŋ, ŋic ʒi mutucne, ŋoŋe wemocte jowa warembieŋ?
15No ŋic iŋucne basac‐jopakopac me, irec ŋoŋe ŋic ʒi mâsi iŋucne eocte norao jowa warembieŋ? Ŋic iŋucnezi nore ficko mi juzejec.”
