1Eme Ʒifiŋic jaŋe Gibea haeo Saulorao fisirâ ʒiŋuc mumbiŋ: “Dawidi e Jesimoŋ faicnao Hakila tikio soŋkerâ jukac.”
2Iŋuc mupie manarâ Saulo e faharerâ ŋic 3 tauseŋ bâwosâec‐joparâ micne bajarehuc Ʒifi mâreŋ burocnao Dawidi basaocte mocwâc huwec.
3Ehuc Jesimoŋ faicnao Hakila tikire hata heririŋko teuŋ âterâ fowec. Â Dawidi e ine mâreŋ burocnaoa ʒuhuckerâ juwec. Eme Saulozi jâperâ mâreŋ burocnao ware fisime honewec.
4Honerâ, Saulo e jâmbomac ware fisiwec, iŋuc mana taraocte ruc bapa ŋic sorec‐jopawec.
5Eme Dawidi e jahac faharerâ Saulozi teuŋ âtewec mâreŋ ŋondeŋ ira rawec. Ehuc Saulo e momori jaŋere micne moc Nera ŋokâ‐ticne Abenehec mâreŋ ŋondeŋ wena jaha fopic i honewec. Saulo e momori guru jaŋe orâŋ bârâŋ ecnerâ fohapie ŋondeŋ‐jeŋicko fowec.
6Eme Dawidi e Hitiŋic Ahimelec â Zeruja ŋokâ‐ticne Joabere hahac Abisai jahe wio‐jacterâ muwec, “Mozi nohec Saulore teuŋko hunacmu?” Wiome Abisaizi muwec, “Noni gohec hupemu.”
7Iŋuc mume Dawidi â Abisai jahe ŋafeo Saulore momorifâc jaŋerao hupic. Eme Saulo e sându‐ticne qizecnao wireme domame momori jaŋere ŋondeŋko guŋ fowec. Ehame Abene â momori gâcne jaŋe e orâŋkerâ forambiŋ.
8Forapie Abisaizi Dawidi ʒiŋuc âzâcnewec: “Dameŋ ʒi hâcne Anutuzi kisâge megao râekac. Eme irec mana‐naretec sânduzi arec jajahec mi âeckehuc arec mocjaha sawa mâreŋhec râŋkeme âke kindeŋnepe.”
9Iŋuc mume Dawidizi dâŋ ʒiŋuc bâtikiecnewec: “Go e mi bâsirowezemec. Wofuŋzi wokemaŋ ruacnewec ŋic e mo ŋiczi ba bâuac ecnehuc kiŋ tâmiric juocmu?”
10Iŋuc murâ dâŋ ʒiŋuc ʒuhuckerâ muwec: “Wofuŋ e jukacte e jahac qaocmu. E dameŋ‐ticne maickeme hâmoocmu me ʒikao rahuc ira sipirickeocmu.
11Wofuŋzi wokemaŋ ruacnewec e menanezi ba bâuac mi ecnepemurâ Wofuŋ e jahac qatara‐narekac. Irec nâhâc qizecnaopec sându â opâ ʒopo‐ticne domakac i sawa rorâ ranac.”
12Iŋuc murâ Dawidizi sându â opâ ʒopo qizecnaopec domawec i rome wisepic. Ŋic moczi moc ɋârerâ hone manac eejacte i moc mi embiŋ. Jaŋe Wofuŋzi ejareme guŋqâŋɋâŋ fofârembiŋ hâcne.
13Eme Dawidi e wâc fotâcnerâ ocniŋucnao tiki botâŋko taic jâmbâŋ ferâ domawec. Ehame ŋoŋondeŋ‐jeŋicko sawa sâko fowec.
14Eme Dawidi e momori â Nerâ ŋokâ‐ticne Abene wira‐jarehuc muwec, “Abene, go dâŋ mi bâtikiecmu me?” Iŋuc mume Abenezi dâŋ bâtikiehuc muwec, “Go mozi ŋicwofuŋ wiracnekic?”
15Abene e iŋuc mume Dawidizi ʒiŋuc âzâcnewec: “Go gahacnere ŋic muekic me? Israe guruo go iŋucne moc juŋgopieŋ me? Go ŋic moczi ŋicwofuŋge sipirickeocte fisiha wemocte mi soŋaŋkemec?
16Go wiac emec i mi sâckekac. Jâmbomac jâmbâŋ, ŋoŋe Wofuŋzi wokemaŋ ruacnewec e mi soŋaŋkembieŋte ʒeŋgoma hâmocte biŋe efâreŋgopieŋ. Honeniŋ, ŋicwofuŋte qizeckopec sându â opâ ʒopo‐ticne domapirec i weni?”
17Eme Saulo e Dawidire dâŋmarac mana tararâ muwec, “I Dawidi ŋokâ‐nane go gahac me?” Eme Dawidizi muwec, “Bomboŋ‐nane, no nahac hâcne.”
18Iŋuc murâ ʒuhuckerâ muwec, “Bomboŋ‐nane, go kiŋaŋŋicge no wemocte nu jâpec enarehuc jukic? No wemo wiac epo? Wemo wiac moc epe sâqorewec?
19Irec ŋicwofuŋ‐nane, go ʒi hazec râerâ kiŋaŋŋicgere dâŋ manazemec. Wofuŋ e jahac râsi ronarecmurâ âkendâŋguwecko ine taha bacnepie maname sâckezejec, â ŋic jaŋere mamanao fuakacko ine sâweczi jaŋerao fozejec. No Wofuŋte gurufâc jaŋehec mocjaha mi jupemurâ dameŋ ʒi nu jâpec enarehuc mueŋgopieŋ, ‘Go rarâ nemu gâcne kiŋaŋ qajarec.’
20Eme irec socnane i mâreŋ furunao â Wofuŋ ʒâŋe biŋe‐ticne mi fokacko mi hoŋkezo. Israe ŋicwofuŋ e fitic moc basaocte warejec me ŋic moczi tikio hapâ qaocte wosaŋeŋ gie baekac irec sâc warejec jukac.”
21Iŋuc mume Saulozi muwec, “No wiac epe sâqorekac. Dawidi ŋokâ‐nane, go risiec, go ʒoaŋ ʒira juju‐nanere manatec wiac furi sâko ejecte no mocwâc mi bâʒâicgupemu. Manakic, no mutuc gie bahuc wiac esifucke‐jâmbâŋkepo hâcne.”
22Eme Dawidizi dâŋ bâtikiecnehuc muwec, “O ŋicwofuŋ, sânduge ʒi. Ŋicmotec jaŋeraonec moczi wefurâ ro bahu fâoc.
23Wofuŋ e ŋic buc buc tiŋne â jauŋ fârihec jaŋe okacne jareekac. Wofuŋ e ʒoaŋ ʒira menaneo râecgujec. Eme Wofuŋzi wokemaŋ rua‐garewec go ba bâuac sâcne mi egarepemu.
24Manakic, no ʒoaŋ ʒira gore jujure manape furi sâko ejec, iŋuc jaha Wofuŋzi nore jujure maname furi sâko ezejec. Ehuc hume serereŋkonec bataracnuzejec.”
25Iŋuc mume Saulozi Dawidi ʒiŋuc âzâcnewec: “O ŋokâ‐nane Dawidi, jambuŋzi gorao fozejec. Go wiac tâpirihec jaha ehuc ʒoɋac sasanaŋhec juzokic.” Iŋuc mume tarame Dawidi e hata ʒuhuckerâ rame Saulozi hae‐ticnao risiewec.
