1Filisa ŋic jaŋe momorifâc‐jeŋic Afeke haeo hetumaŋ‐jopambiŋ â Israe ŋic jaŋe Jesere haeo opâ ʒâŋe heririŋko teuŋ âtembiŋ.
2Eme Filisa momori jaŋe micnefâc‐jeŋic jaŋehec gurune gurune rahapie Dawidi â ŋicfâcne jaŋe Akisihec ʒâhec jumbiŋ.
3Eme Filisa momori micne jaŋe ʒiŋuc mumbiŋ: “Hebiraio ŋic ʒi jaŋe ʒira wemocte wareŋgopieŋ?” Iŋuc mupie Akisizi ʒiŋuc jazawec: “Ʒi Dawidi, Israe ŋicwofuŋ Saulo ere kiŋaŋŋic. E nohec juhame jara 1 â nâfocne ezo ekac. E ware fisiweckonecteaŋ juwarehuc kiŋ bahac‐ticne moc mi bâfuaekopac.”
4E iŋuc mume Filisa momori micne jaŋe ere aaric‐jopame mumbiŋ, “Ŋic e soretec hae mâreŋ râcnemeŋko risieoc. E nâŋehec ʒikao mi razajec, e ʒikao rahuc ŋerisierâ râsi‐nâŋec ezackohec. Ŋic ʒi e weniŋuc erâ bomboŋ‐ticnehec maŋ ʒuʒuhuc bâfuaocmu? I ŋicfâc‐nâŋec ʒi jopahuc sawa eocmu.
5Dawidi ʒirec hâcne gae ʒiŋuc hehuc wombiŋ: ‘Saulozi ŋic 1 tauseŋ jopawec â Dawidizi ine 10 tauseŋ jopawec.’”
6Eme irec Akisizi Dawidi hefârerâ ʒiŋuc âzâcnewec: “Wofuŋ e jukacte go wiac fâretiŋ jaha efâremeŋ. No manape go ʒikao mâmâc sâcne rarane ekac. Go norao fisimeŋ dameŋ irecnec juwarekuhapene miŋecgac fisikac ira wiac moc mi esifuckemeŋ i no manakopac. Erâ ine ŋic fekicne jaŋe gore manapie mi sâckekac.
7Go Filisa ŋic fekicne maŋjeŋic mi sipirickehuc aimuŋ jaha haeo risiec.”
8Iŋuc mume Dawidizi Akisi dâŋ bâtikiecnewec: “No wemo wiac moc epo? No fuŋkerâ kiŋaŋ qagare warehuc jukopac dameŋ irec maŋnao wemo wiac moc esifuckepe honemeŋte ŋicwofuŋ gore kisâfâc jopapemurâ sâcne mi rapemu?”
9Iŋuc mume Akisizi dâŋ bâtikiecnehuc muwec, “No honecgupe Anuture aŋelo iŋucne bahacmâc ekomec irec maŋjahec mi ekopac. Mâc, Filisa ŋic fekicne jaŋe goki jaŋerao ʒuhuckerâ ʒika mi qacmurâ ʒoɋac eŋgopieŋ.
10Eme irec go fekicnegere kiŋaŋ qaqafâc go gahacnehec warembieŋ jaŋehec furic uupictea faharenʒepieŋ. Erâ hae botâŋne bawahame izia ranʒepieŋ.”
11Iŋuc mume Dawidi e Filisa ŋic jaŋere mâreŋko risieocte furic uupictea ŋicfâcne jaŋehec hata fuŋkembiŋ, â Filisa ŋic jaŋe ine Jesere haeo fembiŋ.
