1Eme Hana e kecʒiŋuc muhuc numuwec: “Maŋnanezi Wofuŋ gorao bubiaŋ bâfuakac, tâpiri‐nane i Wofuŋ gorao fojâmbâŋkekac. Go bâfiriecnukomec irec ʒeri ekopac, eha micnanezi kisâfâc‐nane gâwie‐jarekac.
2“Wofuŋ go iŋucne tirine moc mi jukac, go iŋucne moc mi jukac. Haroŋaŋ sanaŋ moc Anutu‐nâŋec go iŋucne moc mi jukac.
3Sahac fefe dâŋ jâmbâŋ mocwâc mi muzo, pepecdâŋ micŋeŋickonec mi wahazejec. Wofuŋ Anutu e hâcne mamana tara rune, eki guriŋ bame ŋiczi wiac ebac eeŋgopieŋ.
4Ŋic tâpirihec jaŋere tepe motec bazukicne â tâpiri tâmiric jaŋe ine tâpiri ɋâricne hepie huekac.
5Wiac bocjaha fojareekac jaŋe jaŋac nânâre kiŋaŋ qaeŋgopieŋ, â nânâre hâmohuc jueŋgopieŋ jaŋe nânâre hâhâmo i omae‐jareekac. Hufiŋnezi kogoc 7 rocjopaekac â naru motec bocjaha jucneeŋgopieŋ e ine behe qaisoc ecnekicne.
6Wofuŋzi ŋic jopaekac, ehuc juju mocwâc bâfua‐jareekac. E hâmoc haeo bacjopa hurâ mocwâc bâɋârec‐jopaekac.
7Wofuŋ e ŋic hapetac bacjopaekac erâ mafa sâko tahac‐jopaekac. E bawahac‐jopahuc bafec‐jopaekac wâc.
8E hapetac jaŋe rufemaŋkonec bawefuc‐jopaekac, ehuc harac huacbucne jaŋe fekicne jaŋehec ŋehuc eri qaraweŋte hendiŋ rauckeniŋte ʒafeonec bafaharec‐jopaekac. Mâreŋ hobeteŋne i Wofuŋte biŋe, eme irec faio hâcne mâreŋ sâko mâreŋ râewec fokac.
9“Wofuŋ e mume rereŋfâc‐ticne jaŋere kike soŋaŋkeekac â sâqocne bapa jaŋe ine behec‐jopame dapâc qisiric maŋnao sipirickeeŋgopieŋ. Ŋic moc e jahacne tâpiri erâ mi juocmu.
10Wofuŋte kisâfâc jaŋe Anutu Fekicnezi sambâŋko parandaŋ heme hâwic‐jopaocmu. Wofuŋ e ŋic sasawa jaŋerao mumutara gie bame mâreŋ sâcke‐fâreocmu. E ŋicwofuŋ‐ticne tâpiri râcneocmu â wokemaŋ ruacnekicne‐ticne ere tâpiri bafahareocmu.”
11Eme Elikana e Rama hae‐ticnao risiewec, â motec e ine taha bapa Elire maŋfuŋko juhuc Wofuŋ kiŋaŋ qacnewec.
12Eli ŋokâ jahec‐ticne jahe ŋic hehesicne, jahe Wofuŋ araŋ moc mi bacnepic.
13Ŋic jaŋe taha baniŋte fisihapie taha bapa jaŋe mâsi ʒiŋuc ejumbieŋ: Ŋic moczi bâzi rikeme qowizi du âtehame taha bapare kiŋaŋŋiczi sarac micne jahec â moc barâ ware jujec.
14Ehuc sarac i faŋko me beŋguo me kuʒi sâkoo me hapecko râeme hume qowi âecke jujec. Eme saracmicko qowi fejujec i sasawa ine taha bapazi e jahacne biŋe rojujec. Israe ŋic sasawa Silo haeo fisi jumbieŋ jaŋerao mâsi i hâcne ejumbieŋ.
15Erâ i sawa mâcne, wokemaŋ i Wofuŋte biŋe mi rike‐fârehapie taha bapare kiŋaŋŋiczi warerâ ŋic taha bawec e ʒiŋuc âzâcnewec: “Taha bapare qowi ʒegoc ʒaocte ɋâricne narec. E kuʒio rikekicne i goraonec mi roocmu.”
16“Wokemaŋ ʒafâreme bocjaha rozo murâ rozemec,” ŋiczi iŋuc âzâcneme ine ʒiŋuc mujujec, “Aricne, ʒiŋuczia narezemec. Iŋuc mi ecmuo ine no fâfâcnehec gowac ropemu.”
17Ŋic jahe iŋuc epire Wofuŋzi hehesic‐jekic honeme ŋemâcke‐jâmbâŋkewec. Ehame ŋic jaŋe Wofuŋte tahare manapie wawahane ewec.
18Samue e motec wârâŋnezi taha bapare qoruc qaŋqaŋ erinehec jomarâ Wofuŋ kiŋaŋ qacnehuc juwec.
19Ehame neŋgoc‐ticnezi jara sâc taha ŋaqi faine bacnerâ ŋowenehec taha banicte fehuc râcne jujec.
20Eme Elizi Elikana â ŋonâŋ‐ticne jambuŋ‐jofahuc ʒiŋuc mujujec: “Ŋokac go mârâc motecge Wofuŋ tahackemeŋte gorao naru motec ʒuhuckerâ fuanʒepieŋ.” Iŋuc jasame jahe hae‐jekicko risie jupirec.
21Eme Wofuŋzi Hana ehâmocneme kiwechec erâ ŋokâ jahec â moc â otâ jajahec iŋuc rocjopawec. Ehame Samue e Wofuŋte maio soka sanaŋ ewec.
22Eli e juku ŋicqizec jâmbâŋ ehame ŋokâ jahec‐ticne jahe Israe ŋic jaŋerao wiac sasawa epic â tutumaŋ qoruc boze motâcko kiŋaŋ gie bajumbieŋ ŋokac i jaŋehec jujupirec irec biŋe manawec.
23Ehuc ʒiŋuc jasawec: “Ŋohe wemocte mâsi keciŋucne eekopirec? No ŋic ŋokac sasawa jaŋeraonec eebapa‐ŋekic hehesicne irec biŋe manakopac.
24Misac, ŋokâ jahec‐nane. Wofuŋte ŋicfâc jaŋe biŋe hehesicne i musawepie manaekopac.
25Ŋic moczi ŋic moctao bahac bâfuaocmuo Anutuzi mufâsâeocmu â ŋic moczi Wofuŋtao bahac bâfuaocmuo ine mozi ere erâ numuocmu?” Erâ Wofuŋ e jahe jofaocte manasuwecte mamac‐jekicte dâŋ moc mi manapic.
26Ehame Samue e soka sanaŋ eme Wofuŋ â ŋic jaŋe hone aŋac embiŋ.
27Eme Anuture ŋic moczi Elirao fisirâ ʒiŋuc âzâcnewec: “Wofuŋ e ʒiŋuc mukac: ‘Israe ŋic jaŋe Aigita mâreŋko Faraore rurumaŋko juhapie apa ŋosage fuacnepo.
28Ehuc no nahac Israe ŋic guru sasawa jaŋeraonec taha bapa‐nane erâ juhuc mai‐naneo fuarâ taha bapa ŋaqi rojuhuc alata‐naneo bâzi rikerâ taha banarehuc juocte rowosâepo. Ehuc apa ŋosage e Israe ŋic jaŋeraonec taha bâzi‐nane i e jahac nâ bac eocte râcnepo.
29Eme go wemocte no nahac taha banareniŋte mutâcne‐jarepo taha bâzi‐nane ira wâwânâŋ ecnekomec? Ehuc Israe ŋicfâc‐nane jaŋere taha hone wosâc erâ nâ gapec ehuc araŋ babanare i sirickerâ ŋokâ jahecge araŋ bajacteekic.’
30Irec Israere Wofuŋ Anutu e ʒiŋuc mutaniŋkekac: ‘Apagere garikiŋ â go gahacne garikiŋ jaŋe dameŋ sâc kiŋaŋ qanareniŋte mupaŋkepo.’ Erâ ʒi ine Wofuŋzi ʒiŋuc mutaniŋkekac: ‘No iŋuc mocwâc mi epemu. No araŋ banareeŋgopieŋ jaŋere manape fefene eocmu â araŋ mi banareeŋgopieŋ jaŋere manape wawahane eocmu.
31Manakic, dameŋ moc mackeocmu ira gore tâpiri â mamac jâmbâŋgere tâpiri i qâtâcnepemu. Eme gore garikiŋko ŋicraŋɋa moczi moc mi juocmu.
32Eme no Israe wiac fofo dunduŋ tahackepemu irec aaricguocmu. Â gore garikiŋko ine ŋicaŋɋa moczi moc mi jujâmbâŋkeocmu.
33Me no sifu ŋic moc akickehuc alata‐naneo kiŋaŋ qaocte manacnepemuo ine ʒâŋe‐ticne mâteŋkeme nânâ nâocte takickeocmu, â ɋâricfâc‐ticne jaŋe fuarâ ŋic ehuc hâmoniŋmu.
34Eme ŋokâ jahecge Hofini â Pinehasi jaherao wiac fuaocmu izi gorao ma moc ezejec: Jahe mâmâc jaha ʒoaŋ mocjahao hâmonicmu.
35Ehame no nahac taha bapa micrereŋhec moc âkendâŋnepemu. Eme eki hâcne nore maŋko â mamanasuo dâŋ fokac irec sâcko wiac ebac eocmu. Ehame no nahac garikiŋfâc‐ticne bâfuac‐joparâ keteŋ‐jopahape e wokemaŋ ruacnekicne‐nane ere maio juhuc juocmu sanaŋ.
36Ehame garikiŋfâcge nâfocne juniŋmu jaŋe siliwa me nânâre numucneniŋte fisirâ ʒiŋuc muniŋmu: “Taha bapa jaŋere biri mocko ʒuhuc‐nâpotec nânâ huŋgaŋne moc bâfuahuc junʒepeneŋ.”’”
