1Eme Samuere dâŋzi tâpirihec erâ Israe ŋic jaŋerao rafârewec. Ehame dameŋ ira Israe ŋic jaŋe Filisa ŋic jaŋehec ʒika qaniŋte rambiŋ. Ehuc Israe ŋic jaŋe Ebeneʒe haeo â Filisa ŋic jaŋe Afeke haeo iŋuc teuŋ âterâ fombiŋ.
2Fohapie Filisa ŋic jaŋe birickerâ Israe ŋic maic‐jopapie qaqac embiŋ. Qaqac epie ʒikazi ɋârâŋkeme Filisa ŋic jaŋe Israe ŋic bawahac‐joparâ ŋic 4 tauseŋ qâhâmoc‐jopambiŋ.
3Eme momori ŋic jaŋe teuŋko risiepie Israe soŋaŋ jaŋe mumbiŋ, “Wofuŋ e wemocte Filisa ŋic jaŋerao râec‐nâpome bawahac‐nâpoŋgopieŋ? Nâŋâc Wofuŋte ʒâʒâfic katapa Silo haeonec bawarepene Wofuŋzi ŋondeŋ‐nâŋecko juhuc râsifâc‐nâŋec jaŋere tâpirionec batarac‐nâpozejec.”
4Iŋuc murâ ŋic sorec‐jopapie Silo haeo rarâ Anutu Tâpiri Ɋuŋɋasaŋ Wofuŋ ere ʒâʒâfic katapa bawarembiŋ. Wofuŋ e kerubim jaŋere faio ŋeŋe juju ejujec. Eme Eli ŋokâ jahec‐ticne Hofini â Pinehasi jahe Anuture ʒâʒâfic katapahec mâmâc rapic.
5Wofuŋte ʒâʒâfic katapazi teuŋko fisime Israe ŋic jaŋe ʒeŋgoma ʒeri ehuc aŋara sâko hepie mâreŋ heumaŋkehuc fowec.
6Ehame Filisa ŋic jaŋe aŋara fânâŋ sâko i manarâ mumbiŋ, “Hebiraio ŋic jaŋere teuŋko aŋara sâko fuakac irec fuŋne weniŋuc?” Eme Wofuŋte katapazi teuŋko fisijec iŋuc manarâ
7Filisa ŋic jaŋe hâwic‐jopawec. Hâwic‐jopame ʒiŋuc mumbiŋ: “Nemuzi teuŋko fisijec, nâŋâc omaeŋgopeneŋ hâcne. Wiac iŋucne juwicnao moc mi fuawec.
8Nâŋâc omae‐jâmbâŋkeŋgopeneŋ; nemu tâpirihec keci ere meonec mozi sâcne batarac‐nâpoocmu? Nemu kecizi hâcne mâreŋ sawao Aigita ŋic joparâ âtenʒaŋ‐jopawec.
9O Filisa ŋic, ŋoŋe ŋic erâ hâbihec domaniŋ. Iŋuc mi eniŋmuo ine Hebiraio ŋic jaŋe ŋoŋere kiŋaŋ qaeŋgopieŋ iŋuc jaha ŋoŋe moc jaŋere kiŋaŋ qaniŋmu. Irec ŋoŋe ŋic erâ ʒika qanʒepieŋ.”
10Iŋuc murâ Filisa ŋic jaŋe ʒika qahuc Israe ŋic bawahac‐jopapie wiserâ hae‐jeŋic sâc rafârembiŋ. Eme boc bawahac‐jopahuc Israe momori kikezi rarane 30 tauseŋ qâhâmoc‐jopambiŋ.
11Erâ Anuture katapa jowac rohuc Eli ŋokâ jahec‐ticne Hofini â Pinehasi hâmocne jofambiŋ.
12Ehame Benjamiŋte guruonec ŋic moc ŋaqi qoruc‐ticne suckekicne â qizec‐ticne sohoŋ ruacnekicne e ʒoaŋ ijaha ʒikamaŋkonec wiserâ gasacke ra Silo haeo fisiwec.
13Fisihame Eli e Anuture katapare maŋ kukumbuc ecneha Mizipa haere hatao hazec râehuc ŋeŋeo ŋewec. Ŋehame ŋic e fisirâ biŋedâŋ mume ŋic ŋokac sasawa kio wâuŋa embiŋ.
14Eme Elizi ki fânâŋ sâko manarâ muwec, “Ki owa irec fuŋne weniŋuc?” Eme ŋic e gasacke rarâ Eli wâc âzâcnewec.
15Eme Eli e jara‐ticne 98 bazume ʒâŋe‐ticne mâteŋkewecte wiac mi ʒâŋitawec.
16Eme ŋic e Eli ʒiŋuc âzâcnewec: “No hâcne ʒikaonec warekopac. No ʒikaonec wiserâ ware fisikopac.” Mume Elizi muwec, “Motec‐nane, wiac weniŋuc jaha fuajec?”
17Wiome biŋedâŋ bafisiwec eki dâŋ ʒiŋuc bâtikiecnewec: “Israe ŋic jaŋe Filisa ŋic jaŋere erâ wisembieŋ. Eha râsi jaŋe ŋic bocjaha jopahuc ŋokâ jahecge Hofini â Pinehasi mâmâc jofapie hâmopirec. Ehame Anuture katapa i rombieŋ wâc.”
18Anuture katapare biŋe muwec dameŋ ira Eli e ŋeŋeonec rândiŋkerâ haesac motâckopec rârâpe hurâ qawec. Ehuc ŋicraŋɋa erâ ŋemâckewecte upene âke pirickerâ hâmowec. E Israe ŋic jaŋere mumutara ŋic juhame jara 40 tarawec.
19Eme joŋao‐ticne, Pinehasire ŋonâŋ hâcne, e kiwechec juwecte kogoc roro dameŋ‐ticne qândâŋke‐fârewec. E Anuture katapa rombiŋ â ŋowene â joŋao‐ticne hâmopic irec biŋe manarâ gozi kime daperâ kogoc rowec.
20Eme hâmozo eha soŋaŋkembiŋ ŋokac i jaŋe ʒiŋuc âzâcnembiŋ: “Hâbige mi ŋeŋgoroŋkeoc, go ŋokâ moc rokomec.” E ine dâŋjeŋic mu bâtikic mi ehuc mana takic ewec.
21E ʒiŋuc muhuc kogocte ʒâŋe Ikabodo muwec: “Anuture katapa rombiŋ irec â ŋowe joŋao jahec‐nane jahere erâ eri qaraweŋzi Israe guruo rârâŋnekac.”
22Erâ mocwâc muwec, “Anuture katapa rokicnere eri qaraweŋzi Israe guruo rârâŋnekac.”
