1Eme Dawidi â ŋicfâcne jaŋe raku ʒoaŋ gie bapa jahec â moc eha Zikilaga haeo fisimbiŋ. Â Ameleke ŋic jaŋe Negebe mâreŋko râsi fisirâ Zikilaga hae i imackehuc ʒoczi turuŋkepie ʒawec.
2Ehuc ŋokac sasawa fekicne wahakicne ɋâricne bacjopa wisembiŋ.
3Eme Dawidi â ŋicfâcne jaŋe haeo fisirâ hae ʒoczi ʒawec â ŋokac naru motecfâc‐jeŋic bacjopa wisembiŋ i honembiŋ.
4Honerâ Dawidi â ŋicfâcne e jahacnehec jumbiŋ jaŋe mâretec kioku ki basarâ betaŋke‐fârembiŋ.
5Dawidire ŋonâŋ jahec Ahinoam, Jesere haeonec â Nabalire hozec Abigai, Karamele haeonec jahe wâc mâmâc bacjofa rambiŋ.
6Eme ŋic jaŋe otâ ŋokâfâc‐jeŋic jaŋere ʒâic busâqoc sâko manarâ Dawidi qânâzi hezo mupie mâretec mezackewec. Erâ e sifu Wofuŋ Anutu‐ticnerao hâbi‐ticne rowec.
7Eme Ahimelec ŋokâ‐ticne taha bapa Abiata âzâcnerâ muwec, “Taha bapa ŋaqi i baware‐narec.” Mume Abiatazi taha bapa ŋaqi i Dawidirao barawec.
8Eme Dawidizi Wofuŋ mu wioc ecnehuc muwec, “No ŋicguru ʒi bâfuac‐joparâ jopa jâpec sâcne ejarepemu me?” Wiome Wofuŋzi dâŋ ʒiŋuc bâtikiecnewec: “Go jâpec‐jopa rac. Erâ bâfuac‐jopa‐jâmbâŋkerâ ŋokac naru motec mocwâc bârisiec‐jopacmu hâcne.”
9Iŋuc mume Dawidi â ŋicfâcne 600 e jahacnehec jumbiŋ jaŋe faharerâ raku Besoro opâo fisirâ ŋic gâcne ira hetarac‐jopapie ŋembiŋ.
10Ŋehapie Dawidi e jahacne â ŋic 400 jaŋe ʒuhuckerâ râsi jâpec‐jopa rambiŋ, â ŋic 200 jaŋe ine boc betaŋkembiŋte Besoro opâ fotâcneniŋte eipierâ ŋembiŋ.
11Eme râsi jâpec‐jopa rambiŋ jaŋe Aigita ŋic moc tuhuo bâfuarâ Dawidirao jowa rambiŋ. Ehuc nânâ opâ râcnepie nâwec.
12Erâ jâmbo poroŋ dâkâne moc â waiŋ hândâŋ makene jajahec râcnembiŋ. E ŋafe ʒoaŋ jahec â moc nânâ opâ moc mi nâhuc juwecte jaŋe wiac i râcnepie nâqiŋnewec.
13Eme Dawidizi ʒiŋuc wiocnewec: “Go more kiŋaŋŋic â hae wenirec?” Iŋuc wiocneme muwec, “No Aigita ŋic, erâ ine Ameleke ŋic mocte kiŋaŋŋic. Ʒoaŋ gie bapa jahec â moc juwicnao huc bacnume bomboŋ‐nanezi behecnurâ rawec.
14Nâŋe Kereti ŋic jaŋere Negebe mâreŋ imackembeŋ, erâ Judaŋic jaŋere mâreŋ dâkâne i mâmâc, erâ Kalebere Negebe mâreŋ i wâc iŋuc jaha. Erâ Zikilaga hae i ʒoczi turuŋkepene ʒawec.”
15E iŋuc mufâreme Dawidizi wiocnerâ muwec, “Go sâcne ŋicguru i jaŋerao jowacnu racmu?” Wiocneme dâŋ ʒiŋuc bâtikiecnewec: “Wiac go mi qâhâmocnucmu â bomboŋ‐nanere meo mi râecnucmu i Anuture maio mupaŋketec jaŋerao sâcne jowacgu rapemu.”
16Eme jowame rarâ honec‐jopame ocna Filisa mâreŋko â Juda mâreŋko wiac rombiŋ irec nâ ʒeri â gae woŋgâŋ sâko ehuc siŋsoŋ nowac gowac ehuc domambiŋ.
17Eme Dawidi e furic râehame fuŋkerâ jopahuc juha hae ŋaferâ furewec. Â ŋic 400 jaŋe sawa ine kamele faio ferâ wisembiŋ.
18Eme Dawidi e Amaleke ŋic jaŋe wiac sasawa rombiŋ i rofârewec, erâ ŋonâŋ jahec‐ticne jahe wâc bârisiec‐jofawec.
19Wiac rombiŋ sasawa, kâcɋene â piticne, naru me motec, moc mi sifuckembiŋ. Dawidizi sasawa bârisiec‐jopa‐fârewec.
20Dawidi e lama bulimakao sasawa i mocwâc bârisiec‐jopawec. Eme ŋic jaŋe i jowac‐joparâ bânie rahuc mumbiŋ, “Wiac ʒi Dawidire.”
21Eme ŋic 200 jaŋe betaŋkerâ Besoro opâo ŋembiŋ jaŋe Dawidi â ŋicfâcne risiehapie hatao bâfuac‐jopaniŋte rambiŋ. Eme Dawidi e maŋfuŋ‐jeŋicko fisirâ ʒoaŋ biaŋ mujarewec.
22Ehame Dawidihec ŋic jumbiŋ i jaŋeraonec ŋic gâcne sâqocne â hehesicne jumbiŋ jaŋe Dawidi ʒiŋuc muhuc âzâcnembiŋ: “Ŋic nâŋâcnehec mi rambiŋ jaŋehec wiac bârisieŋgopeneŋ i moc mi jarenʒepeneŋ. Jaŋe ŋokac naru motecfâc‐jeŋic sawa rocjoparâ ranʒepieŋ.”
23Iŋuc mupie Dawidizi muwec, “Âgo bureŋ, ŋoŋe Wofuŋzi wiac nârejec i iŋuc moc mi ejâmbâŋkenʒepieŋ. E akic‐nâpohuc ŋicguru râsi fisi‐nârembieŋ jaŋe nâŋâcne meo râec‐jopajec.
24Irec ŋoŋe dâŋ muŋgopieŋ i mozi maname sâckeocmu? Ʒikao rahuc wiac hureocmu irec sâc jaha mafa soŋaŋ ŋeocmuzi hurezejec. Jahe sâckoa hurezepirec.”
25Eme dameŋ ira hâcne fuŋkerâ Dawidizi mumupaŋ â sâcmutâc râewec i dameŋ ʒiŋuczia Israe ŋic jaŋerao fokac jaha.
26Eme Dawidi e Zikilaga haeo fisirâ râsi jaŋeraonec wiac rowec i tucne Juda micne âgofâcne râe‐jarehuc ʒiŋuc jazawec: “Ŋoŋere wiac piticne râekopac ʒi Wofuŋte kisâfâc jaŋeraonec rokicne.”
27Wiac i hae biri ʒiŋuc ira ŋic jurambiŋ jaŋerao râeme rawec: Bete, Negebe mâreŋte Ramoti â Jatiri,
28Aroe, Sifamoti â Esitemoa,
29Rakali, Jeramee hae gâcne â Keni hae gâcne,
30erâ Horima, Borasaŋ â Ataka,
31Heboroŋ â hae mâreŋ gâcne Dawidi â ŋicfâcne jaŋe ŋe qatara embiŋ sâc i mâmâc.
