1Saulo e Filisa ŋic jopa jâpec ejareku risiehame ʒiŋuc âzâcnembiŋ: “Manakic, Dawidi e Eŋgedi mâreŋ burocnao jukac.”
2Iŋuc mupie manarâ Saulozi Israe guruonec ŋic ʒikafac 3 tauseŋ bâwosâec‐joparâ micne bajareme Dawidi â ŋicfâcne basac‐jopaniŋte Kâte Noniŋ jaŋere Qorac ira rambiŋ.
3Raku lama sapa mocko fisimbiŋ, eme irec heririŋnao hawec moc fowec. Eme Saulo e ira ho fâzi eocte raʒiwec. Ehame Dawidi â ŋicfâcne jaŋe hawec fâhâŋnao jâmbâŋ soŋkerâ ŋembiŋ.
4Ŋehuc ŋicfâcne jaŋe Dawidi ʒiŋuc âzâcnembiŋ: “Wofuŋ e mupaŋkehuc wiac eocte muwec irec dameŋ ʒi hâcne maickekac, e kisâge megao râekac hâcne. Irec go gahac manakic sâc ecnec.” Iŋuc mupie Dawidi e faharerâ kamic kamic jaha rarâ Saulore ŋaqi tofane bâtâcnewec.
5Eme Dawidi e Saulore ŋaqi tofane bâtâcnewec irec maŋnezi mâretec tutuc qacnewec.
6Ehuc ŋicfâcne ʒiŋuc jazawec: “Wofuŋ e bomboŋ‐nane wokemaŋ ruacnewecte wiac iŋucne ecnepe maname mi sâckeocmu. E Wofuŋzi wokemaŋ ruacnewec hâcne.”
7Dawidi e ŋicfâcne dâŋ iŋuc jazahuc Saulo qaniŋte mi mana‐jarewec. Eme Saulo e faharerâ hawec beherâ hata‐ticne ʒuhuckerâ rawec.
8Ehame Dawidi e wâc iŋuc jaha faharerâ qânâ haweckonec wefurâ Saulo wiracnehuc muwec, “Ŋicwofuŋ‐nane.” Eme Saulozi forisie firâ honeme Dawidi e dapecnehuc ʒâŋe maine mâreŋko hetutuckewec.
9Dawidi e iŋuc erâ Saulo ʒiŋuc âzâcnewec: “Go ŋic jaŋe dâŋ ʒiŋuc muŋgopieŋ irec wemocte hazec râekic: ‘Manakic, Dawidi e sipiricguocte basacguhuc jukac.’
10Manakic, miŋecgac ʒoaŋ ʒira Wofuŋzi qânâ hawecko menaneo râecgujec i honekic hâcne. Eme gâcne jaŋe gupemurâ fotarie‐narepie sifu akicgupac. Ehuc ʒiŋuc mupac: ‘E Wofuŋzi wokemaŋ ruacnewecte menanezi bomboŋ‐nane mi bâuazepac.’
11O bomboŋ‐nane, ŋaqige susucne badomakopac ʒi honec. I no nahac bâtâcnepac, erâ sifu mi gupac. Eme izi hâcne ʒiŋuc gowatuzejec: No ba imac egarezore me sipiricguzore moc mi maŋkehuc jukopac, erâ wâc wiac hehesicne moc mi egarepo. Ehame go ine maŋgâŋko nucmurâ basacnuhuc jukomec.
12Irec Wofuŋzi nâhâcne dâŋ fârine muzejec. Erâ Wofuŋzia nore erâ okacne gareocte wiac moc muocmuo ine menanezi sifu mi bâuacguzepac.
13Muqâqiŋ dâŋ raŋɋane moc ʒiŋuc mueŋgopieŋ: ‘Sâqocne bapazi sâqocne bâfuaeŋgopieŋ.’ Â noni ine sifu menanezi mi bâuacguzepac.
14Israere ŋicwofuŋ e mo qa jâpec ecnehuc jukac? Go wemo wiac qa jâpec ecnehuc jukic? Qâto hâmocne moc, me fitic moc qa jâpec ecnehuc jukic me?
15Wofuŋ e nâhâcne dâŋ fârine mutarazejec. Ehuc fuŋne‐nane mana‐hâmorâ nore dâŋ muhuc gore meonec bataracnuzejec.”
16Dawidi e dâŋ i Saulo âzâcne‐fâreme Saulozi muwec, “I Dawidi ŋokâ‐nane go gahac jâmbâŋ me?” Iŋuc murâ owa ruruckehuc kiowec.
17Ehuc muwec, “Go siricnuhuc wiac etiŋnerâ eekic. No wiac hehesicne egarehape go ine wiac biaŋne bâtikie‐narekomec.
18Erâ ʒoaŋ ʒira Wofuŋzi megao râecnume mi nuhuc wiac biaŋne enaremec i mutaniŋkekomec.
19Mo ŋiczi kisâ‐ticne bâfuarâ beheme sahac furu raocmu? Eme ʒoaŋ ʒira wiac biaŋne enaremec irec Wofuŋzi katucne garezejec.
20Eme ʒi goki ŋicwofuŋ jucmu â Israere uucmaŋzi gore meo fosanaŋkeocmu i manapaŋkekopac.
21Eme go ɋâricfâc‐nane mi bâsirowec‐jopacmurâ â ʒâŋe biŋe‐nane i mamac‐nanere garikiŋfâc jaŋerao wâc mi bârârâŋnecmurâ Wofuŋtao ɋetickehuc mujomire‐narec.”
22E iŋuc mume Dawidizi irec sâcko Saulo mujomirecnewec. Eme Saulo e hae‐ticnao risiehame Dawidi â ŋicfâcne jaŋe hae sanaŋko ferâ jumbiŋ.
