1Fakag, mu fil e n’en ni gube machibnag ngom ma dabmu pag talin e n’en ni gube yog ngom ni ngam rin’.
2Mmotoyil ko tin nib mat’aw mu gay rogon ni ngamnang fan.
3Arogon, mu ning e llowan; ma ga wenignag ni nge ga’ e nangan’ rom.
4Mu changarnag ni bod feni almarin’ ni ga ra changarnag e silber fa boch e machaf nib mith.
5Fa’an ga ra rin’ ma ga ra nang fan rogon ni ngan rus ngak SOMOL mra fel’ rogon ni ngam nang murung’agen Got.
6I SOMOL e ma pi’ e gonop; ma ir e mayib e llowan’ rok nge tamilangan’.
7Ir e ma pi’ e ayuw mma yoror rok e pi’in yad bmat’aw ma yad ba yul’yul’.
8Ir e ma yoror rok e pi’in yad ma ayweg boch e girdi’, ma matanagiy e pi’in yad ma folwok rok.
9Fa’an ga ra motoyil ngog, ma ga ra nang e tin ni bfel’, ma ba mat’aw, ma ba yal’uw, ma ga ra nang ko mang e ngam rin’.
10Ga ra gonop, ma llowan’ rom e ra pi’ e felfelan’ ngom.
11Nangan’ rom nge tamilangan’ e ra yororiyem
12me talegnem ko kireb. Ma tem u orel ko girdi’ ni yad ma k’aring e oloboch ko n’en ni yad ma yog —
13ni pi’in kar furyed rogon e par nib mat’aw yad be par u talmoren e denen,
14pi’in yad ma pir’eg e felfelan’ ko ngongol ni kireb ma yad ba’adag e kireb ni dariy gam’ingin,
15ireram e pi girdi’ ni dabyag i pag e taga’ ngorad ma dabi pagan’uy ngorad.
16Rayag rom ni ngam siyeg demturug reb e ppin nib kireb ni be guy rogon ni nge pingeg lanin’um ko thin rok nib simunguy,
17cha’nem e de yul’yul’ ko pumo’on rok ma ke pag talin e tin ni ognag nib thothup.
18Fa’an ga ra yan ko naun rok e re bpin nem, ma aram e ga be milekag u kanawo’en e yam’. Yira yan ngaram ma ga machda’nag e fayleng ko yam’.
19Dariy be’ ni yan i guy e re bpin nem niki sul. Dakriy e ngiyal’ ni ku ra sul nga kanawo’en e yafos.
20Are ngam folwok ko girdi’ nib manigil ma ga par nib mat’aw e par rom.
21Girdi’ nib mat’aw ni girdi’ ni dariy thibngin e yad ra par u lan e re nam rodad ney.
22Machane Got e bayi buk’liy e pi’in kireb ko fare nam me pug e pi tadenen nge chuweg riy ni bod e pan ni ka ni pug u but’.
